ލަންޑަން (އޮގަސްޓް 31) - އިނގިރޭސި ޕްރިމިއާ ލީގުގައި ރޭ ސައުތެމްޓަނުން ފަހަތުން އަރައި 2-1 އިން ޗެލްސީ ބަލިކޮށްފި އެވެ.
މިއީ މި ފަހަރުގެ ސީޒަނުގައި ޗެލްސީ ކުޅުނު ފަސް މެޗުގެ ތެރެއިން ބަލިވި ދެ ވަނަ ފަހަރެވެ. މީގެ ކުރިން ރަށުންބޭރުގައި ލީޑްސް ޔުނައިޓެޑް އަތުން ވެސް ވަނީ ބަލިވެފަ އެވެ. ޗެލްސީ އޮތީ ފަސް މެޗުން ހަތް ޕޮއިންޓާ އެކު ލީގުގެ ހަތް ވަނައިގަ އެވެ.
ސައުތެމްޓަން ދަނޑުގައި ރޭ ކުޅުނު މެޗު ފަށައިގެން 23 ވަަނަ މިނިޓްގައި ޗެލްސީ އަށް ލީޑުނަގައިިދިނީ ރަހީމް ސްޓާލިން އެވެ. ސައުތެމްޓަން އޭރިއާތެރެއިން ލިބުނު ބޯޅައެއް ސްޓާލިން ވަނީ އެ ޓީމުގެ ޑިފެންޑަރުންނަށް ސަލާމަތް ނުކުރެވުނު ވަގުތެއްގައި ގޯލުގެ ތެެރެއަށް ބޯޅަ ފޮނުވާލައިފަ އެވެ.
ޗެލްސީން ލީޑުނެގިތާ ފަސް މިނިޓް ފަހުން ސައުތެމްޓަނުން ވަނީ އެއްވަރުކޮށްފަ އެވެ. މި ގޯލު ޖެހީ ރޮމެއޯ ލަވީއާ އެވެ. މެޗުގެ 28 ވަނަ މިނިޓްގައި ޗެލްސީ އަށް ސައުތެމްޓަންގެ ކޯނަރެއް ރަނގަޅަށް ޑިފެންސް ނުކުރެވިގެން، އޭރިއާ ރޮނގުކައިރިން ލަވިއާ އަށް ލިބުނު ބޯޅަ އޭނާ ހަމަޖެހިލާފައިވަނީ ކީޕަރު އެޑޮއާޑް މެންޑީ އަތުގައި ޖައްސާފައި ގޯލަށް ބޯޅަ ފޮނުވާލައިފަ އެވެ.
ފުރަތަމަ ހާފުގެ އިތުރު ވަގުތުގައި ސައުތެމްޓަނުން ވަނީ ލީޑުނަގައިފަ އެވެ. ސައުތެމްޓަންގެ މި ގޯލު ޖެހީ ރޮމޭން ޕެރޯ ދިން ބޯޅައަކުން އޭރިއާތެރެއިން އެޑަމް އާމްސްޓްރޯންގް އެވެ. އާމްސްޓްރޯންގް ޖެހި ބޯޅަ ގޯލަށް ވަނީ ޗެލްސީގެ ޑިފެންޑަރު ކަލީދޫ ކުލިބާލީ ގައިގައި ޖެހިފަ އެވެ.
ޗެލްސީ އަށް އެއްވަރުކޮށްދޭން ދެ ވަނަ ހާފުގައި ކައި ހަވާޓްޒް ބޮލުން ޖެހި ބޯޅައެއް ހުރަސްދަނޑިމަތިން ދިޔައިރު، އަރްމާންޑޯ ބްރޯޖާ ބޮލުން ފޮނުވާލި ބޯޅަ ސައުތެމްޓަންގެ ކީޕަރު ގަވިން ބަޒޫނޫ ވަނީ މަތަކޮށްފަ އެވެ.
ލީގުގައި ރޭ ކުޅުނު އެހެން މެޗުތަކުގެ ނަތީޖާ އަށް ބަލާއިރު، ކްރިސްޓަލް ޕެލަސް އާއި ބްރެންޓްފޯޑް ވަނީ 1-1 އިން އެއްވަރުވެފަ އެވެ. އެވަޓަނުން ލީޑުނެގި މެޗު ލީޑްސް ޔުނައިޓެޑުން ވެސް ނިންމާލީ 1-1 އިން އެއްވަރުކޮށްގެންނެވެ. ފުލަމް އިން ވަނީ އަމިއްލަ ދަނޑުގައި 2-1 އިން ބްރައިޓަން ބަލިކޮށްފަ އެވެ.
