ސްޓުޓްގާޓް (ޖޫން 19) - ޔޫރޯ ފުޓްބޯޅަ މުބާރާތް ބާއްވާ ގައުމު ޖަރުމަނުން ކުޅޭ ދެ ވަނަ މެޗަށް ނުކުންނައިރު، އެ ޓީމަށް ވުރެ ބޮޑަށް ޕްރެޝަރު އޮތީ ހަންގޭރީ އަށް ކަމަށް ޖަރުމަނުގެ ކޯޗު ހޫލިއަން ނާގަލްސްމަން ބުނެފި އެވެ.
އުމުރުން 36 އަހަރުގެ ނާގަލްސްމަން، އަކީ ޔޫރޯ ފުޓްބޯޅަ ތާރީހުގައި ވެސް މުބާރާތުގައި ކޯޗުކޮށްދޭ އެންމެ އުމުރުން ހަގު ކޯޗެވެ. މުބާރާތުގެ ކުރިން، އޭނާ ބުނީ، ގައުމީ ޓީމުތަކުގެ މުބާރާތްތަކުގެ ތަޖުރިބާ އާއި ހުރިހާ ކަމަކަށް ބަލާއިރު، އޭނާ އަށް ޕްރެޝަރު އޮތް ކަމަށެވެ.
ފުރަތަމަ މެޗުގަައި ސްކޮޓްލެންޑާ ދެކޮޅަށް ކުޅުނު މެޗުގެ ކުރިން ނާގަލްސްމަން ބުނީ، އެ ގައުމުގެ ފުޓްބޯޅަ ސަޕޯޓަރުންގެ އުންމީދުތަކާ ނަތީޖާ ނެރެން ޖެހުމުގެ ޕްރެޝަރު އެ ޓީމަށް ވެސް އެބައޮތް ކަމަށެވެ.
އެކަމަކު، ފުރަތަމަ މެޗުގައި 5-1 އިން ސްކޮޓްލެންޑް ބަލިކުރުމަށް ފަހު، ނާގަލްސްމަންގެ ރާގު ދެ ވަނަ މެޗަށް އައިއިރު ބަަދަލުވެއްޖެ އެވެ. ދެ ވަނަ މެޗުގައި މިރޭ ހަންގޭރީއާ ދެކޮޅަށް ނުކުތުމުގެ ކުރިން ނާގަލްސްމަން ބުނީ މި މެޗުގައި ޕްރެޝަރު ބޮޑީ އެ ޓީމަށް ކަމަށެވެ.
"ފެންނަ ފެނުމަަށް ބަލާއިރު އަހަންނަށް ސްކޮޓްލެންޑާއި ހަންގޭރީ ފެންނަނީ އެއް ލެވަލެއްގައި. އެކަމަކު، ފުރަތަމަ މެޗުގެ ނަތީޖާ ނުކުތް ގޮތަކުން ހަންގޭރީ އަށް މި މެޗުގައި އޮތް ޕްރެޝަރު އަހަރެމެންނަށް ވުރެ ވެސް ބޮޑު،" ނާގަލްސްމަން ބުންޏެވެ.
"މިހެން ބުންޏަސް އަހަރެން ކުރިން ފާހަގަކުރި ޕްރެޝަރުގެ ކަންކަން އަހަރެމެންނަށް އެބައޮތްް،"
ނާގަލްސްމަން ބުނީ ފުރަތަމަ މެޗުގައި ހަންގޭރީން ސްވިޒަލެންޑާ ދެކޮޅަށް ކުޅުނު މެޗު ރަނގަޅަށް ދިރާސާކޮށްފައިވާނެ ކަމަށެވެ. އަދި އެ މެޗަކީ ދެ ހާފުގައި ދެ މަންޒަރެއް ފެނިގެންދިޔަ މެޗެއް ކަމަށާއި މެޗުގެ ޖުމްލަ ނަތީޖާ އަށް ބަލާއިރު، އެ މެެޗުން ހަންގޭރީ އަށް ލިބުނު ވަރަށް ވުރެ ބޮޑު އެއްޗެއް ހައްގުވާ ކަމަށެވެ.
"ކޮލިފައިން އަށް ބަލާއިރު، ހަންގޭރީ އަކީ ލިބޭ ސެޓްޕީސްތަކުގައި ގޯލު ޖެހުމުން ދެ ވަނަ އަށް އެންމެ ރަނގަޅު ޓީމު. އެހެންވީމަ، އަހަރެމެން ވަރަށް ރަނގަޅަށް ވިސްނަން ޖެހޭ ކަމެއް މިއީ،" ނާގަލްސްމަން ބުންޏެވެ.
ޖަރުމަނުން މި ފަހަރުގެ މުބާރާތުގައި ކުރިއަށްދާއިރު، ކޮންމެ މެޗެއްގައި ވެސް ފުރަތަމަ މިނިޓުން ފެށިގެން ފަހު ސިކުންތާ ހަމައަށް ހުންނަން ޖެހޭނީ "ލޯ ހުޅުވައިގެން" ސަމާލުކަން ދޭން ޖެހޭ ހުރިހާ ކަމަކަށް ބަލައިގެން ކަމަށް ނާގަލްސްމަން ވަނީ ބުނެފަ އެވެ.
ޖަރުމަނުން އެންމެ ފަހުން ހަންގޭރީއާ ދެކޮޅަށް އަމިއްލަ ގަައުމުގައި ކުޅުނު ހަ މެޗުގެ ތެރެއިން މޮޅުވީ އެންމެ މެޗަކުންނެވެ. ހަންގޭރީ އާއި ޖަރުމަނު ކުޅޭ މެޗު ފަށާނީ މިރޭ 9 ޖަހާއިރު އެވެ.
