ބާމިންހަމް (ސެޕްޓެމްބަރު 9) - ޗެލްސީއާ އެކު އިނގިރޭސި ޕްރިމިއާ ލީގުގެ ޗެމްޕިއަންކަން ހޯދާފައިވާ ސްޕެއިންގެ ފޯވާޑް، ޑިއޭގޯ ކޮސްޓާގެ ވޯކް ޕާމިޓް ކަންކަން ހައްލުވެ، އޭނާ ވުލްވްސް އަށް ބަދަލުވާން ހުރިހާކަމެއް ހަމަޖެހިއްޖެ އެވެ.
ވުލްވްސް އިން ކޮސްޓާ އަށް ކޮންޓުރެކްޓެއް ހުށަހަޅަން ނިންމީ އެ ކްލަބާ ދާދި ފަހުން ކުޅުނު ފޯވަޑް ސާސާ ކަލަޑްޒިކާއި އެ ކްލަބްގެ އެއް ވަނަ ފޯވާޑް މެކްސިކޯގެ ފޯވަޑް ރައޫލް ހިމެނޭޒަށް އަނިޔާވެ، ފޯވާޑެއް ހޯދަން ކްލަބްގެ މެނޭޖްމަންޓަށް އެ ޓީމުގެ ކޯޗު ބްރޫނޯ ލާޖް އެންގުމާ ގުޅިގެންނެވެ.
ޗެލްސީ އާއި އެތުލެޓިކޯ މެޑްރިޑަށް ކުރިން ކުޅުނު ކޮސްޓާ ،33، އަށް އެންމެ ފުރަތަމަ ވޯކްޕާމިޓް ހަމަނުޖެހުނީ ކްލަބެއް ނެތި އޭނާ ދިގު މުއްދަތެއް ހޭދަކޮށްފައިވާތީ އާއި ޔޫރަޕުން ބޭރުގައި އެހެން ބައްރެއްގައި ކުޅެފައި، އަލުން ޔޫރަޕްގެ ކްލަބަކާ ގުޅެން ބޭނުންވާ ލިޔެކިޔުންތަކެއްގައި މައްސަލަތަކެއް ފާހަގަވެފައިވާތީ އެވެ. އެހެންކަމުން، ވުލްވްސް އިން ނިންމީ ކޮސްޓާ އަށް ވޯކް ޕާމިޓް ނުލިބުނު މައްސަލަ އެޕީލްކޮށްފަ އެވެ.
ވުލްވްސް އިން މިހާރު އެޕީލް ކާމިޔާބުކޮށް ކޮސްޓާގެ ވޯކްޕާމިޓް ކަންކަން ވަނީ ފުރިހަމަކޮށްފަ އެވެ. އަދި އެ ކްލަބާ ގުޅެން ކޮންޓްރެކްޓްގައި ސޮއިކުރުމުގެ ގޮތުން މެޑިކަލް ޓެސްޓްތައްވެސް ހަދައިފަ އެވެ.
ކޮސްޓާ އެންމެ ފަހުން ކުޅުނީ ބްރެޒިލްގެ އެތުލެޓިކޯ މިނެއިރޯ އަށެވެ. އެކަމަކު، ޖެނުއަރީ މަހު އެ ކްލަބު ދޫކޮށްލި ފަހުން އޭނާ ހުރީ އެއްވެސް ކްލަބަކާ ނުގުޅި އެވެ. ކޮސްޓާ އެންމެ ފަހުން ވާދަވެރި މެޗެއް ކުޅުނީ 2021 ވަނަ އަހަރުގެ ޑިސެމްބަރު މަހު އެވެ.
ކޮސްޓާ އަށް މިދިޔަ މަހު ލަލީގާގެ ރަޔޯ ވަޔަކާނޯގެ ހުށަހެޅުމެއް ލިބިފައިވާ ކަމަށް ސްޕެއިންގެ މީޑިއާ ރިޕޯޓްތަކުން ވަނީ ބުނެފަ އެވެ. އަދި މިދިޔަ މެއި މަހު އިންޑިއާގެ އޭޓީކޭ މޯހަން ބަގާން އިން ވެސް ކޮސްޓާ އަށް ކުރު ކޮންޓްރެކްޓެއް ހުށަހެޅި އެވެ.
