ލަންޑަން (އޮގަސްޓް 25) - ރެއާލް ސޮސިއެޑާޑަށް ކުޅެމުން އަންނަ ސްވިޑެންގެ ފޯވާޑް އަލެކްސަންޑަ އިސާކް ގަންނަން ނިއުކާސަލް ޔުނައިޓެޑުން އެ ކްލަބްގެ ރެކޯޑް ބިޑެއް ކަަމަށްވާ 74 މިލިއަން ޑޮލަރު ހުށަަހަޅާފައިވާ ކަމަށް މީޑިއާ ރިޕޯޓްތައް ބުނެފި އެވެ.
ނިއުކާސަލް އިން މީގެ ކުރިން އެންމެ އަގުބޮޑުކޮށް ގަނެފައިވަނީ 2019 ވަނަ އަހަރު ހޮފެންހައިމް އަށް 47 މިލިއަން ޑޮލަރު ދީފައި ގަތް ބްރެޒިލްގެ ޖޮއެލިންޓަން އެވެ. އިސާކް، ނިއުކާސަލަށް ބަދަލުވެއްޖެނަމަ އޭނާ ވެގެންދާނީ އެ ޓީމުން މި ފަހަރުގެ ޓްރާންސްފާގައި ސޮއިކުރާ ހަތަރު ވަނަ ކުޅުންތެރިޔާ އަށެވެ. ނިއުކާސަލުން މި ފަހަރުގެ ޓްރާންސްފާގައި ކުރިން ގަތީ ބާންލީގެ ކީޕަރު ނިިކް ޕޯޕް، ލިލްގެ ޑިފެންޑަރު، ސްވެން ބޮޓްމަން އަދި އެސްޓަން ވިލާގެ މެޓް ޓާގެޓް އެވެ.
އާ ފޯވާޑެއް ގަންނަން ނިއުކާސަލުން ޓްރާންސްފާ މާކެޓަށް ވަންނަން ޖެހުނީ މިދިޔަ އާދިއްތަ ދުވަހު މެންޗެސްޓާ ސިޓީއާ 2-2 އިން އެއްވަރުވި މެޗުގައި ނިއުކާސަލްގެ ފޯވާޑް، ކަލުމް ވިލްސަން ފަލަމަސްގަނޑަށް އަނިޔާވެގެން ބަދަލުކުރަން ޖެހުމެވެ. މިދިޔަ ސީޒަނުގައި ވެސް އަނިޔާއާ ހެދި ވިލްސަން އަށް ގިނަ މެޗުތަކެއް ގެއްލުނެވެ.
އެޑީ ހޯވްގެ ކޯޗުކަމުގައި ކުޅޭ ނިއުކާސަލް އިން އިސާކް، 22، އަށް 74 މިލިއަން ޑޮލަރު ދޭން ނިންމާފައިވާއިރު، ސްޕެއިންގެ މީޑިއާތަކުން ރިޕޯޓްކުރާ ގޮތުގައި އެ އަގަށް ސޮސިއެޑާޑުން ވެސް ރުހެ އެވެ. މާނަ އަކީ ކުރިއަށް އޮތް ދުވަސްތަކުގެ ތެރޭގައި އިސާކް ނިއުކާސަލަަށް ބަދަލުވުމުގެ ހުރިހާ ކަމެއް ނިމިގެންދިއުމުގެ ފުރުސަތު ބޮޑުވުމެވެ.
މީގެ ތިން އަހަރު ކުރިން 2019 ވަަނަ އަހަރު ޖޫން މަހު ބޮރޫޝިއާ ޑޯޓްމަންޑް ދޫކޮށް ސޮސިއެޑާޑަށް ބަދަލުވެ، އިސާކް އެ ޓީމާ އެކު ސޮއިކުރީ ފަސް އަހަރުގެ އެއްބަސްވުމެއްގަ އެވެ. އެ ފަހަރު ޑޯޓްމަންޑް ދޫކޮށްލިއިރު، އެ ކްލަބުން ވަނީ އަލުން ބޭނުންނަމަ 30 މިލިއަން ޔޫރޯ ދީފައި އިސާކް ގެނެވޭ ގޮތަށް މާއްދާއެއް (ބައިބެކް ކްލޯސް) އެއް ހިމަނައިފަ އެވެ. ރިޕޯޓްތައް ބުނާގޮތުން މީދެ ސީޒަނެއް ކުރިން އެ މާއްދާ ވަނީ ހަމަވެފަ އެވެ.
އުމުރުން 16 އަހަރުގައި ސްވިޑެންގެ އޭއައިކޭ އަށް 2016 ވަަނަ އަހަރު ކުޅެން ފެށި އިސާކް ވަނީ 2017 ވަނަ އަހަރު ޑޯޓްމަންޑަަށް ބަދަލުވެފަ އެވެ. އެ ޓީމަށް ކުޅެމުން 2018-2019 ވަނަ އަހަރުގެ ސީޒަން ލޯން އެއްބަސްވުމެއްގެ ދަށުން ކުޅުނީ ނެދަލެންޑްސްގެ ވިލެމް އަށެެވެ. ޑޯޓްމަންޑުން ފުރުސަތު ނުލިބޭތީ ސޮސިއެޑާޑަށް ބަދަލުވީ އެވެ. އެ ޓީމާ އެކު ސޮއިކުރި ކޮންޓްރެކްޓް ހަމަވާނީ 2024 ވަނަ އަހަރުގެ ޖޫންގެ ނިޔަލަށެވެ.
