ބާސެލޯނާ (އޮގަސްޓް 29) - ސްޕެނިޝް ލީގުގައި ރޭ ރޮބަޓް ލެވަންޑޯސްކީގެ ދެ ގޯލާ އެކު 4-0 އިން ރެއާލް ވަލޮޑޮލިޑް އަތުން ބާސެލޯނާ މޮޅުވިއިރު، އެންމެ ފަހުގެ ޗެމްޕިއަން ރެއާލް މެޑްރިޑުން 3-1 އިން އެސްޕަންޔޯލް ބަލިކޮށް، މި ފަހަރު ލީގުގައި ކުޅުނު ތިން ވަނަ މެޗުން ވެސް މޮޅުވެއްޖެ އެވެ.
ސްޕެނިޝް ލީގުގެ އާ ސީޒަނުގައި ތިން މެޗު ނިމުނުއިރު، ފުރިހަމަ ރެކޯޑަކާ އެކު އޮތީ އެއް ވަނައިގައި އޮތް ރެއާލާއި ދެ ވަނައިގައި އޮތް ރެއާލް ބެޓިސް އެވެ. ދެ ޓީމަށް ވެސް ވަނީ 9 ޕޮއިންޓް ލިބިފަ އެވެ. ތިން ވަނައިގައި އޮތް ބާސެލޯނާ އާއި ހަތަރެއްގައި އޮތް ވިޔަރެއާލަށް ވަނީ ހަތް ޕޮއިންޓް ލިބިފަ އެެވެ. ވިޔަރެއާލް ވަނީ ރޭ ލަނޑެއް ނުޖެހި 0-0 އިން ގެޓަފޭއާ އެއްވަރުވެފަ އެވެ.
އެސްޕަންޔޯލް ދަނޑުގައި ރޭ ކުޅުނު މެޗުގެ 12 ވަނަ މިނިޓްގައި ރެއާލަށް ލީޑުނަގައިދިނީ ވިނީޝިއުސް ޖޫނިއާ އެވެ. ރެއާލްގެ މިޑްފީލްޑަރު، އައުރެލިން ޗުއަމެނީ ދިން ބޯޅައަކުން ވިނީޝިއުސް ވަނީ އޭރިއާތެރެއިން ގޯލުގެ ދުރު ކަނަށް ބޯޅަ ފޮނުވާލައިފަ އެވެ. ފުރަތަމަ ހާފު ނިމުމުގެ ކުރިން ރެއާލް ޑިފެންސް ތެރެއިން ލިބުނު ހުސް ފުރުސަތެއްގައި ގޯލު ޖަހައި، ހޮސޭލޫ ވަނީ އެސްޕަންޔޯލަށް ނަތީޖާ ހަމަހަމަކޮށްދީފަ އެވެ.
މެޗުގެ 65 ވަނަ މިނިޓްގައި ކަރިމް ބެންޒެމާ ރެއާލަށް ލަނޑެއް ޖަހައިދިން ނަމަވެސް ރެފްރީ ނިންމީ އޮފްސައިޑް ގޯލެއް ކަމަށެވެ. އެކަމަކު، މެޗުގެ 88 ވަނަ މިނިޓްގައި ރޮޑްރީގޯ ނަގައިިދިން ބޯޅައަށް ރަނގަޅު ތަނަށް ހުސްވެ، ގޯލުގެ ކަނަށް ބޯޅަ ފޮނުވާލައި، ބެންޒެމާ ވަނީ ރެއާލަށް އަލުން ލީޑުނަގައިދީފަ އެވެ.
ރެއާލްގެ ބެންޒެމާ (ވ) އެސްޕަންޔޯލްގެ ގޯލާ އަމާޒުކޮށް ހަމަލާއެއް ފޮނުވާލަނީ.--- ފޮޓޯ: އޭއެފްޕީ
އިތުރު ވަގުތުގެ ހަ ވަނަ މިނިޓްގައި އެސްޕަންޔޯލް ކީޕަރު ބެންޖަމިން ލެކޮމްޓޭ، އޭރިއާ އިން ބޭރަށް ނުކުމެ ކުރި ފައުލަކަށް ވަނީ ރަތް ކާޑެއް ދައްކައިފަ އެވެ. އޭރު އެސްޕަންޔޯލުން ތިން ބަދަލުކޮށްފައިވާތީ ގޯލަށް އެރީ ޑިފެންޑަރު، ލެއަންޑްރޯ ކަބްރޭރާ އެވެ. ލެކޮމްޓޭ ކުރި ފައުލަށް ލިބުނު ހިލޭ ޖެހުން ބެންޒެމާ ވަނީ ގޯލަށް ފޮނުވާލައި، ރެއާލަށް ތިން ޕޮއިންޓް ޔަގީންކޮށްދީފަ އެވެ.
ބާސެލޯނާ ދަނޑުގައި ރޭ ކުޅުނު މެޗު ފަށައިގެން 12 ވަނަ މިނިޓްގައި ރަފީނިއާ ނެގި ހުރަހަކުން ލެވަންޑޯސްކީ ބޮލުންޖެހި ބޯޅަ އަމާޒުވީ ގޯލުގެ ދަނޑިއަށެވެ. އެކަމަކު، މެޗުގެ 24 ވަނަ މިނިޓްގައި ރަފީނިއާ ނެގި ހުރަހަކުން ލެވަންޑޯސްކީ ވަނީ ބާސެލޯނާ އަށް ލީޑުނަގައިދީފަ އެވެ. ފުރަތަމަ ހާފު ނިމުމުގެ ކުރިން އޮސްމާން ޑެމްބެެލޭ އޭރިއާތެރެއިން ހުސްކޮށްލާފައި ދިން ބޯޅަ ޕެޑްރީ ވަނީ ހަމަޖެހިލާފައި ގޯލަށް ފޮނުވާލައި، ބާސެލޯނާގެ ލީޑުފުޅާކޮށްދީފަ އެވެ.
މެޗުގެ 65 ވަނަ މިނިޓްގައި ލެވަންޑޯސްކީ ވަނީ ބާސެލޯނާގެ ތިން ވަނަ ގޯލު ޖަހައިފަ އެވެ. މިއީ ޑެމްބެލޭ ދިން ބޯޅައަކަށް އޭރިއާތެރެއިން ހުސްކޮށް އަރައި، ލެވަންޑޯސްކީ ޖެހި މޮޅު ގޯލެކެވެ. އޭގެ ހަތަރު މިނިޓް ފަހުން ވަލޮޑޮލިޑުން ގޯލެއް ޖަހަން ފޮނުވާލި ބޯޅައެއް ބާސެލޯނާގެ ޑިފެންޑަރު، ޖޫލްސް ކޫންޑޭ ވަނީ ގޯލު ރޮނގުމަތިން ސަލާމަތްކޮށްފަ އެވެ.
ލެވަންޑޯސްކީ ހެޓްރިކް ފުރިހަމަ ކުރަން މެޗުގެ އިތުރު ވަގުތުގައި ލިބުނު ފުރުސަތުން ފޮނުވާލި ބޯޅަ އަމާޒުވީ ގޯލުގެ ހުރަސްދަނޑިއަށެވެ. އެ ބޯޅަ އެނބުރި ކުޅުމަށް އައި ވަގުތު، އޭރިއާތެރޭގައި ހުރި ބާސެލޯނާގެ ސާޖީ ރޮބާޓޯ ވަނީ ގޯލަށް ބޯޅަ ފޮނުވާލައި، ބާސެލޯނާގެ ހަތަރު ވަނަ ގޯލު ޖަހައިފަ އެވެ.
