އެމްޓީސީސީ ނޯތު ލީގުގެ ދެ ވަނަ ޑިވިޝަނުގެ ގްރޫޕް ޑީގައި މިއަދު ކުޅުނު މެޗުން ރ. އުނގޫފާރާއި ރ. ދުވާފަރު ބައްދަލުކުރި މެޗު 2-2 އިން އެއްވަރުވެއްޖެ އެވެ.
ތިން ޓީމުގެ މެދުގައި ރ. އަލިފުށީގައި ކުރިއަށްދާ ނޯތު ލީގު ދެ ވަނަ ޑިވިޝަނުގެ ގްރޫޕް ޑީގެ ފުރަތަމަ މެޗުން އަލިފުށްޓާއި ދުވާފަރުގެ މެޗު ވެސް ވަނީ 2-2 އިން އެއްވަރުވެފަ އެވެ. މި ގްރޫޕްގެ ދެ ވަނަ މެޗު ވެސް މި ވަނީ އެއްވަރުވެފަ އެވެ.
އަލިފުށްޓާއި ދުވާފަރު އަދި އުނގޫފާރު، ކޮންމެ ޓީމެއް ކޮންމެ ޓީމެއް ދެ ފަހަރު ކުޅެގެން އެންމެ ގިނަ ޕޮއިންޓް ހޯދާ ދެ ޓީމަކަށް ނޯތު ލީގު ފުރަތަމަ ޑިވިޝަނުގެ ބާކީ ދެ ޖާގަ ލިބޭނެ އެވެ.
އަލިފުށީ ޓާފް ދަނޑުގައި މިއަދު ހަވީރު ކުޅުނު މެޗުގައި ލީޑުނެގީ މުހައްމަދު ޝިޔާޒް (މޯހަން)ގެ ކޯޗުކަމުގައި ކުޅެމުން އަންނަ އުނގޫފާރު ޓީމުންނެވެ. އެ ޓީމުގެ ގޯލު ޖެހީ މެޗުގެ 26 ވަނަ މިނިޓްގައި އުޒްބެކިސްތާންގެ މިޑްފީލްޑަރު އުމަރުޔޯނޯފް އަހްރޯރް އެވެ. ދުވާފަރު ފަހަތުން ހެދި ގޯހެއްގެ ފައިދާނަގައި އުނގޫފާރު ކުޅުންތެރިއަކު އޭރިއާ ތެރެއިން ހުސްކޮށްލާފައި އަހްރޯރަށް ދިން ބޯޅަ އޭނާ ވަނީ ހަމަޖެހިލާފައި ގޯލުގެ ދުުރު ކަނަށް ފޮނުވާލައިފަ އެވެ. އަހްރޯރަކީ ކުރިން ފުރަތަމަ ޑިިވިޝަނުގައި އީގަލްސް އާއި ދަ ގްރާންޑޭ އަށް ކުޅެފައިވާ ކުޅުންތެރިއެކެވެ.
މެޗުގެ 34 ވަނަ މިނިޓްގައި ދުވާފަރުން ވަނީ ނަތީޖާ ހަަމަހަމަކޮށްފަ އެވެ. އޭރިއާތެރެއިން ދުވާފަރު ޓީމުގެ މުހައްމަދު އަލީ އަށް ހުސްކޮށް ލިބުނު ބޯޅަ އޭނާ ވަނީ ހަމަޖެހިލާފައި ގޯލުގެ ދުރު ކަނަށް ފޮނުވާލައިފަ އެވެ. އީގަލްސްގެ ހެޑް ކޯޗުގެ ޒިންމާ މި ސީޒަނުގައި އަދާކުރި އަހުމަދު ނިމާދު (ނިމާ)ގެ ކޯޗުކަމުގައި ކުޅޭ ދުވާފަރުން ވަނީ މެޗުގެ 57 ވަނަ މިނިޓްގައި ލީޑުނަގައިފަ އެވެ. މި ގޯލު ޖެހީ އޭރިއާތެެރެއިން ލިބުނު ހުސް ފުރުސަތަކުން އެ ޓީމުގެ މުހައްމަދު ޖުމާން އެވެ.
ދުވާފަރުން ތިން ވަނަ ގޯލެއް ޖަހައި ލީޑުފުޅާކުރުމުގެ އަމާޒުގައި ކުރިއަށް ޖެހިގެން ކުޅެނިކޮށް، މެޗުގެ 69 ވަނަ މިނިޓްގައި އުނގޫފާރުން ވަނީ ގޯލެއް ޖަހައި ނަތީޖާ ހަަަަމަހަމަކޮށްފަ އެވެ. މިއީ ހާފުގެ މެދެއްހާ ހިސާބުން އުނގޫފާރުގެ އަހްރޯރް ދުވާފަރުގެ ޑިފެންސް ފަހަތަށް މަތިން ޖެހި ބޯޅައެއް ހޯދައި، އުނގޫފާރުގެ އާތިފް އިގްބާލް ޖެހި ގޯލެކެވެ. އޭނާ ވަނީ ތިރިތިރިން ގޯލުގެ ތެރެއަށް ބޯޅަ ފޮނުވާލައިފަ އެވެ.
އިތުރު ގޯލެއް ޖަހައި، މެޗުން މޮޅުވާން ދެ ޓީމުން ވެސް މަސައްކަތް ކުރި އެވެ. އެކަމަކު، އެއްވެސް ޓީމަކަށް ތިން ވަަނަ ގޯލެއް ނުޖެހި މެޗު އެއްވަރުވެގެން ނިމުނީ އެވެ.
ނޯތު ލީގުގެ ދެ ވަނަ ޑިވިޝަނުގެ ގްރޫޕް ޑީގައި ދެން ކުޅޭ މެޗުގައި ބައްދަލުކުރާނީ އަލިފުށްޓާއި އުނގޫފާރު އެވެ. އެ މެޗު އޮތީ އަންނަ އާދިއްތަ ދުވަހު ހަވީރު އެވެ.
