އަންނަ މަހު ޕާކިސްތާނާ ދެކޮޅަށް ރާއްޖޭން އެކުވެރިކަމުގެ މެޗެއް ކުޅެން ކުރާ މަސައްކަތުގައި އިތުރު މަޝްވަރާތަކެއް ކުރަމުން އަންނަ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފި އެވެ.
ޕާކިސްތާންގެ މީޑިއާތަކުން އެ ގައުމުގެ ފުޓްބޯޅަ ފެޑެރޭޝަންގެ އޮފިޝަލަކާ ހަވާލާދީ ރިޕޯޓްކޮށްފައިވާ ގޮތުގައި ރާއްޖޭން ވަނީ އަންނަ މަހު ޕާކިސްތާނަށް ގޮސް އެ ގައުމުގައި މެޗު ކުޅެން ލިބިފައިވާ ފުރުސަތު ދޫކޮށްލަން ނިންމައިފަ އެވެ. ޕާކިސްތާން ފެޑެރޭޝަންގެ އެ އޮފިޝަލް ބުނެފައިވާ ގޮތުގައި، ރާއްޖެ ހިމެނޭ ގޮތަށް ޕާކިސްތާންގައި މެޗު ކުޅުމުގެ ބަދަލުގައި ކޮންމެ ގައުމަކުން ވެސް ބޭނުންވަނީ އަމިއްލަ ގައުމުގައި މެޗުތައް ކުޅޭށެވެ.
އަންނަ މަހު ޕާކިސްތާނާ ދެކޮޅަށް ކުޅެން ރޭވި މެޗާ ބެހޭގޮތުން، "އަދަދު" އިން ކުރި ސުވާލަކަށް އެފްއޭއެމްގެ ޖެނެރަލް ސެކްރެޓަރީ، ހުސެއިން ޖަވާޒް (ޖަވާ) ވިދާޅުވީ ގިނަ މެޗުތަކެއް ކުޅެން ހުށަހެޅުންތަކެއް ލިބިފައިވާ ކަމަށާއި އެކަން ޕާކިސްތާނަށް ވެސް އަންގާފައިވާ ކަމަށެވެ.
"އެބައޮތް މެޗުތަކެއް ކުޅެން (ރާއްޖެ) އަށް ފުރުސަތު ލިބިފައި. އެކަން ވާނީ ޕާކިސްތާނަށް ވެސް އަންގާފައި. އަހަރެމެން ޕާކިސްތާން ފެޑެރޭޝަނަށް އަދިއެއް ނުއެއް އަންގަން މެޗު ނުކުޅޭނެ ކަމަކަށް. ރަސްމީ ސިފައެއްގައި ޕާކިސްތާން ފުޓްބޯލް ފެޑެރޭޝަނާ މިކަމާ ބެހޭ މަޝްވަރާއެއް އަދި ނުކުރެވޭ،" ޖަވާޒް ވިދާޅުވި އެވެ.
ޖަވާޒް ވިދާޅުވީ ޕާކިސްތާން ފެޑެރޭޝަނުން ލިބިފައިވާ ފުރުސަތެކޭ އެއްގޮތަށް އެހެން ގައުމުތަކުން ވެސް މެޗު ކުޅެން ލިބިފައިވާ ހުށަހެޅުންތަކާ މެދު ވާހަކަ ދެކެވެމުން އަންނަ ކަމަށެވެ.
2010 ވަނަ އަހަރުގެ އޭޝިއަން ގޭމްސްގައި ރާއްޖޭގެ އަލީ އަޝްފާގު (ކ) އަތުން ބޯޅަ ހޯދަން ޕާކިސްތާންގެ ރިޒްވާން މަސައްކަތް ކުރަނީ.
ޕާކިސްތާނުން ރާއްޖެއާ ދެކޮޅަށް ކުޅެން ރޭވި މެޗަކީ އެ ގައުމުގެ ފުޓްބޯޅަ ސަސްޕެންޝަނުން އެނބުރި އައުން ފާހަގަކުރުމުގެ ވިސްނުމުގައި ކުޅެން ރޭވި ޓުއާ މެޗުތަކެކެވެ. ޕާކިސްތާންގެ މީޑިއާ ރިޕޯޓްތައް ބުނާގޮތުން ޕާކިސްތާން ފުޓްބޯޅަ ފެޑެރޭޝަނުން ވަނީ ރާއްޖޭގެ އިތުރުން ތަޖިކިސްތާނާ ދެކޮޅަށް މެޗު ކުޅެން ވެސް ދައުވަތު ފޮނުވައިފަ އެވެ.
ތިން ވަނަ ފަރާތެއްގެ ނުފޫޒާ ހެދި ފީފާއިން ހަތަރު އަހަރު ތެރޭ ދެ ވަނަ ފަހަރަށް ޕާކިސްތާން ސަސްޕެންޑްކުރަން ނިންމީ މިދިޔަ އަހަރުގެ އޭޕްރީލް މަހު އެވެ. އެއީ ފީފާއިން ހަމަޖައްސާފައިވާ ނޯމަލައިޒިން ކޮމިޓީ އަތުން އެ ގައުމުގެ ފުޓްބޯޅައިގެ ކޮންޓްރޯލް އެ ގައުމުގެ ފުޓްބޯޅަ ފެޑެރޭޝަންގެ ކުރީގެ ރައީސް ސައީދު އަޝްފާގު ހުސެއިން ޝާހް ނެގުމުންނެވެ. އޭނާ އެކަން ކުރީ ގަދަބާރުން ޕާކިސްތާން ފުޓްބޯޅަ ފެޑެރޭޝަންގެ ހެޑްކުއާޓަރުގެ ތެރެއަށް ގްރޫޕަކާ އެކު ވަދެ، ކަމަށް ފީފާ އިން ހަމަޖެއްްސި ނޯމަލައިޒިން ކޮމިޓީގެ ޗެއާމަން މާލިކް ހާރޫން ވަނީ ޕާކިސްތާންގެ މީޑިއާ އަށް ދިން އިންޓަވިއުއެއްގައި އޭރު ވިދާޅުވެފަ އެވެ. އޭނާ ފީފާއަށް ހުށަހެޅި ރިޕޯޓްގައި ވެސް ބަޔާންކޮށްފައިވަނީ އެ ގޮތަށެެވެ.
ފީފާ އިން ހަމަޖެއްސި ނޯމަލައިޒިން ކޮމިޓީ އަށް އަލުން ކޮންޓްރޯލް ދޭން އެއްބަސްވީ މި އަހަރުގެ ޖޫން 29 ގަ އެވެ. އެހެންވެ، ޕާކިސްތާނަށް ދީފައިވާ ސަސްޕެންޝަން އުވާލަން ފީފާ އިން ނިންމި އެވެ.
ޕާކިސްތާންގެ ސީނިއާ ފުޓްބޯޅަ ޓީމު އެންމެ ފަހުން ރަސްމީ މެޗެއް ކުޅުނީ 2019 ވަަނަ އަހަރު އެވެ. އެއީ ވޯލްޑް ކަޕް ކޮލިފައިންގައި ކެމްބޯޑިއާއާ ދެކޮޅަށް ކުޅުނު މެޗުގަ އެވެ.
ރާއްޖޭން ވަނީ 2013 ވަނަ އަހަރުގެ ފެބްރުއަރީ މަހުގެ ތެރޭގައި ޕާކިސްތާނާ ދެކޮޅަށް ގަލޮޅު ދަނޑުގައި އެކުވެރިކަމުގެ ދެ މެޗެއް ކުޅެފަ އެވެ. އެ ގޮތުން ފުރަތަމަ ކުޅުނު މެޗުގައި ރާއްޖޭގެ އަސަދުﷲ އަބްުދުﷲ ލީޑުނަގައިދީފައިވަނިކޮށް، ޕާކިސްތާނުން އިތުރު ވަގުތުގައި ވަނީ 1-1 އިން އެއްވަރުކޮށްފަ އެވެ. ދެ ވަނަ މެޗުގައި ރާއްޖެ ވަނީ 3-0 އިން ޕާކިސްތާން ބަލިކޮށްފަ އެވެ. ރާއްޖޭގެ އަލީ އަޝްފާގު (ދަގަނޑޭ) ދެ ގޯލު ޖެހިއިރު، މުހައްމަދު އުމެއިރު ވެސް ވަނީ ގޯލެއް ކާމިޔާބުކޮށްފަ އެވެ.
