ބާލިން (އޮގަސްޓް 20) - ޖަރުމަނު ލީގުގައި މިރޭ ވާޑާ ބްރެމަން އިން ފަހު ވަގުތު ތިން ގޯލު ޖަހައި، 3-2 އިން ހިތްދަތި ގޮތަކަށް ބޮރޫޝިއާ ޑޯޓްމަންޑް ބަލިކޮށްފި އެވެ.
އަމިއްލަ ދަނޑު، ސިގްނަލް އިޑޫނާ ޕާކްގައި، ޑޯޓްމަންޑުން މިރޭގެ މެޗުގެ 88 ވަނަ މިނިޓާ ހަމައަށް 2-0 އިން ކުރީގައި އޮތެެވެ. އެކަމަކު، ފަހުން ޕްރެޝަރަށް ވެއްޓި ޑިފެންސްނުކުރެވިިދިޔައިރު، މެޗު ނިމުނީ ބްރެމަން މޮޅުވެގެންނެވެ. މި ނަތީޖާ ޑޯޓްމަންޑްގެ ކުޅުންތެރިންނާއި ސަޕޯޓަރުން އަދި ކޯޗިން ޓީމަށް ވެސް ވީ ޝޮކަކަށެވެ.
ޑޯޓްމަންޑްގެ ކޯޗު އެޑިން ޓާޒިޗް ބުނީ މިއީ އެއްވެސް ގޮތަކަށް ޑޯޓްމަންޑް ބަލިވާން ޖެހޭ މެޗެއް ނޫން ކަމަށާއި މި ނަތީޖާ ނަގައިގަންނާނެ ގޮތެއް ވެސް މި ވަގުތު ބުނެދޭން އުނދަގޫ ކަމަށެވެ. އަދި ޑޯޓްމަންޑްގެ ކެޕްޓަން މާކޯ ރެއުސް ބުނީ އަމިއްލަ ދަނޑުގައި ޑޯޓްމަންޑް އަތުން އެ ގޮތަށް މެޗެއް ގެއްލުމުން ބުނާނެ އެއްޗެއް ނޭނގޭ ކަމަށެވެ.
ޑޯޓްމަންޑުން މި މެޗުގައި ލީޑުނެގީ މެޗުގެ ފުރަތަމަ ހާފުގެ އިތުރު ވަގުތުގައި ޖޫލިއަން ބްރަންޑްޓް އޭރިއާ ބޭރުން ޖެހި ޝޮޓަކުން ކާމިޔާބުކުރި ގޯލުންނެވެ.
ގޯލު ޖަހާނެ ގިނަ ފުރުސަތުތަކެއް ޑޯޓްމަންޑަށް ލިބުނު މި މެޗުގައި އެ ޓީމުން ލީޑުފުޅާކުރީ މެޗުގެ 77 ވަނަ މިނިޓްގައި ޕޯޗުގީސް ފުލްބެކް، ރަފައެލް ގަރޭރޯ ޖެހި މޮޅު ގޯލުންނެވެ. އޭރިއާބޭރުން ލިބުނު ބޯޅައެއް ކޮންޓްރޯލް ކުރުމަށް ފަހު ގަރޭރޯ ވަނީ އެއް ފަހަރުން ގޯލުގެ ދުރު ކަނަށް ބޯޅަ ވައްދާލައިފަ އެވެ.
ބްރެމަން އިން ނަތީޖާ އަނބުރާލުމުގެ މަސައްކަތުގައި އަމަލީ ސިފައެއް ގެންނަން ފެށީ މެޗުގެ 89 ވަނަ މިނިޓުން ފެށިގެންނެވެ. ބްރެމަންގެ ފުރަތަމަ ގޯލު ޖެހީ އޭރިއާ ތެރެއިން މަތީ ކަނަށް ބޯޅަ ފޮނުވާލައިގެން ލީ ބުޗާނަން އެވެ.
އިތުރު ވަގުތުގެ ގޮތުގައި ދެއްކި ފަސް މިނިޓްގެ ތެރެއިން ތިން ވަނަ މިނިޓްގައި ބްރެމަންގެ ނިކްލަސް ޝްމިޑްޓް ބޮލުން ޖެހި ގޯލުން އެ ޓީމު އެއްވަރުކުރި އެވެ. ނަތީޖާ ހަަމަހަމަކުރުމަށް ފަހު ވެސް ބްރެމަން އިން ފަސް އެނބުރި ނުބަލައި، އިތުރު ގޯލެއް ޖަހައި މެޗުން މޮޅުވި އެވެ. މި ލަނޑު ޖެހީ ކުރިން ސެފީލްޑް ޔުނައިޓެޑަށް ކުުޅުނު ސްކޮޓްލެންޑްގެ ފޯވާޑް އޮލިވާ ބާކް އެވެ.
ޖަރުމަނު ލީގުގެ އެއް ވަނައިގައި އޮތް ބޮރޫޝިއާ މުންޗެންގްލަޑްބެކާއި ދެ ވަނައިގައި އޮތް ޔޫނިއަން ބާލިން އަދި ތިން ވަނައިގައި އޮތް މައިންޒަށް ތިން މެޗުން ހަތް ޕޮއިންޓް ލިބިފަ އެވެ. ހަތަރެއްގައި އެންމެ ފަހުގެ ޗެމްޕިއަން ބަޔާން މިއުނިކް އޮތީ ދެ މެޗުން ހަ ޕޮއިންޓް ހޯދައިގެންނެވެ. ބަޔާނުން މާދަމާރޭ ބޯކުމް ދަނޑުގައި މޮޅުވެގެން އަލުން އެއް ވަނަ އަށް އެރޭނެ އެވެ.
