މެޑްރިޑް (ސެޕްޓެމްބަރު 10) - ސްޕެނިޝް ލީގުގައި މިރޭ ބާސެލޯނާ އިން 4-0 އިން ކަޑިޒް ބަލިކުރި މެޗުގައި ސަޕޯޓަރެއްގެ ހާލު ދެރަވެގެން ހޮސްޕިޓަލަށް ގެންދަން ޖެހިއްޖެ އެވެ.
މިރޭގެ މެޗުގައި ބާސެލޯނާ އިން 2-0 އިން ކުރީގައި އޮއްވައި، ސަޕޯޓަރަކު މެޔަށް ތަދެއް އަރައިގެން، ކުއްލި ފަރުވާދޭން ޖެހޭތީ މެޗު މެދުކަނޑާލި އެވެ.
ހާލު ދެރަވި ސަޕޯޓަރު ހޮސްޕިޓަލަށް ގެންގޮސް ފަރުވާގެ ކަންކަން ހަމަަޔަކަށް އެޅުވެންދެން 50 ވަރަކަށް މިނިޓަށް މެޗު މެދުކަނޑާލާފައި އޮތެވެ. ހޮސްޕިޓަލުން ސަޕޯޓަރުގެ ހާލު ރަނގަޅުވަމުން އަންނަކަން އެންގުމާ އެކު، އޭގެ ފަހުން އަލުން ފަށައިގެން މެޗު ފުރިހަމަ ކުރިއިރު، ބާސެލޯނާ ވަނީ އިތުރު ދެ ގޯލު ޖަހައި މެޗުން މޮޅުވެފަ އެވެ.
"މި ކަހަލަ ކަމަކީ ފުޓްބޯޅަ އަށް ވުރެން މުހިންމު ކަންކަން، މީހެއްގެ ފުރާނަ ސަލާމަތްކުރުން ހުރިހާ ކަމަކަށް ވުރެން މުހިއްމުވާނެ، އުފަލަކީ އެ މީހުންނަށް އަވަސް ފަރުވާގެ ކަންކަން ނިންމައި، ހާލު ދެރަވި ފަރާތުގެ ފުރާނަ ސަލާމަތްކުރެވުން،" މެޗަށް ފަހު ބާސެލޯނާގެ ކޯޗު ޒަވީ ހެނާންޑޭޒް ބުންޏެވެ.
މިރޭގެ މެޗުގެ ތެރެއިން ކަޑިޒް ސަޕޯޓަރަކު މެޔަށް ތަދެއް އަރައިގެން މެޗު މެދުކަނޑާލައި އޭނާ ހޮސްޕިޓަލަށް ގެންގޮސް ވަނީ ފަރުވާދީފައި.
ކަޑިޒް ދަނޑުގައި މިރޭ ކުޅުނު މެޗު ފަށައިން 10 ވަނަ މިނިޓްގައި ބާސެލޯނާގެ ރަފީނިއާ ޖެހި ޝޮޓެއް ވަނީ ގޯލުގެ ދަނޑިއަށް އަމާޒުވެފަ އެވެ. ބާސެލޯނާ އިން ލީޑުނެގީ މެޗުގެ 55 ވަނަ މިނިޓްގައި ފްރެންކީ ޑި ޔޯން ޖެހި ގޯލުންނެވެ. މިއީ ގަވީ ނެގި ހުރަހެއް އޭރިއާތެރެއިން ކަޑިޒްގެ ކީޕަރު ޖެރެމިއާ ލެޑެސްމާ އަތުގައި ޖެހިފައި ނުކުތް ވަގުތު ޑި ޔޯން ޖެހި ގޯލެކެވެ.
ދެ ވަނަ ހާފުގައި ބަދަލަކަށް ކުޅެން އެރި ރޮބަޓް ލެވަންޑޯސްކީ ވަނީ މެޗުގެ 65 ވަނަ މިނިޓްގައި ގޯލު ރޮނގު ކައިރިން ޖެހި ގޯލުން ބާސެލޯނާގެ ލީޑުފުޅާކޮށްދީފަ އެވެ. މެދުކެނޑުމަށް ފަހު އަލުން މެޗު ފަށައިގެން، ބާސެލޯނާ އިން އިތުރު ދެ ގޯލު ޖެހިއިރު، ދެ ލަނޑުގައި ވެސް ލެވަންޑޯސްކީ މުހިންމު ރޯލެއް ކުޅުނެވެ.
މެޗުގެ 86 ވަނަ މިނިޓްގައި ލެވަންޑޯސްކީ އޭރިއާތެރެއަށް ބޯޅަ ހިފައިގެން ވަދެ، ޖައްސާލި ބޯޅަ އަންސޫ ފަޓީ ވަނީ ހުސްކޮށް އޮތް ގޯލަށް ބޯޅަ ފޮނުވާލައިފަ އެވެ. އިތުރު ވަގުތުގައި އޮސްމާން ޑެމްބެލޭ އޭރިއާ ރޮނގުމަތިން ޖެހި ޝޮޓުން ބާސެލޯނާގެ ހަތަރު ވަނަ ގޯލު ޖެހިއިރު، އެ އެޓޭކް ފަށަން އެ ބޯޅަ ދިނީ ވެސް ލެވަންޑޯސްކީ އެވެ.
މިރޭގެ މޮޅާ އެކު ބާސެލޯނާ ވަނީ ފަސް މެޗުން 13 ޕޮއިންޓް ހޯދައި ލީގުގެ އެއް ވަނަ އަށް ޖެހިލައިފަ އެވެ. ދެ ވަނައިގައި އޮތް ރެއާލް މެޑްރިޑުން ހަތަރު މެޗުން 12 ޕޮއިންޓާ އެކު ދެ ވަނައިގައި އޮތްއިރު، މާދަމާ މަޔޯކާ ބަލިކޮށްގެން އަލުން އެއް ވަނަ އަށް އެރޭނެ އެވެ.
ސްޕެނިޝް ލީގުގައި މިރޭ އެތުލެޓިކޯ މެޑްރިޑުން ވަނީ އަމިއްލަ ދަނޑުގައި 4-1 އިން ސެލްޓަ ވިގޯ ބަލިކޮށް ލީގުގެ ހަތަރު ވަނަ އަށް ޖެހިލައިފަ އެވެ.
