ލަންޑަން (ނޮވެމްބަރު 15) - މެންޗެސްޓާ ޔުނައިޓަޑްގެ ވެރިން ކަމަށްވާ ގްލޭޒާ އާއިލާ އަކީ ހަގީގަތުގައި އެ ކްލަބަށް އަޅާލާ ބައެއް ނޫން ކަމަށް ބުނެ، އެ ކްލަބުގެ ވެރިންނަށް ވެސް ކްރިސްޓިއާނޯ ރޮނާލްޑޯ ބަހުގެ ހަމަލާތަކެއް ފޮނުވާލައިފި އެވެ.
މަޝްހޫރު ޓީވީ ހޯސްޓް ޕިއަސް މޯގަން އަށް ރޮނާލްޑޯ ދިން އެކްސްލޫސިވް އިންޓަވިއުގެ އިތުރު ބައިތަކެއް ރޭ ވަނީ އާންމުކޮށްފަ އެވެ. ކުރިން އާންމުކުރި މި އިންޓަވިއުގެ ބައިތަކެއްގައި ރޮނާލްޑޯ ވަނީ ޔުނައިޓެޑުން އޭނާ އަށް އޮޅުވާލާފައި ކަމަށާއި "ގަދަކަމުން" ޔުނައިޓެޑުން އޭނާ ބޭރުކުރަން މަސައްކަތްކުރާ ބަޔަކު ވެސް އެބަތިބި ކަމަށް ބުނެފަ އެވެ.
ޔުނައިޓެޑްގެ މައި ހިއްސާދާރުން ކަމަށްވާ އެމެރިކާގެ ގްލޭޒާ އާއިލާއާ ގުޅޭގޮތުން ރޮނާލްޑޯ ،37، ބުނީ ކުޅިވަރުގެ ނަޒަރަކުން ބަލާއިރު، ގްލޭޒާ އާއިލާ އިން ޔުނައިޓަޑަށް "އަޅައެއް ނުލާ" ކަމަށެވެ. އަދި ޔުނައިޓެޑް އަކީ "މާކެޓިން ކްލަބެއް" ކަމަށާއި މާކެޓް ކޮށްގެން ފައިސާ ހޯދިޔަސް، ކާމިޔާބެއް ހޯދޭނެ ގޮތެއް ނެތް ކަމަށެވެ.
"ކުރިއަށް އޮތް ދެ ތިން އަހަރުގެ ތެރޭގައި އެންމެ މަތީ ފަންތީގައި ވާދަކުރުމަށް ޔުނައިޓެޑަށް ދަތިތަކެއް ކުރިމަތިވާނެ،" ރޮނާލްޑޯ ބުންޏެވެ.
ގްލޭޒާ އާއިލާ އަކީ ޔުނައިޓަޑްގެ ސަޕޯޓަރުންގެ މެދުގައި މަގްބޫލު ބައެއް ނޫނެވެ. މީގެ ކުރިން ގްލޭޒާ އާއިލާއާ ދެކޮޅަށް ޔުނައިޓަޑްގެ ސަޕޯޓަރުން ވަނީ އެތައް ފަހަރަކު މުޒާހަރާކޮށްފަ އެވެ.
ރޮނާލްޑޯ ބުނީ ޔުނައިޓެޑްގެ އެތެރޭގެ ބައެއް ކަންތައްތައް ހުރި ގޮތުން ޔުނައިޓެޑަށް މެންޗެސްޓާ ސިޓީ އާއި ލިވަޕޫލް ފަދަ ކްލަބުތަށް މިހާރު އޮތް ފެންވަރަށް ނުދެވޭ ކަމަށެވެ.
"ސަޕޯޓަރުންނަށް ހަގީގަތް އެނގެންޖެހޭ. ކްލަބުގެ ކުޅުންތެރިންނާއި އަހަރެން ވެސް ބޭނުންވަނީ ކްލަބަށް ރަނގަޅު ގޮތް. އެހެންވެ އަލުން މި ކްލަބާ ގުޅުނީވެސް. މިއީ އަހަރެން ވަރަށް ލޯބިވާ ކްލަބެއް. އެކަމަކުގެ ކްލަބުގެ އެތެރޭގެ ބައެއް ކަންތައްތައް މި ވަގުތު ހުރީ އެންމެ ރަނގަޅަށް ނޫން. އެެހެންވެ އެންމެ މަތީ ލެވެލްއަށް ނުދެވިގެން މިއުޅެނީ،" ރޮނާލްޑޯ ބުންޏެވެ.
ރޮނާލްޑޯގެ ވާހަކަތަކާ ގުޅިގެން ޔުނައިޓެޑުން ވަނީ ރޭ ބަޔާނެއް ވެސް ނެރެފައެވެ. އެ ބަޔާނުގައި ޔުނައިޓަޑުން ބުނީ ރޮނާލްޑޯގެ ވާހަކަތަކާ ގުޅޭގޮތުން ރައްދެއް ނުވަތަ ފިޔަވަޅެއް އަޅާނީ އެކަން ވަރަށް ރަނގަޅަށް ބެލުމަށްފަހު ކަަމަށެވެ.
"ކްލަބުގެ ވިސްނުން އޮތީ ސީޒަންގެ ދެ ވަނަ ބަޔަށް ތައްޔާރުވުމަށް. މިހާރު ޓީމުގެ ތެރޭގައި އޮތް އެއްބައިވަންތަކަމާއި ޓީމު ރޫހު ދެމެހެއްޓުމަށް އެންމެ ބޮޑު އިސްކަމެއް ދޭނީ،" ޔުނައިޓަޑުން ބުންޏެވެ.
ޔުނައިޓެޑްގެ ކޯޗުކަމާ ޓެން ހާގް ހަވާލުވެ، ޕްރީ ސީޒަނުގައި ރޮނާލްޑޯ ބައިވެރިނުވާތީ އޭނާ އަށް ގިނަ ސުވާލުތަކެއް އަމާޒުވި އެވެ. އަދި ޕްރީ ސީޒަނުގައި ރޮނާލްޑޯ ބައިވެރިވާން ފަށައި، ޔުނައިޓެޑުން ރަޔޯ ވަޔެކާނޯއާ ދެކޮޅަށް ކުޅުނު މެޗުގެ ފުރަތަމަ ހާފު ނިމުމުން ރޮނާލްޑޯ ދަނޑުން ދިޔަ މައްސަލައިގައި ވެސް އޭނާ އާއި ޓެން ހާގް މެދުގައި ހިތްހަމަނުޖެހުންތަކެއް އުފެދުނެވެ.
ދާދި ފަހުން އިނގިރޭސި ޕްރިމިއާ ލީގުގައި ޓޮޓެންހަމާ ދެކޮޅަށް ޔުނައިޓެޑް ކުޅުނު މެޗުގެ ފަހުކޮޅުގައި ރޮނާލްޑޯ ވަނީ ދަނޑުން ގޮސްފަ އެވެ. އެ މެޗަށް ފަހު ޓެން ހާގް ބުނީ، "ރޮނާލްޑޯ މެޗަށް އަރަން ދެކޮޅު ހެދި" ކަމަށެވެ.
އެހެންވެ، ޗެލްސީ މެޗުގެ ސްކޮޑުން ރޮނާލްޑޯ ބާކީކޮށް އަދަބު ދިނެވެ.
ޓޯކްޓީވީ އަށް ރޮނާލްޑޯ ދިން އިންޓަވިއުގައި ވަނީ ޔުނައިޓެޑަށް އޭނާއާ އެކު ކުޅުނު ދެ ކުޅުންތެރިން ކަމަށްވާ ވޭން ރޫނީ އާއި ގެރީ ނެވިލް އަށް ވެސް ފާޑުކިޔައިފަ އެވެ. ރޮނާލްޑޯ ބުނީ ޓީވީގައި އޭނާ އަށް ފާޑުކިޔުމަކީ ގެރީ ނެވިލް އާއި ރޫނީ ވަރަށް ކުރާހިތުން ކުރާ ކަމެއްކަން ފާހަގަވެފައިވާ ކަމަށެވެ. އަދި ރޫނީ އާއި ނެވިލް އަކީ އެއްވެސް އިރެއްގައި އޭނާގެ "އެކުވެރިން" ނެއް ނޫން ކަމަށް ވެސް ރޮނާލްޑޯ ބުނެފައިވެ އެވެ.
