ނިއުދިއްލީ، އިންޑިއާ (އޮގަސްޓް 22) - ތިން ވަނަ ފަރާތެއްގެ ނުފޫޒު ފޯރާފައިވާތީ ފީފާ އިން ސަސްޕެންޑްކޮށްފައިވާ އިންޑިއާގެ ފުޓްބޯޅަ ފެޑެރޭޝަން (އޭއައިއެފްއެފް) ހިންގުމަށް އިންޑިއާގެ ސުޕްރީމް ކޯޓުން އައްޔަންކުރި ތިން މެމްބަރުންގެ ކޮމިޓީގެ މަސައްކަތް ނިމުމަކަށް ގެންނަން އެ ކޯޓުން ނިންމައިފި އެވެ.
މިދިޔަ މެއި މަހު 18 ވަނަ ދުވަހު އިންޑިއާގެ ސުޕްރީމު ކޯޓުން ވަނީ އޭއައިއެފްއެފްގެ ރައީސް ޕްރަފުލް ޕަޓޭލް މަގާމުން ދުރުކޮށް އިންޑިއާގެ ފުޓްބޯޅަ ފެޑެެރޭޝަން ހިންގުން ތިން މެމްބަރުންގެ ކޮމިޓީ އަކާ ހަވާލުކޮށްފަ އެވެ. ސުޕްރީމް ކޯޓުން ކަނޑައެޅި ތިން މެމްބަރުންގެ ކޮމިޓީގައި ހިމެނެނީ ރިޓަޔަކޮށްފައިވާ ޖަޖް، އަނިލް އާރް ދޭވް، ކުރީގެ ޗީފް އިލެކްޝަން ކޮމިޝަނަރު އެސްވައި ކުރޭޝީ އަދި އިންޑިއާ ގައުމީ ފުޓްބޯޅަ ޓީމުގެ ކުރީގެ ކެޕްޓަން ބާސްކަރު ގަންގޫލީ އެވެ.
ސުޕްރީމް ކޯޓުން މެއި މަހު އަމުރުކޮށްފައިވަނީ، ޕްރަފުލް ޕަޓޭލްގެ ލީޑަޝިޕް އަތުން ބާރުތައް ނަގައި، މި ތިން މެމްބަރުންގެ ކޮމީޓީއާ ހަވާލުކުރުމަށެވެ. އަދި ވީ އެންމެ އަވަހަށް އިންޑިއާ ގާނޫނުގައިވާ ގޮތުގެ މަތިން، ފުޓްބޯޅަ ފެޑެރޭޝަނުގެ އިންތިހާބު ބޭއްވުމަށް ވެސް ވަނީ އަންގައިފަ އެވެ.
އެކަމަކު، ސުޕްރީމް ކޯޓުން އައްޔަންކުރި ތިން މެމްބަރުންގެ ކޮމިޓީގެ ބެލުމުގެ ދަށުން މި މަހުގެ 28 ވަނަ ދުވަހު އިންޑިއާ ފުޓްބޯޅައިގެ އިންތިހާބު ބާއްވަން ތައްޔާރުވަމުން ދަނިކޮށް، ފީފާ އިން އިންޑިއާ ސަސްޕެންޑްކުރީ މި މަހު 15 ވަނަ ދުވަހު އެވެ.
ފީފާ އިން އިންޑިއާ ސަސްޕެންޑް ކުރަން ނިންމީ އެ ފެޑެރޭޝަނާއި އޭއެފްސީގެ ވަފުދެއް އިންޑިއާ އަށް ކުރި ޒިޔާރަތުގައި ލަފާދިން އެއްވެސް ކަމަކަށް ރިއާޔަތް ކުރުމެއް ނެތި، އިންޑިއާ ފުޓްބޯޅައިގެ ކަންކަން އިންތިހާބަކާ ހަމައަށް ގެންދާތީ އެވެ. އަދި އަސާސީ ގަވާއިދުގައިވާ ގޮތުގެ މަތިން ބާރު ނުލިބޭ ބަޔަކަށް ވޯޓު ލުމުގެ ހައްގު ދީގެން އިންތިހާބެއް ނުބޭއްވޭނެކަމަށް ފީފާ އިން އެންމެ ފުރަތަމަ ވެސް ވަނީ އަންގައިފަ އެވެ.
ފީފާގެ ސަސްޕެންޝަނެއް އައުމުން އިންޑިއާގެ ފުޓްބޯޅައިގެ ހަރަކާތްތައް ހުއްޓި، އިންޑިއާގެ ގައުމީ ޓީމުގެ މެޗުތަކަށް ވާނެ ގޮތެއް ނޭނގި ތިބެންޖެހޭތީ ގިނަ ކުޅުންތެރިންނާއި ފުޓްބޯޅަ އެޑްމިނިސްޓްރޭޓަރުންގެ ކަންބޮޑުވުންތައް ހިއްސާކޮށް، އިންޑިއާ ސަރުކާރަށް ޕްރެޝަރު ބޮޑުކުރި އެވެ. ނަތީޖާ އަކަށްވީ، އިންޑިއާގެ ކުޅިވަރާ ބެހޭ މިނިސްޓްރީން ސުޕްރީމް ކޯޓުގެ އެހީ އަށް އެދި ފީފާގެ ސަސްޕެންޝަނުން ސަލާމަތްވެވޭނެ ހައްލުތަކެއް ހޯދަން އެދުމެވެ.
އެ ގޮތުން ފުރަތަމަ ކަމެއްގެ ގޮތުގައި ސުޕްރީމް ކޯޓުން ނިންމާފައިވަނީ ތިން މެމްބަރުންގެ ކޮމިޓީ އަތުން އިންޑިއާ ފުޓްބޯޅަ ފެޑެރޭޝަން ހިންގުމުގެ ބާރު ނަގައި، އެ ކޮމިޓީގެ ދައުރު ނިމުމަކަށް ގެނައުމަށެވެ. އަދި އިންޑިއާ ފުޓްބޯޅަ އިދާރާ ހިންގުން، އެކްޓިން ސެކްރެޓަރީ ޖެނެރަލެއްގެ ބެލުމުގެ ދަށަށް ގެންގޮސް، ފީފާ އިން އަންގާ އިސްލާހުތައް ހިމަނައިގެން އިންޑިއާ ފުޓްބޯޅަ ފެޑެރޭޝަންގެ އަސާސީ ގަވާއިދު ފާސްކުރުމަށެވެ.
އަދި އާ އަސާސީ ގަވާއިދެއް ފާސްކޮށް، އިންތިހާބު ބޭއްވުމަށް ދިން މުއްދަތު މި ވަނީ އެއް ހަފްތާ އަށް އިތުރުކޮށްދީފަ އެވެ.
އިންޑިއާ އިން ބޭނުންވަނީ ވީހާ ވެސް އަވަހަކަށް އެ ގައުމުގެ ސަސްޕެންޝަނުން ސަލާމަތްވެ، އަންނަ އޮކްޓޫބަރު މަހު އިންޑިއާގައި ބާއްވަން ނިންމާފައިވާ 17 އަހަރުން ދަށުގެ އަންހެނުންގެ ފީފާ ވޯލްޑް ކަޕް އެ ގައުމުގައި ހޯސްޓް ކުރުމުގެ ފުރުސަތު އެ ގައުމަށް ލިބުމެވެ. ސަސްޕެންޝަނުން ސަލާމަތްނުވެއްޖެނަމަ އިންޑިއާ އަތުން އެ މުބާރާތް ހޯސްޓް ކުރުމުގެ ފުރުސަތު އެއްކޮށް ގެއްލޭނެ އެވެ.
