މެޑްރިޑް (އޮގަސްޓް 21) - ލޫކަ މޮޑްރިޗްގެ ތަފާތު މޮޅު ގޯލާ އެކު، ރެއާލް މެޑްރިޑުން 4-1 އިން ސެލްޓަ ވީގޯ އަތުން ރޭ ބޮޑު މޮޅެއް ހޯދައިފި އެވެ.
ކުޅުނު ފުރަތަމަ މެޗުގައި ފަހަތުން އަަރައި އަލްމޭރިއާ އަތުން މޮޅުވި ރެއާލް، ރޭ ލީޑުނެގީ 11 ވަނަ މިނިޓްގައި ކަރިމް ބެންޒެމާ ޖެހި ޕެނަލްޓީންނެވެ. މިއީ އޭރިއާތެރެއިން ސެލްޓަގެ ރެނާޓޯ ޓަޕިއާ އަތުގައި ބޯޅަ ޖެހުމުން ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ދިން ޕެނަލްޓީ އެކެވެ.
މެޗުގެ 23 ވަނަ މިނިޓްގައި ސެލްޓަ އިން އެއްވަރުކުރީ އިއާގޯ އަސްޕާސް ޕެނަލްޓީ އަކުން ޖެހި ގޯލުންނެވެ. މިއީ ރެއާލްގެ އެޑާ މިލިއާޓާއޯ އަތުގައި ބޯޅަ ޖެހުމުން ދިން ޕެނަލްޓީ އެކެވެ.
ފުރަަތަމަ ހާފު ނިމުމުގެ ކުރިން ރެއާލަށް އަލުން ލީޑުނަގައިދިނީ ތަޖުރިބާކާރު މިޑްފީލްޑަރު، މޮޑްރިޗް އެެވެ. އޭރިއާބޭރުން ހަމަޖެހިލާފައި މޮޑްރިޗް ޖެހި ބޯޅަ އަމާޒުވީ ގޯލުގެ މަތީ ކަނަށެވެ. މެޗުގެ 42 ވަނަ މިނިޓްގައި ޑޭވިޑް އަލަބާ ދިން ބޯޅައެއް ހިފައިގެން ސެލްޓަ ޑިފެންޑަރެއް ކައިރިން ނައްޓާފައި މޮޑްރިޗް ޖެހި ބޯޅަ އަމާޒުވީ ގޯލުގެ މަތީ ކަނަށެވެ. މިއީ މޮޑްރިޗް ގޯލު ޖެހި ސްޕެނިޝް ލީގުގެ 11 ވަނަ ސީޒަނެވެ.
ރެއާލުން ދެ ވަނަ ހާފްގެ ކުޅުން ފެށިގެން، މެޗުގެ 56 ވަނަ މިނިޓްގައި ތިން ވަނަ ގޯލެއް ޖެހި އެވެ. މި ލަނޑު ޖެހީ މޮޑްރިޗް ދިން ބޯޅައަކުން ވިނީޝިއުސް ޖޫނިއާ އެވެ. އޭނާ މި ގޯލު ޖެހީ ސެލްޓަގެ ކީޕަރު އޮގަސްޓިން މާޗޭސިން ކައިރިން ނައްޓައިފަ އެވެ.
އޭގެ 10 މިނިޓް ފަހުން، ރެއާލްގެ ހަތަރު ވަނަ ގޯލު ޖެހީ ފެޑޭ ވަލްވޭޑޭ އެވެ. ވިނީޝިއުސް ދިން ބޯޅަ ވަލްވޭޑޭ ވަނީ ތިރިތިރިން ގޯލުގެ ދުރު ކަނަށް އަމާޒުކޮށްލައިފަ އެވެ.
މެޗުގެ 86 ވަނަ މިނިޓްގައި ރެއާލަށް ފަސް ވަނަ ގޯލެއް ޖަހަން ލިބުނު ޕެނަލްޓީން އެޑެން ހަޒާޑް ފޮނުވާލި ބޯޅަ ކީޕަރު މާޗޭސިން ވަނީ މަތަކޮށްފަ އެވެ. އަދި ރީބައުންސް ބޯޅަ ބެންޒެމާ ގޯލަށް ފޮނުވާލުމުން ވެސް މާޗޭސިން ވަނީ ހުށިޔާރުކަމާ އެކު ހުއްޓުވައިފަ އެވެ.
