އިސްތަންބޫލް، ތުރުކީ (އޮގަސްޓް 25) - ޔުއެފާ ޗެމްޕިއަންސް ލީގުގައި އާ ސީޒަނުގައި ބާސެލޯނާ އާއި ބަޔާން މިއުނިކް އަދި އިންޓަ މިލާން އެއް ގްރޫޕެއްގައި ވާދަކުރަން ޖެހިއްޖެ އެވެ.
މިދިޔަ އަހަރު ބާސެލޯނާ އާއި ބަޔާން އެއް ގްރޫޕެއްގައި ހިމެނުނުއިރު، ބާސެލޯނާ ވަނީ ގްރޫޕް ސްޓޭޖުން ކަޓައިފަ އެވެ. އިންޓަ މިލާނުން މީގެ ކުރިން ބާސެލޯނާއާ އެއް ގްރޫޕްގައި ވާދަކޮށް ގްރޫޕް ސްޓޭޖުން ކަޓާފައިވެ އެވެ. މި ފަހަރު ބާސެލޯނާ އާއި ބަޔާންގެ މެޗު އެންމެ ހާއްސަވާނެ ކުޅުންތެރިއަކީ އަށް ވަރަކަށް އަހަރު ބަޔާނަށް ކުޅުމަށް ފަހު މި ފަހަރު ބާސެލޯނާ އަށް ބަދަލުވި ރޮބަޓް ލެވަންޑޯސްކީ އެވެ. ލެވަންޑޯސްކީ މި ފަހަރުގެ މުބާރާތުގައި ކުރީގެ ޓީމާ ދެކޮޅަށް ކުޅޭނެ އެވެ.
ގްރޫޕް ސީގައި ބާސެލޯނާ އާއި ބަޔާން އަދި އިންޓަގެ އިތުރުން ދެން އޮތީ ޗެކް ރިޕަބްލިކްގެ ވިކްޓޯރިއާ ޕްލެޒެން އެވެ.
ދެން އެންމެ ވަރުގަދަކޮށް ފެންނަ ގްރޫޕަކީ ގްރޫޕް އެޗް އެވެ. އެ ގްރޫޕްގައި ހިމެނެނީ ޕީއެސްޖީ، ޔުވެންޓަސް، ބެންފީކާ އަދި އިޒްރޭލުގެ މެކަބީ ހައިފާ އެވެ. ޔުވެންޓަސް އިން 1996 ގެ ފަހުން ފުރަތަަމަ ފަހަރަށް ޗެމްޕިއަންސް ލީގު ހޯދަން މަސައްކަތް ކުރަމުން އަންނައިރު، ޕީއެސްޖީން ބޮޑު ހަރަދުކޮށް އެންމެ ބޮޑަށް ބޭނުންވަނީ އެ ކްލަބްގެ ތާރީހުގައި ފުރަތަމަ ފަހަރަށް ޗެމްޕިއަންސް ލީގު ހޯދުމަށެވެ. މި ފަހަރުގެ ޓްރާންސްފާގައި ޕީއެސްޖީގެ އެންހެލް ޑި މާރިއާ ވަނީ އެ ކްލަބް ދޫކޮށް ޔުވެންޓަސްއާ ގުޅިފަ އެވެ. އޭނާ މި ފަހަރު ކުރީގެ ޓީމާ ދެކޮޅަށް ކުޅޭނެ އެވެ.
ޗެމްޕިއަންސް ލީގުގެ މި ސީޒަނުގެ ގްރޫޕްތައް.
މުބާރާތުގެ ޗެމްޕިއަންކަން 14 ފަހަރު ހޯދާފައިވާ އެންމެ ފަހުގެ ޗެމްޕިއަން ރެއާލް މެޑްރިޑް ލައްވާލީ އާރްބީ ލައިޕްޒިގު، ޝަހުތަރު ޑޮނެސްކް އަދި ސެލްޓިކާ އެކު ގްރޫޕް އެފްގަ އެވެ. މިދިޔަ އަހަރުގެ ރަނަރަޕް ލިވަޕޫލް ލައްވާލީ އަޔަކްސް، ނަޕޯލީ އަދި ރޭންޖާސްއާ އެކު ގްރޫޕް އޭގަ އެވެ. އަޔަކްސް އިން މިދިޔަ ސީޒަނުގައި ވެސް ވާދަކުރީ ލިވަޕޫލާ އެއް ގްރޫޕެއްގަ އެވެ. ނަޕޯލީން ވެސް މީގެ ކުރިން ލިވަޕޫލާ އެއް ގްރޫޕެއްގައި ވާދަކޮށްފައިވެ އެވެ.
ގްރޫޕް ބީގައި ހިމެނެނީ ޕޯޓޯ، އެތުލެޓިކޯ މެޑްރިޑް، ބަޔާ ލެވަކޫސަން އަދި ކްލަބް ބްރޫޖް އެވެ. ގްރޫޕް ޑީގައި ޔޫރޮޕާ ލީގުގެ ޗެމްޕިއަން އައިންޓްރަކްޓް ފްރޭންކްފާޓް، ޓޮޓެންހަމް ހޮޓްސްޕާސް، ސްޕޯޓިން ލިޒްބަންގެ އިތުރުން ދެެން އޮތީ މާސޭ އެވެ.
މުބާރާތުގެ ޗެމްޕިއަންކަން ހަތް ފަހަރު ހޯދާފައިވާ އޭސީ މިލާން އޮތީ ދެ ފަހަރު ތަށި އުފުލާލި ޗެލްސީ އާއި ސަލްޒްބާގް އަދި ޑިނަމޯ ޒަގްރެބްއާ އެކު ގްރޫޕް އީގަ އެވެ. އިންގްލެންޑްގެ ޗެމްޕިއަން، މެންޗެސްޓާ ސިޓީ ހިމެެނެނީ ސެވިއްޔާ އާއި ބޮރޫޝިއާ ޑޯޓްމަންޑް އަދި ކޮޕެންހާގެންއާ އެކު ގްރޫޕް ޖީގަ އެވެ. ސިޓީ އާއި ޑޯޓްމަންޑް ކުޅޭ މެޗު އެންމެ ހާއްސަވާނެ އެއް ކުުޅުންތެރިއަކީ ޑޯޓްމަންޑް ދޫކޮށް މި ފަހަރުގެ ޓްރާންސްފާގައި ސިޓީ އަށް ބަދަލުވި އާލިން ބްރައުޓް ހާލަންޑް އަށެވެ.
ޗެމްޕިއަންސް ލީގުގެ ގްރޫޕް ސްޓޭޖުގެ މެޗުތައް ފަށާނީ އަންނަ މަހުގެ ހަ ވަނަ ދުވަހު އެވެ.
