ނިއުކާސަލް (އޮގަސްޓް 22) - އިނގިރޭސި ޕްރިމިއާ ލީގުގައި މިރޭ ލީޑްސް ޔުނައިޓެޑުން 3-0 އިން ޗެލްސީ ބަލިކުރިއިރު، އެންމެ ފަހުގެ ޗެމްޕިއަން މެންޗެސްޓާ ސިޓީ އާއި ނިއުކާސަލް ޔުނައިޓެޑް 3-3 އިން އެއްވަރުވެއްޖެ އެވެ.
ސިޓީ އެއްވަރުވުމާ އެކު ލީގުގައި ފުރަތަމަ ތިން މެޗު ނިމުނުއިރު، ސައްތަ އިން ސައްތަ ރެކޯޑަކާ އެކީ އޮތީ އާސެނަލް އެކަންޏެެެވެ.
އާސެނަލް ލީގުގެ އެއް ވަނައިގައި އޮތީ ތިން މެޗުން ނުވަ ޕޮއިންޓް ހޯދައިގެންނެވެ. ދެ ވަނައިގައި އޮތް ސިޓީ އާއި ތިން ވަނައިގައި އޮތް ލީޑްސް އާއި ހަތަރު ވަނައިގައި އޮތް ޓޮޓެންހަމް ހޮޓްސްޕާސް އާއި ފަސް ވަނައިގައި އޮތް ބްރައިޓަން އަށް ވެސް ވަނީ ހަތް ޕޮއިންޓް ލިބިފަ އެވެ.
ބްރައިޓަން ވަނީ މިރޭ ވެސްޓް ހޭމް ޔުނައިޓެޑް އަތުން 2-0 އިން މޮޅުވެފަ އެވެ.
އެމެރިކާގެ ކޯޗު ޖެސީ މާޝްގެ އިރުޝާދުގެ ދަށުން ކުޅެމުން އަންނަ ލީޑްސް ދަނޑުގައި މިރޭ އެ ޓީމުން ވަނީ ޗެލްސީ ކައިރީގައި ރަނގަޅަށް ކުޅެ، މުހިންމު މޮޅެއް ހޯދައިފަ އެވެ. އަނިޔާގެ ސަބަބުން ބަދަލުތަކެއް ގެނެސްގެން ކުޅުނު ޗެލްސީ އަށް މިއީ އުނދަގޫ މެޗެކެވެ.
ލީޑްސް އިން މެޗުގެ 33 ވަނަ މިނިޓްގައި ލީޑުނެގި ގޯލަކީ ޗެލްސީގެ ގޯލްކީޕަރު އެޑޮއާޑް މެންޑީ ހެދި ގޯހަކުން ޖެހި ގޯލެކެވެ. މެންޑީ ގޯލު ކުރިމަތިން ލިބުނު ބޯޅައެއް ހިފަހައްޓަން އުޅުމުގެ ތެރޭގައި ލީޑްސްގެ ބްރެންޑެން އާރޮންސަން އެ ބޯޅަ ހޯދައި، ވަނީ ގޯލު ޖަހައިފަ އެވެ.
މެންޑީ އަތުން ލީޑްސްގެ އާރޮންސަން ބޯޅަ ހިފައިގެން ދަނީ: މި މެޗުގައި އާރޮންސަން ވަނީ ޗެލްސީގެ ފަހަތަށް ޕްރެޝަރު ބޮޑުކޮށްފައި.
އޭގެ ހަތަރު މިނިޓް ފަހުން ހިލޭ ޖެހުމަކުން ހުރަސްވި ބޯޅައެއް ބޮލުން ގޯލަށް ފޮނުވާލައި، ރޮޑްރީގޯ ލީޑްސްގެ ލީޑުފުޅާކޮށްދިނެވެ. މިއީ މި ފަހަރު ލީގުގައި ރޮޑްރީގޯ ޖެހި ހަތަރު ވަނަ ގޯލެވެ.
ޗެލްސީގެ ރަހީމް ސްޓާލިން، ފުރަތަމަ ހާފުގައި ގޯލެއް ޖެހި ނަމަވެސް އެ ގޯލު ބަލައިނުގަތީ އޮފްސައިޑް މަގާމެއްގައި ހުރެ ޖެހި ގޯލެއް ކަމަށްވާތީ އެވެ. ދެ ވަނަ ހާފްގައި ޗެލްސީން ބަދަލުތަކެއް ގެނެސްގެން ގޯލެއް ޖެހޭތޯ ބެލި ނަމަވެސް ދެން ވެސް ލަނޑު ޖެހީ ލީޑްސް އިންނެވެ. މެޗުގެ 69 ވަނަ މިނިޓްގައު އޭރިއާތެރެއިން ރޮޑްރީގޯ ކޮންޓްރޯލް ކޮށްލި ބޯޅައެއް ހޯދައި ޖެކް ހެރިސަން ވަނީ ލީޑްސް އަށް މެޗުގެ ތިން ޕޮއިންޓް ކަށަވަރުކޮށްދީފަ އެވެ.
ޗެލްސީން މެޗު ނިންމާލީ ކުޅުންތެރިއަކު މަދުކޮށެވެ. މި ފަހަރުގެ ޓްރާންސްފާގައި 45 މިލިއަން ޑޮލަރަށް ޗެލްސީން ގެނައި ސެނެގާލްގެ ޑިފެންޑަރު، ކަލީދޫ ކުލިބާލީ އަށް ވަނީ މެޗުގެ 84 ވަނަ މިނިޓްގައި ދެ ވަނަ ރީނދޫ ކާޑާ އެކު ރަތް ކާޑެއް ދައްކައިފަ އެވެ. ކުލިބާލީ އަށް ފުރަތަމަ ރީނދޫ ކާޑު ދެއްކީ ފުރަތަމަ ހާފުގަ އެވެ.
މި މެޗުގައި ޗެލްސީން ފޮނުވާލި ރަނގަޅު ހަމަލާތަކެއް ލީޑްސްގެ ކީޕަރު އިލާން މެލިއޭ ވަނީ މަތަކޮށްފަ އެވެ.
ނިއުކާސަލް ދަނޑުގައި މިރޭ ޗެމްޕިއަން ސިޓީން ވަނީ ފަސް ވަނަ މިނިޓްގައި ބެނާޑޯ ސިލްވާ ދިން ބޯޅައަކުން އިލްކާއި ގުންޑޮގާން ޖެހި ގޯލުން ލީޑުނަގައިފަ އެވެ. ފުލުފުލުގައި ނިއުކާސަލް އިން އެޓޭކްކޮށް، ގޯލެއް ޖަހަން ކުރި މަސައްކަތް ކާމިޔާބުވީ މެޗުގެ 28 ވަނަ މިނިޓްގަ އެވެ. ނިއުކާސަލްގެ އެލާން ސެއިން މެކްސިމައިން ނެގި ހުރަހަކުން އޭރިއާތެރެއަށް ވެއްޓިގެންފައި މި ގޯލު ޖެހީ މިގޭލް އަލްމިރޯން އެވެ.
އަލްމިރޯން މި ގޯލު ޖެހިއިރު، އަތުގައި ބޯޅަ ޖެހުނުތޯ ވީޑިއޯ އެސިސްޓަންޓް ރެފްރީ (ވީއޭއާރް) މެދުވެރިކޮށް ވަނީ ކަށަވަރުކޮށްފަ އެވެ.
ފުރަަތަމަ ހާފު ނިމުމުގެ ކުރިން ނިއުކާސަލުން ވަނީ ނަތީޖާ އަނބުރާލައިފަ އެވެ. މެޗުގެ 39 ވަަނަ މިނިޓްގައި ސެއިން މެކްސިމައިން މި ފަހަރު ދިން ބޯޅަ، ކަލުމް ވިލްސަން ވަނީ ހަމަޖެހިލާފައި ގޯލަށް ފޮނުވާލައިފަ އެވެ. ދެ ވަނަ ހާފްގެ ކުޅުން ފަށައިގެން ނުވަ މިނިޓް ތެރޭ، ކިއެރަން ޓްރިޕިއޭ ޖެހި ހިލޭ ޖެހުމުން ނިއުކާސަލުން ދެ ގޯލުގެ ލީޑެއް ނެގި އެވެ.
ހާލަންޑް، ނިއުކާސަލް ކޮޅަށް ސިޓީގެ ދެ ވަނަ ގޯލު ޖެހުމަށް ފަހު އުފާފާޅުކުރަނީ.---
ސިޓީން އަލުން މެޗުގެ ތެރެއަށް ވަންނަން ކުރި މަސައްކަތުގައި ހިތްވަރެއް ލިބުނީ 60 ވަނަ މިނިޓްގައި އާލިން ބްރައުޓް ހާލަންޑް ޖެހި ގޯލުންނެވެ. އޭރިއާތެރެއިން ރޮޑްރީ ހުރަސްކޮށްލި ބޯޅަ ހާލަންޑް ވަނީ އެއް ފަހަރުން ގޯލުގެ ކަނަށް ފޮނުވާލައިފަ އެވެ. އޭގެ ހަތަރު މިނިޓް ފަހުން ކެވިން ޑި ބްރޭނާ ދިން މޮޅު ބޯޅައެއް އޭރިއާތެރެއިން ހޯދައި، ބެނާޑޯ ސިލްވާ ވަނީ ސިޓީ އަށް އެއްވަރުކޮށްދީފަ އެވެ.
އިތުރު ގޯލެއް ޖަހައި މެޗުން މޮޅުވާން ސިޓީ އަށް ވަގުތު އޮތް ނަމަވެސް ނިއުކާސަލް އިން ވަނީ އިތުރު ގޯލެއް ޖަހަން ސިޓީން ކުރި މަސައްކަތް ހުއްޓުވައިފަ އެވެ.
މެޗުގެ 72 ވަނަ މިނިޓްގައި ޑި ބްރޭނާ އަށް ހާފުގެ މެދެއްހާ ހިސާބުން ޓްރިޕިއޭ ކުރި ފައުލަކަށް ފުރަތަމަ ރަތް ކާޑެއް ދެއްކި ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ވަނީ ރީނދޫ ކާޑަކަށް ބަދަލުކޮށްފަ އެވެ.
ނިއުކާސަލް ދަނޑުގައި މި މެޗުން ޕޮއިންޓެއް ލިބުމުން ސިޓީގެ ކޯޗު ޕެޕް ގާޑިއޯލާ ބުނީ މެޗުގައި ކަންކަން ދިޔަ ގޮތުން މިއީ ގޯސް ނަތީޖާއެކޭ ނުބުނާނެ ކަމަށެވެ.
"ނިއުކާސަލް އެ އަންނަނީ ފަހަރަކަށް ވުރެ ފަހަރެއް ވަރުގަދަ ވަމުން. އަހަންނެއް ނުބުނާނަން މެޗު ދިޔަ ގޮތް ބަލާފައި މިއީ ގޯސް ނަތީޖާ އެކޭ،" ގާޑިއޯލާ ބުންޏެވެ. "ޕްރިމިއާ ލީގު އުނދަގޫވާނެކަން މި އެނގެނީ ނަތީޖާތަކުން މި ފަހަރުގެ، ލީޑްސް އިން ޗެލްސީ ބަލިކުރުމަކީ ވެސް ހެއްކެއް. އަހަރެމެން މިދިޔަ ފަސް އަހަރު (ލީގުގައި) ކުރި މަސައްކަތަށް ބަލާއިރު އޮތީ އިތުބާރެއް،"
ގާޑިއޯލާ ބުނީ ކުރިއަށް ހުރި މެޗުތަކުގައި ސިޓީން އިތުރަށް ސަމާލުވާން ޖެހޭނެ ކަންކަން ނިއުކާސަލް މެޗުން ފާހަގަވި ކަމަށެވެ.
