ޕެރިސް (އޮގަސްޓް 29) - ގޭންގަކުން ޔުވެންޓަސް އަށް ކުޅޭ ފްރާންސްގެ މިޑްފީލްޑަރު ޕައުލް ޕޮގްބާ ބްލެކްމެއިލްކޮށް އޭނާ އަތުން ފައިސާ ހޯދަން އުޅޭ މައްސަލައެއް ފްރާންސްގެ ފުލުހުން ބަލަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
ފްރާންސްގެ ފުލުހުންނަށް އުމުރުން 29 އަހަރުގެ ޕޮގްބާ ބްލެކްމެއިލް ކުރާ މައްސަލަ ހުށަހަޅަން ނިންމީ އޭނާގެ ބޭބެ މަތިއަސް ޕޮގްބާ ސޯޝަލް މީޑިއާގައި ތަފާތު ވާހަކަތަކެއް ދައްކާ ވީޑިއޯއެއް ލީކުވުމާ ގުޅިގެންނެވެ. ފްރެންޗް، އިޓަލީ، އިނގިރޭސި އަދި ސްޕެއިން ބަހުން ވާހަކަ ދައްކާ އެ ވީޑިއޯގައި ޕޮގްބާގެ ކެރިއަރާ ގުޅޭ މުހިންމު އާންމުންނަށް އެނގެން ޖެހޭ ސިއްރު ވާހަަކަތަކެއް ހިއްސާ ކުރާނެ ކަމަށް ބުނެފައިވެ އެވެ.
ލީކުވި އެ ވީޑިއޯއާ ގުޅިގެން، ޕޮގްބާ އާއި އޭނާގެ މަންމަ ޔެއޯ މޮރީބާ އާއި ޕޮގްބާގެ މިހާުރުގެ އޭޖެންޓް، ރަފައެއްލާ ޕިއެމަންޓާ ސޮއިކޮށް ނެރެފައިވާ ބަޔާނެއްގައި ބުނެފައިވަނީ އެ ފަދަ ވާހަކަތަކެއް ދައްކާ ވީޑިއޯއެއް ލީކުވުމަކީ "ވާނެ ކަމެއް" ކަމަށް ކުރިން ވެސް ބެލެވުނު ކަމަށެވެ.
"ޕޮގްބާއާ ދެކޮޅަށް ރޭވިގެން ބޮޑު ކަންތައްތަކެއް މި ހިނގަނީ، ފައިސާ ހޯދަން ބޭނުންވެގެން ކުރާ ކަމެއް މިއީ، މި މައްސަލައިގައި ފުލުހުންގެ ތަހުގީގު ކުރިއަށްދާތީ، އިތުރު ވާހަކައެއް ދައްކަން ނެތިން،" ބަޔާނުގައި ބުނެފައިވެ އެވެ.
މި މައްސަލަ ތަހުގީގު ކުރަނީ އިޓަލީ އާއި ފްރާންސްގެ ފުލުހުން ގުޅިގެންނެވެ.
ޕޮގްބާ ޔުވެންޓަސް ކުޅުންތެރިއެއްގެ ގޮތުގައި މީޑިއާ އަށް ތައާރަފްކުރުމުގެ ތެރެއިން.-- ފޮޓޯ: އޭއެފްޕީ
ޕޮގްބާގެ ބޭބެ، މަތިއަސް، 32، ގެ ފަރާތުން ލީކުވި އެ ވީޑިއޯގައި ބުނެފައިވަނީ ޕޮގްބާ އާއި އޭނާގެ އޭޖެންޓް، ޕިއެމަންޓާ ގުޅިގެން ކުރަމުން އަންނަ ގިނަ ކަންތައްތަކެއްގެ ވާހަކަ އާންމުކުރާނެ ކަމަށެވެ. ޕިއެމަންޓާ، ޕޮގްބާގެ އޭޖެންޓް ކަމާ ހަވާލުވީ ކުރީގެ އޭޖެންޓް މިނޯ ރައިއޯލާ މިިދިޔަ އޭޕްރީލް މަހު މަރުވި ފަހުންނެވެ.
ލީކުވި ވީޑިއޯ އަށް ގިނަ ބަޔެއްގެ ސަމާލުކަން ހުއްޓުނީ އޭގެ ދައްކާފައިވާ ބައެއް ވާހަކަތަކަކުންނެވެ. އެ ގޮތުން ޕޮގްބާގެ ހަގީގަތް އާންމުންނަށް އެނގެން ޖެހޭ އެންމެ ބޮޑު ސަބަބަކީ އޭނާ އަކީ ފްރާންސް ގައުމީ ޓީމަށް ވޯލްޑް ކަޕްގައި ކުޅެން އެކަށީގެންވާ މީހެއްތޯ ނޫނީ ޔުވެންޓަސް ޓީމަށް ވެސް ގަވާއިދުން އަރަން ޖެހޭ މީހެއްތޯ އެ ވީޑިއޯގައި ވަނީ ސުވާލު އުފައްދައިފަ އެވެ.
ޕޮގްބާއާ ގާތް ފަރާތްތަކާ ހަވާލާދީ މީޑިއާ އިން ރިޕޯޓްކޮށްފައިވާ ގޮތުގައި މި ވާހަކަތައް ކިޔައިދޭ އިތުރު ވީޑިއޯތައް ލީކުނުކޮށްލަން ޕޮގްބާގެ ފަރާތުން ވަނީ ގޮތްނޭނގޭ ގްރޫޕަކުން ފައިސާ ހޯދަން ޑިމާންޑްތަކެއް ކޮށްފަ އެވެ. ޕޮގްބާ ވަނީ އެ ޑިމާންޑްތަކުގެ ވާހަކަތައް ފްރާންސް ފުލުހުންނަށް ހިއްސާކޮށްފަ އެވެ.
ހަ އަހަރު މެންޗެސްޓާ ޔުނައިޓެޑަށް ކުޅުމަށް ފަހު ޕޮގްބާ އަލުން ޔުވެންޓަސްއާ ގުޅުނީ މި ފަހަރުގެ ޓްރާންސްފާ މާކެޓްގައި ހިލޭ ޑީލެއްގެ ދަށުންނެވެ. ޕޮގްބާގެ ކަނާތު ކަކުލަށް ލިބުނު އަނިޔާއަކާ ގުޅިގެން މި ވަގުތު އޭނާ ހުރީ ކުޅުމާ ދުުރުގަ އެވެ. އަންނަ މަހު އޭނާ ކުޅުމަށް އެނބުރި އަންނާނެ ކަމަށް ޔުވެންޓަސް އިން ވަނީ މީގެ ކުރިން މައުލޫމާތު ދީފަ އެވެ.
