މެޑްރިޑް (ސެޕްޓެމްބަރު 10) - ބާސެލޯނާ އިން އެ ކްލަބްގެ ބައެއް ހަރު މުދާތައް ވިއްކާލައި، އާމްދަނީ އިތުރުކުރުމަށް ކުރި މަސައްކަތާއެކު، މާލީ ގޮތުން އެ ކްލަބުން ބޮޑު ކުރިއެރުމެއް ހޯދައިފި އެވެ.
ލަލީގާގެ ކްލަބުތަކުގެ މާލީ ހިސާބުތަކަށް ރިޔާއަތްކޮށް، މި ސީޒަނަށް ލަލީގެ ކޮންމެ ކްލަބަކަށް ހަރަދުކުރެވޭނެ ކަމަށް ކަނޑައެޅި އަދަދުތައް ލަލީގާ އިން ވަނީ އިއްޔެ އާންމުކޮށްފަ އެވެ. މި އަދަދުތައް ލަލީގާ އިން އާންމުކުރީ މި ސީޒަންގެ ފުރަތަމަ ޓްރާންސްފާ ބާޒާރު ނިމުމުންނެވެ.
ބާސެލޯނާ އަށް މި ސީޒަނަށް ހަރަދުކުރެވޭނެ ކަމަށް ކަނޑައަޅާފައިވަނީ 656.4 މިލިއަން ޔޫރޯ (657 މިލިއަން ޑޮލަރު) އެވެ. މިދިޔަ އަހަރުގެ ފަހުކޮޅު މައިނަސް "ސެލެރީ ކެޕް"އެއްގައި އޮތް ބާސެލޯނާ އިން މި ސީޒަންގައި ކުޅުންތެރިން ހޯދުމަށް ޓްރާންސް ފީގެ ގޮތުގައި 153 މިލިއަން ޔޫރޯ (153 މިލިއަން ޑޮލަރު) ހޭދަކޮށްފައިވާއިރު، "ސެލެރީ ކެޕް" އިތުރުވުމަކީ އެ ކްލަބުން މާލީ ގޮތުން ހޯދި ބޮޑު ކުރިއެރުމެކެވެ.
ބާސެލޯނާ އިން މާލީ ގޮތުން ކުރިއެރުންތަކެއް މި ހޯދީ މި ސީޒަނަށް ކުޅުންތެރިން ހޯދުމާއި އާމްދަނީ އިތުރުކުރުމަށް އެ ކްލަބުގެ ބައެއް އެސެެޓްތައް ވިއްކައި، އަދި ހަރަދުކުޑަކުރުމަށް ކުރި މަސައްކަތުންނެވެ. ހަރަދު ކުޑަކުރުމުގެ ގޮތުން ބައެއް ސީނީއާ ކުޅުންތެރިންގެ މުސާރަތައް ކުޑަކުރުމުގެ އިތުރުން ބައެއް ކުޅުންތެރިން ވަނީ އެ ކްލަބުން ދޫކޮށްލައިފަ އެވެ. އޭގެ ތެރޭގައި ޕިއޭ އެމެރިކް އޮބާމަޔަން އާއި ސެމުއެލް އުމްޓިޓީ އަދި މާޓިން ބްރެތުވެއިތު ހިމެނެ އެވެ.
އާމްދަނީ އިތުރުކުރުމުގެ ގޮތުން ކްލަބުން ވަނީ ދިގު މުއްދަތުގެ އެއްބަސްވުމެއްގެ ދަށުން ޑޮމެސްޓިކް ޓީވީ ރައިޓްސްގެ 25 ޕަސެންޓް އެމެރިކާގެ އިންވެސްޓްމަންޓް ކުންފުންޏަށް ގާތްގަނޑަށް 400 މިލިއަން ޔޫރޯ (400 މިލިއަން ޑޮލަރު) އަށް ވިއްކާލައިފަ އެވެ. މީގެ އިތުރުން، ބާސެލޯނާ ސްޓޫޑިއޯސްގެ 50 ޕަސެންޓާ ގާތްކުރާ އަދަދެއްގެ ހިއްސާ ދެ ކުންފުންޏަށް 200 މިލިއަން ޔޫރޯ (200 މިލިއަން ޑޮލަރު) އަށް ވަނީ ވިއްކާލައިފަ އެވެ.
ޓްރާންސްފާ ބާޒާރުގައި އެންމެ ހަރަކާތްތެރިކޮށް ފެނުނު އެއް ކްލަބަކީ ބާސެލޯނާ އެވެ. އެ ކްލަބުން ވަނީ ސްކޮޑް ވަރުގަދަ ކުރުމަށް ބަޔާން މިއުނިކަށް ކުޅެމުންދިޔަ ތަޖުރިބާކާރު ފޯވަޑް ރޮބަޓް ލެވަންޑޯސްކީ އާއި ލީޑްސްގެ ޔުނައިޓަޑް ކުޅެމުންދިޔަ ބްރެޒިލްގެ ވިންގް، ރަފީނިއާ އަދި ސެވިއްޔާގެ ޑިފެންޑަރު ޖޫލްސް ކޫންޑޭ އެ ޓީމަށް ގެނެސްފަ އެވެ.
މީގެ އިތުރުން، ހިލޭ ޓްރާންސްފާތަކުގައި އޭސީ މިލާނަށް ކުޅެމުންދިޔަ އައިވަރީ ކޯސްޓްގެ މިޑްފީލްޑަރު ފްރޭންކް ކެސިއޭ އަދި ޗެލްސީގެ ޑެންމާކް ޑިފެންޑަރު އަންދްރެސް ކްރިސްޓެންސަން ވަނީ ބާސެލޯނާއާ ގުޅިފަ އެވެ.
ކޮންމެ ސީޒަނެއްގެ ތެރޭގައި ވެސް ކްލަބުތަކުގެ އާމްދަނީ އާއި ހަރަދުތަކަށް ރިޔާއަތްކޮށް، ލަލީގާ އިން ކްލަބުތަކުގެ "ސެލެރީ ކެޕް" އަޕްޑޭޓްކުރެ އެވެ. ލަލީގާ އިން ކަނޑައަޅާ "ސެލެރީ ކެޕް"ގައި ހިމެނެނީ ކޮންމެ ކްލަބަކަށް ވެސް ކުޅުންތެރިންނާއި ހެޑް ކޯޗާއި އެސިސްޓަންޓް ކޯޗާއި ފިޓްނަސް ކޯޗު އަދި އެކެޑަމީ އަށް ހަރަދުކުރެވޭނެ އަދަދެވެ.
ލަލީގާ އިން ކަނޑައެޅި "ސެލެރީ ކެޕް"ގައި ބާސެލޯނާ އަކީ ދެ ވަނަ އެވެ. އެންމެ ބޮޑު "ސެލެރީ ކެޕް"އެއް ލިބުނީ ރެއާލް މެޑްރިޑަށެވެ. ރެއާލްގެ "ސެލެރީ ކެޕް" އަކީ 684.4 މިލިއަން ޔޫރޯ (685 މިލިއަން ޑޮލަރު) އެވެ. އެކަމަކު، މިދިޔަ މާޗު މަހު އެ ކްލަބުގެ "ސެލެރީ ކެޕް"ގެ ގޮތުގައި ކަނޑައަޅާފައިވަނީ 739 މިލިއަން ޔޫރޯ (739 މިލިއަން ޑޮލަރު) އެވެ.
ތިން ވަނައިގައި 341 މިލިއަން ޔޫރޯ (342 މިލިއަން ޑޮލަރު) ގެ "ސެލެރީ ކެޕް"އަކާ އެކު އޮތީ އެތުލެޓިކޯ މެޑްރިޑް އެވެ. ހަތަރު ވަނައިގައި އޮތީ 200 މިލިއަން ޔޫރޯ (200 މިލިއަން ޑޮލަރު) ގެ ލިމިޓެއް ލިބިފައި އޮތް ސެވިއްޔާ އެވެ. ލަލީގާ 8 ކްލަބަކަށް ވަނީ 52 މިލިއަން ޔޫރޯ (52 މިލިއަން ޑޮލަރު) ނުވަތަ އެ އަށް ވުރެ މަދު އަދަދެއް "ސެލެރީ ކެޕް"ގެ ގޮތުގައި ކަނޑައަޅައިފަ އެވެ.
