މި މަހު 5-14 އަށް ސްރީ ލަންކާގައި ކުރިއަށްދާ ސާފް 17 އަހަރުން ދަށުގެ ފުޓްބޯޅަ މުބާރާތުގައި ރާއްޖެ އާއި ބަންްގްލަދޭޝް އަދި ސްރީ ލަންކާ އެއް ގްރޫޕެއްގައި ވާދަކުރަން ޖެހިއްޖެ އެވެ.
އިސްމާއިލް އާސިފް (ކުޑަހީނާ) އާއި ގޯލްކީޕަރު އިމްރާން މުހައްމަދު އަދި އާފިއު މުހައްމަދު ހާމިދު، ކޯޗިން ޓީމުގައި ހިމެނޭ 17 އަހަރުން ދަށުގެ ގައުމީ ޓީމުން އިއްޔެ ވަނީ ސްރީ ލަންކާ އަށް ގޮސްފަ އެވެ. މި ޓީމުގެ ޕްރެކްޓިސްތައް ކުރިއަށް ގެންދިއުމާއި، ޓީމު އެކުލަވާލަން ލިބުނު އެންމެ ބޮޑު ފަސޭހަ އަކީ އެފްއޭއެމުން ދާދި ފަހުން 16 އަހަރުން ދަށަށް ހާއްސަކޮށް ބޭއްވި ޔޫތު ޗެމްޕިއަންޝިޕް އެވެ.
ޔޫތު ޗެމްޕިއަންޝިޕްގައި ފާހަގަވި ގިނަ ކުޅުންތެރިން ވަނީ ގައުމީ ޓީމަށް ނަގައިފަ އެވެ.
16 އަހަރުން ދަށުގެ ގައުމީ ޓީމުން ބޭއްވި ޕްރެކްޓިހެއްގެ ތެރެއިން.-- ފޮޓޯ: މުހައްމަދު ޝާބިން/ އަދަދު
މީގެ ކުރިން 15 އާއި 16 އަހަރުން ދަށަށް ބާއްވަމުން އައި މުބާރާތް މި ފަހަރު 17 އަހަރުން ދަށަށް ބަދަލުކޮށްގެން ކުރިއަށްދާއިރު، މި މުބާރާތުގައި މި ފަހަރު ހަ ޓީމެއް ވާދަކުރެ އެވެ. އެ ހަ ޓީމު ވަނީ ދެ ގްރޫޕަށް ބަހާލައިފަ އެވެ. ގްރޫޕް އޭގައި ލަންކާ އާއި ރާއްޖެ އަދި ބަންގްލަދޭޝް ހިމެނޭއިރު، ގްރޫޕް ބީގައި އޮތީ ތިން ފަހަރު ޗެމްޕިއަންކަން ހޯދި އިންޑިއާ އާއި ތިން ފަހަރު ރަނަރަޕަށް ދިޔަ ނޭޕާލްގެ އިތުރުން ބޫޓާން އެވެ. ކޮންމެ ގްރޫޕަކުން އެއް ވަނަ އާއި ދެ ވަަނަ ސެމީ ފައިނަލަށް ދަތުރުކުރާނެ އެވެ.
ސާފުން އެންމެ ފުރަތަމަ 2011 ވަނަ އަހަރު މި މުބާރާތް ބޭއްވިއިރު ރާއްޖޭން ބައިވެރިވި އެވެ. އެ ފަހަރު އިންޑިއާ އާއި ޕާކިސްތާނާ ވާދަކޮށް ދިޔައީ ގްރޫޕްގެ ފަހަތަށެވެ. ދެން، 2013 ވަނަ އަހަރު ބޭއްވިއިރު، ރާއްޖެ ވާދަނުކުރެ އެވެ. އޭގެ ފަހުން، 2015 ވަނަ އަހަރު އަފްގާނިސްތާނާއި ނޭޕާލާ އެއް ގްރޫޕެއްގައި ވާދަކޮށް ރާއްޖެ އަށް ގްރޫޕް ސްޓޭޖު ފަހަނައަޅައި ނުދެވުނެވެ. ނޭޕާލްގައި 2017 ވަނަ އަހަރު ހޯސްޓް ކުރި މުބާރާތުގައި، ރާއްޖޭން ނޭޕާލާއި އިންޑިއާއާ ވާދަކޮށް ކުރިއަށް ނުދެވުނެވެ. ޖެހިގެން އައި އަހަރު، ބަންގްލަދޭޝާއި ނޭޕާލާ އެއް ގްރޫޕެއްގައި ކުޅެގެން ވެސް ރާއްޖެ އަށް ގްރޫޕް ސްޓޭޖުން މުބާރާތް ނިމުނީ އެވެ.
އެންމެ ފަހުން 2019 ވަނަ އަހަރު އިންޑިއާގައި ކުރިއަށްދިޔަ މުބާރާތުގައި ރާއްޖެ ވާދަނުކުރެ އެވެ. އެ ފަހަރު އިންޑިއާ، ބަންގްލަދޭޝް، ބޫޓާން، ނޭޕާލް އަދި ސްރީ ލަންކާގެ މެދުގައި ލީގު ބުރެއް ކުޅުމަށް ފަހު، އެއް ވަނަ ދެ ވަނަ ކުޅުނީ ފައިނަލެކެވެ. ފައިނަލުގައި އިންޑިއާ އިން ވަނީ ނޭޕާލް 7-0 އިން ބަލިކޮށްފަ އެވެ.
16 އަހަރުން ދަށުގެ ގައުމީ ޓީމުން ބޭއްވި ފަރިތަކުރުމެއްގެ ތެރެއިން.
ރާއްޖޭން މި ފަހަރުގެ މުބާރާތުގައި ގްރޫޕް ސްޓޭޖު ފަހަނައަޅައި ދިއުމަށް ޓާގެޓް ކުރަން ޖެހޭނެ މެޗަކީ ލަންކާ މެޗެވެ. ރާއްޖޭން ފުރަތަމަ މެޗުގައި ހަތް ވަނަ ދުވަހު ބަންގްލަދޭޝާ ކުޅުމަށް ފަހު އެއް ދުވަސް ފަހުން، ލަންކާއާ ކުޅޭނެ އެވެ. މެޗުތައް ކުޅޭނީ ކޮލަމްބޯގެ ރޭސްކޯސް ސްޓޭޑިއަމްގަ އެވެ. މިއީ މިދިޔަ އަހަރު ނޮވެމްބަރު މަހު، ލަންކާ އިން ކުރިއަށްގެންދިޔަ، ފޯ ނޭޝަންސް ޓޯނަމެންޓްގެ މެޗުތައް ކުޅުނު ދަނޑެވެ.
16 އަހަރުން ދަށުގެ ގައުމީ ސްކޮޑު
އަބްދުﷲ ރަޒީފް މުހައްމަދު، އަހުމަދު އަކްމަލް ނިޒާމް، އަހުމަދު އަޒުލާން އަލީ، އަހުމަދު ހަމްދާން އަޒްލީން، އަހުމަދު ރާއިފް ނަސީމް، ހުސެއިން އާއިޝް އަބްދުލް ވާހިދު، ހުސެއިން ޔަމީން، ލަހުފާން އަހުމަދު ޝަހީމް، މުހައްމަދު އައިހަމް އިބްރާހިމް، މުހައްމަދު އައިމަން އަލީ، މުހައްމަދު އަޔާޝް އަޝްރަފް، މުހައްމަދު ޖޫދު އަޝްފާގު، މުހައްމަދު ރަޒާން، މުހައްމަދު ރާއިފް ރާޝިދު، އަގްސަން އަހުމަދު ނަސީމް، ޔޫސުފް ނަމިކް އަލީ ނަސީރު، ހަސަން ނާވީ، އައިދާން އަހުމަދު މޫސާ، މުހައްމަދު ނާމީ ނަޒީފް، މުހައްމަދު ޝައްފާން، ޒާދު މުހައްމަދު ހާލިދު، އަހުމަދު އަތުވާން އަލީ އަދި މުހައްމަދު އުނައިސް ބިން ނޫހު
