ޖެނީވާ، ސްވިޒަލެންޑް (އޮގަސްޓް 27) - މީގެ ތިން އަހަރު ކުރިން ފްރާންސްގެ ނޯންޓްސް ދޫކޮށް ކާޑިފް ސިޓީ އަށް ބަދަލުވުމަށް ފަހު، އެ ޓްރާންސްފާ ނިންމަން، ޕްރައިވެޓް ޖެޓެއްގައި ދަތުރު ކުރަނިކޮށް، އެ ޖެޓް ވެއްޓިގެން މަރުވި އާޖެންޓީނާގެ ފޯވާޑް އެމިލިއާނޯ ސަލާގެ ޓްރާންސްފާ ފީގެ ފުރަތަމަ އިންސްޓޯލްމަންޓް ދައްކަން ކާޑިފުން ޖެހޭނެ ކަމަށް ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) އިން ނިންމައިފި އެވެ.
ވޭލްސްގެ ކްލަބް، ކާޑިފުން ސަލާގެ ސޮއި ހޯދާފައިވާކަން އިއުލާންކުރީ 2019 ވަަަނަ އަހަރުގެ ޖެނުއަރީ 19 ވަނަ ދުވަހު އެވެ. އޭގެ ދެ ދުވަސް ފަހުން، ސަލާ ދަތުރުކުރި ޖެޓް އިނގިރޭސި ޗެނަލްގެ ތެރެއަށް ވެއްޓި، އޭނާ މަރުވި ހާދިސާ ހިނގި އެވެ.
ސަލާ އަށް ދަތުރުފަތުރު ކުރުމުގެ ކަންތައްތައް ކާޑިފުން ހަމަޖައްސައި ނުދޭތީ ނޯންޓްސް އިން ވަނީ އެންމެ ފުރަތަމަ ވެސް ކަންބޮޑުވުން ފާޅުކޮށްފަ އެވެ. ކާޑިފުން އެ ކަމާބެހޭ ގޮތުން ބުނީ ސަލާގެ އޭޖެންޓް ނިންމީ އަމިއްލަ އަށް ދަތުރުފަތުރުގެ ކަންކަން ހަމަޖެއްސުމަށް ކަމަށެވެ.
އުމުރުން 28 އަހަރުގެ ސަލާ ގަންނަން ކާޑިފުން ކްލަބްގެ ރެކޯޑް އަގެއް ކަމަށްވާ 19 މިލިއަން ޑޮލަރު ދޭން ނިންމި އެވެ. އެއީ އެ ފަހަރު ޕްރިމިއާ ލީގުގެ ރެލިގޭޝަނުން ސަލާމަތް ވުމަށެވެ. އެކަމަކު، ސަލާގެ ޓްރާންސްފާ ކަންކަން އެއްކޮށް ނުނިމޭތީ، ކާޑިފުން ނޯންޓްސް އަށް އެއްވެސް އަގެއް ދޭން ދެކޮޅު ހެދި އެވެ. އެކަމާ ހިތްހަމަނުޖެހި ނޯންޓްސް އިން އެ މައްސަލަ ފީފާ އަށް ހުށަހެޅި އެވެ.
މި މައްސަލަ ފީފާގެ ޕްލޭޔާ ސްޓޭޓަސް ކޮމިޓީން ބެލުމަށް ފަހު ކާޑިފަށް އެންގީ 2019 ވަނަ އަހަރުގެ ސެޕްޓެމްބަރު މަހު ފުރަތަމަ އިންސްޓޯލްމަންޓް ފީ އެއްގެ ގޮތުގައި 6.9 މިލިއަން ޑޮލަރު ދެއްކުމަށެވެ. އެކަަމަކު، އެ ނިންމުމާ މެދު ހިތްހަމަނުޖެހޭތީ، ކާޑިފުން ނިންމީ ކޯޓަށް ދާށެވެ. އެހެންވެ، ކާސް އަށް ހުށަހެޅި އެވެ.
ކާޑިފުން އެ މައްސަލަ 2019 ވަނަ އަހަރުގެ ނޮވެމްބަރު މަހު ކާސްގައި އެޕީލްކުރި ނަމަވެސް މިދިޔަ އަހަރުގެ ނިޔަލަށް އެ މައްސަލައިގެ އެންމެ އަޑު އެހުމެއް ވެސް ތާވަލުނުކުރެވުނެވެ. އެންމެ ފަހުން، ކާސްގެ ތިން މެމްބަރުންގެ ޕެނަލަކުން ވަނީ ސަލާގެ މި މައްސަލައިގައި މި އަހަރު މާޗް މަހުގެ ފުރަތަމަ ހަފްތާ ތެރޭގައި އަޑުއެހުންތައް ބާއްވައިފަ އެވެ.
ކާސް އިން މައްސަލަ ބެލުމަށް ފަހު ނިންމީ ފީފާގެ ޕްލޭޔާ ސްޓޭޓަސް ކޮމިޓީން ނިންމި ނިންމުން ދެމެހެއްޓުމަށެވެ. އަދި ކާޑިފަށް ފީފާ އިން ދީފައިވާ މުހުލަތުގެ ތެރޭގައި ނޯންޓްސް އަށް އެ އިންސްޓޯލްމަންޓް ފީ ނުދައްކައިފިނަަމަ ފީފާ އިން އޮންނަ ގަވާއިދުގެ ތެރެއިން ކާޑިފަށް ފިޔަވަޅު އެޅޭނެ ކަމަށް ވެސް ކާސް އިން ވަނީ ނިންމައިފަ އެވެ.
ފީފާ އިން ވަނީ މި މައްސަލައިގައި ކާޑިފުން އަމަލުނުކޮށްފިނަމަ އެ ކްލަބަށް ކުޅުންތެރިން ރަޖިސްޓްރީ ނުކުރެވޭ ގޮތަށް ތިން ޓްރާންސްފާ މާކެޓަށް ސަސްޕެންޝަނެއް ދޭން ނިންމައިފަ އެވެ.
