ނޭޕާލްގެ ކަތުމަންޑޫގައި މި މަހުގެ 6-19 އަށް ކުރިއަށްދާ އަންހެން ސާފް ޗެމްޕިއަންޝިޕުގައި ވާދަކުރުމަށް ރާއްޖޭގެ ގައުމީ އަންހެން ފުޓްބޯޅަ ޓީމު ފުރައިފި އެވެ.
ހަ ވަނަ އަންހެން ސާފް ޗެމްޕިއަންޝިޕުުގައި މިފަހަރު ހަތް ގައުމަކުން ވާދަކުރެ އެވެ. ރާއްޖެ ހިމެނިފައިވަނީ ޗެމްޕިއަން އިންޑިއާ، ބަންގްލަދޭޝް އަދި ޕާކިސްތާނާ އެކު ގްރޫޕް އޭގަ އެވެ. ގްރޫޕް ބީގައި ހިމެނެނީ މުބާރާތް ބާއްވާ ގައުމު ނޭޕާލް، ބޫޓާން އަދި ސްރީ ލަންކާ އެވެ.
ގައުމީ ފުޓްބޯޅަ ޓީމު ސާފް ޗެމްޕިއަންޝިޕަށް ތައްޔާރުވުމަށް ދުރާލާ ގިނަ ޕްރެކްޓިސްތަކެއް ކުރި އެވެ. އެ ގޮތުން ބޮޑު ސްކޮޑަކާ އެކު މިދިޔަ އަހަރުން ފެށިގެން ޕްރެކްޓިސް ކުރަމުން އައިސް މި އަހަރުގެ ކުރީކޮޅު މާލޭގައި އެކުވެރިކަމުގެ މެޗުތަކެއް ވެސް ކުޅެފައިވެ އެވެ. ސީޝެލްސް އާއި ސައުދީ އަރަބިއްޔާއާ ދެކޮޅަށް ކުޅުނު މެޗުތަކުގެ ތެރެއިން ރާއްޖެ ވަނީ ސީޝެލްސް އަތުން މޮޅުވެސް ވެފަ އެވެ.
އޭގެ ފަހުން ގައުމީ ޓީމްގެ ބައެއް ކުޅުންތެރިންނަށް އެކި ސަބަބުތަކާ ހުރެ ޓީމާއި ވަކިވާން ޖެހުމުން ގިނަ އާ ކުޅުންތެރިންތަކެއް ހިމަނައިގެން ގައުމީ ޓީމު ވަނީ މިދިޔަ ހަތަރު މަހު ރަނގަޅު ފަރިތަކުރުންތަކެއް ކޮށްފަ އެވެ. މި ފަހަރު އެކުލަވާލި ގައުމީ ޓީމުގައި އަތޮޅުތަކުން ފާހަގަކޮށްލެވުނު ކުޅުންތެރިން ގިނަ އެވެ.
ގައުމީ ޓީމްގެ ތައްޔާރީތަކާއި ގުޅޭގޮތުން އެސިސްޓަންޓް ކޯޗު މަރިޔަމް މިރުފަތު ބުނީ މުބާރާތަށް ތައްޔާރުވުމަށް ރަނގަޅު ފަރިތަކުރުންތަކެއް ކުރެވުނު ކަމަށެވެ. އަދި ކުޅުންތެރިންގެ ފަރާތުން ވެސް މި މުބާރާތުން ރަނގަޅު ނަތީޖާއެއް ހޯދަން ބޭނުންވާ މިންވަރު ފެނުނު ކަން މިރުފަތު ފާހަގަކުރި އެވެ.
މުބާރާތުގައި ޓީމުގެ ޓާގެޓަކީ މުބާރާތުގައި ކޮންމެ މެޗެއްގައިވެސް ރަނގަޅު ކުޅުމެއް ދައްކައި ރަނގަޅު ނަތީޖާއެއް ހޯދުންކަމަށް މިރުފަތު ބުންޏެވެ.
ވަރުގަދަ ގްރޫޕެއްގައި އޮތް ކަމުގައިވިޔަސް އުއްމީދަކީ ސެމީ ފައިނަލުން ޖާގަ ހޯދުންކަމަށް ވެސް މިރުފަތު ވަނީ ބުނެފަ އެވެ.
"މުބާރާތުން ކަމެއް ހާސިލްކުރަން ބޭނުންވާކަން ޕްރެކްޓިސްތަކުން ފެނުނު، އެކަން ވަރަށް ބޮޑަށް ފާހަގަވި. މިދިޔަ ހަތަރު ވަރަކަށް މަހު ކުރެވުނީ ރަނގަޅު ތަމްރީންތަކެއް" ގައުމީ ޓީމުގެ ކުރީގެ ކެޕްޓަން ބުންޏެވެ.
ރާއްޖެ މިފަހަރު އޮތީ ނިސްބަތުން ވަރުގަދަ ގްރޫޕެއްގަ އެވެ. ގްރޫޕުގައި ހިމެނޭ ޓީމްތަކުގެ ތެރެއިން އިންޑިއާ އަކީ މުބާރާތް ބޭއްވި ހުރިހާ ފަހަރެއްގެވެސް ޗެމްޕިއަން ޓީމެވެ. ބަންގްލަދޭޝް ވަނީ އެއް ފަހަރު ފައިނަލުގައި ވާދަކޮށްފަ އެވެ. ރާއްޖެ އަށް އަދި ސާފް ޗެމްޕިއަންޝިޕުގައި ބަންގްލަދޭޝް ބައްޔެއް ނުކުރެވެ އެވެ. ރާއްޖޭން ވަނީ 2016 ވަނަ އަހަރުގެ ސައުތު އޭޝިއަން ގޭމްސްގައި އިންޑިއާއާ އެއްވަރުކޮށްފަ އެވެ. ޕާކިސްތާނާއި ދެކޮޅަށް ދެ ފަހަރު ސާފް ޗެމްޕިއަންޝިޕުގައި ކުޅުނުއިރު، ދެ މެޗުވެސް ނިމުނީ ވާދަވެރި ނަތީޖާ އަކުންނެވެ.
އަންހެން ގައުމީ ފުޓްބޯޅަ ޓީމުން ވަނީ މީގެ ކުރިން ސަރަހައްދީ މުބާރާތްތަކުގައި ރަނގަޅު ކާމިޔާބީތަކެއް ހޯދާފަ އެވެ. ސާފް ޗެމްޕިއަންޝިޕަށް ބަލާއިރު އެޓީމަށް އެންމެ ދުރަށް ދެވުނީ 2016ގަ އެވެ. އެ ފަހަރު ސެމީ ފައިނަލުގައި ކުޅުނެވެ. އޭގެ ފަހުން 2019 ގައި ކުރިއަށް ދިޔަ ސައުތު އޭޝިއަން ގޭމްސްގައި ގައުމީ ޓީމުން ލޯ މެޑަލް ހޯދި އެވެ.
މި އަހަރުގެ ސާފް ޗެމްޕިއަންޝިޕުގައި ރާއްޖެ ކުޅޭ ފުރަތަމަ މެޗުގައި މި މަހުގެ ހަތް ވަނަ ދުވަހު ނުކުންނާނީ ވާދަވެރި ބަންގްލަދޭޝްއާ ދެކޮޅަށެވެ. ދެ ވަނަ މެޗުގައި 10 ވަނަ ދުވަހު އިންޑިއާއާ ވާދަކުރާއިރު، ގްރޫޕުގެ ފަހު މެޗުގައި ޕާކިސްތާނާއި ދެކޮޅަށް ނުކުންނާނީ ސެޕްޓެމްބަރު 13 ގަ އެވެ.
މި ފަހަރުގެ ލޯކަލް ފުޓްބޯޅަ ސީޒަނަށް ފަހު މީޑިއާ އަށް ދިން އިންޓަވިއުއެއްގައި އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ ބައެއް ކަހަލަ ދަތިތަކާ ހުރެ އަންހެން ގައުމީ ޓީމުގެ ފަރިތަކުރުންތައް އެންމެ ރަނގަޅަށް ކުރިއަށް ނުގެންދެވުނު ނަމަވެސް ޓީމުގެ ކުޅުންތެރިންނާއި ކޯޗިން ސްޓާފުން ކުރާ މަސައްކަތް ފާހަގަކުރާ ކަމަށެވެ.
