އެމްޓީސީސީ ދިވެހި ސާފް ލީގުގައި އެންމެ ފަހުން ކުރިއަށް ދިޔަ މުބާރާތް، "ގާމާދޫކޮޅު 2022" ގެ ޗެމްޕިއަންކަން ހޯދައި، ރާއްޖޭގެ އެންމެ ކާމިޔާބު އެއް ސާފަރު، ހުސެއިން އަރީފް (އިބޫ)ގެ އެނބުރި އައުން ވަރުގަދަކޮށް ފާހަގަކޮށްފި އެވެ.
މިއީ 2019 ވަނަ އަހަރުގެ ގައުމީ މުބާރާތް ކާމިޔާބުކުރި ފަހުން އިބޫ ސާފިންގެ ގައުމީ ލެވަލްގެ މުބާރާތަކުން ފެނުނު ފުރަތަމަ ފަހަރެވެ. ހަތް ފަހަރު ގައުމީ އެއް ވަނަ ހޯދާފައިވާ އިބޫ، ގާމާދޫކޮޅު އިވެންޓް ކާމިޔާބުކުރީ ފައިނަލުގައި ހޫދު އަހުމަދު ބަލިކޮށްފަ އެވެ.
ކ. ހިންމަފުށީގައި ކުރިއަށްދިޔަ ގާމާކޮޅު އިވެންޓުގެ ފައިނަލަށް ކުރި ދަތުރުގައި އިބޫ ވަނީ ސެމީ ފައިނަލުގައި މި އަހަރުގެ ދެ ސާފިން މުބާރާތް ކަމަށްވާ މުލީކޮޅު ރާޅުގަނޑާއި ހުރާކޮޅު ރާޅުގަނޑު އިވެންޓް ކާމިޔާބުކުރި ސާފަރު، އަހުމަދު އާގިލް (އައްމަޑޭ) ފަހަތަށް ޖައްސާލައިފަ އެވެ.
އަނެއްކޮޅުން، ހޫދު އަށް ވެސް މިއީ ރަނގަޅު އެނބުރި އައުމެކެވެ. ގާމާދޫކޮޅު ބޭއްވުމުގެ ކުރިން އެންމެ ފަހުން ކުރިއަށްދިޔަ މުބާރާތުގައި މިދިޔަ އަހަރުގެ ގައުމީ ޗެމްޕިއަން، ހޫދު ވާދަނުކުރެ އެވެ.
"ގާމާދޫކޮޅު 2022" އިވެންޓްގެ އަންހެން އޯޕަން ބައިގެ ޗެމްޕިއަންކަން ހޯދީ އަންހެން ސާފިންގައި ކާމިޔާބު ރެކޯޑެއް ދަމަހައްޓަމުން އަންނަ އާޔާ ނަސީމް އެވެ. ސާފިން އެސޯސިއޭޝަނުން އަންހެން ޑިވިޝަނެއް ތައާރަފްކޮށް ހުޅުވާލައިގެން ފެށިއިރު، މިހާތަނަށް އޭގެއިން އިވެންޓެއްގައި އާޔާ ފަހަތަށް ޖައްސާލެވޭ ގޮތެއްނުވި އެވެ.
މި އަހަރު ދެން އޮތީ އަންނަ މަހު ރާޅުގަނޑު ސަރަހައްދުގައި ކުރިއަށްދާ ގައުމީ ސާފިން މުބާރާތެވެ. ކ. މާލޭ ރާޅުގަނޑު ސަރަހައްދުގައި އެ އިވެންޓް ކުރިއަށްދާނީ އަންނަ މަހު މެދުތެރޭގަ އެވެ. އެ މުބާރާތަށް ނަންދެވިފައިވަނީ "ރަންނަމާރި ޗެލެންޖް"ގެ ނަމުންނެވެ.
