ގެޓާފޭ، ސްޕެއިން (އޮގަސްޓް 16) - ސްޕެއިންގެ ފޯވަޑް އަލްވާރޯ މޮރާޓާ ޖެހި ދެ ލަނޑާ އެކު، ސްޕެނިޝް ލަލީގާގައި މި ސީޒަންގައި ކުޅުނު ފުރަތަމަ މެޗުގައި ގެޓާފޭ އަތުން 3-0 އިން އެތުލެޓިކޯ މެޑްރިޑް މޮޅުވެއްޖެ އެވެ.
ގެޓާފޭގެ ދަނޑުގައި ކުޅުނު މެޗުގެ 15 ވަނަ މިނިޓުގައި އެތުލެޓިކޯ އަށް ލީޑު ހޯދައިދިނީ މޮރާޓާ އެވެ. މެޗުގެ 59 ވަނަ މިނިޓުގައި މޮރާޓާ އެތުލެޓިކޯގެ ދެ ވަނަ ލަނޑު ޖެހިއިރު، ތިން ވަނަ ލަނޑު 75 ވަނަ މިނިޓުގައި ޖެހީ އެންޓޮއިން ގްރީޒްމަން އެވެ.
އެތުލެޓިކޯ އިން ޖެހި ތިން ލަނޑުގައި ވެސް އެ ޓީމުގެ ޕޯޗުގަލް ފޯވަޑް ޔާއޯ ފެލިކްސްގެ ދައުރެއް އޮތެވެ. މިދިޔަ ސީޒަން ނިންމާލިއިރު، ޔާއޯ ފެލިކްސް އަށް އެތުލެޓިކޯގައި މުސްތަގުބަލެއް އޮތްތޯ މީޑިއާ އިން ސުވާލު އުފެއްދި ނަމަވެސް އެ ކްލަބުން ނިންމީ އޭނާ ބަހައްޓާށެވެ.
ގެޓަފޭ ޑިފެންޑަރެއްކައިރިން މޮރާޓާ (ކ) ބޯޅަ ފޮނުވާލަނީ.--- ފޮޓޯ: އޭއެފްޕީ
މެޗަށް ފަހު ވާހަކަ ދައްކަމުން އެތުލެޓިކޯގެ ކޯޗު ޑިއޭގޯ ސިމިއޯނީ ބުނީ މި މެޗުން ޓީމުގައި ރަނގަޅުކުރަންޖެހޭ ކަންތައްތަކެއް ފާހަގަވި ކަމަށެވެ. އެކަމަކު، ޖުމްލަކޮށް ބަލާއިރު ޓީމުގެ ކުޅުމާ މެދު ހިތްހަމަޖެހޭ ކަމަށް ސިމިއޯނީ ބުނެފައިވެ އެވެ،
"ގެޓާފޭ އިން ވަރަށް ވަރުގަދަ އަށް ކުޅުނު. އެހެންވީމަ، އަހަރަމެންނަށް ޑިފެންސަށް ސަމާލުކަން ދޭން މަޖުބޫރުވި. އެކަމަކު ދެވަނަ ލަނޑާއެކު އަހަރަމެންނަށް ހަމަޖެހިލާނެ ފުރުސަތު ލިބުނު،" ސިމިއޯނީ ބުންޏެވެ،
ސްޕެނިޝް ލީގުގައި ރޭ މަޔޯކާ އާއި އެތުލެޓިކް ބިލްބާއޯ ބައްދަލުކުރި މެޗު ލަނޑެއް ނުޖެހި އެއްވަރުވިއިރު، އެލްޗޭ އަތުން ރެއާލް ބެޓިސް މޮޅުވީ 3-0 އިންނެވެ.
އެތުލެޓިކޯ އަށް ކުޅެމުން އަންނަ ބްރެޒިލް ފޯވާޑް، މަޓެއުސް ކޫންޏާ ގަންނަން ގިނަ ކްލަބްތަކަކުން ޝައުގުވެރިވެ އެވެ. މެންޗެސްޓާ ޔުނައިޓެޑުން ވެސް ކޫންޏާއާ މަޝްވަރާކޮށްފައިވާއިރު، އޭނާ ގެންދަން އެ ކްލަބުން 50 މިލިއަން ޑޮލަރުގެ ބިޑެއް ނުކުރާނެ ކަމަށް އިނގިރޭސި މީޑިއާ ރިޕޯޓްތައް ބުނެ އެވެ.
