މިލާން (އޮގަސްޓް 16) - އިޓާލިއަން ލީގުގައި ޔުވެންޓަސް ކުޅުނު ފުރަތަމަ މެޗުގައި ޑޫސާން ވްލަހޯވިޗްގެ ދެ ގޯލާ އެކު 3-0 އިން ސަސުއޯލޯ ބަލިކޮށްފި އެވެ.
ޔުވެންޓަސް ދަނޑުގައި ރޭ ކުޅުނު މެޗުގެ 26 ވަނަ މިނިޓްގައި އެ ޓީމަށް ލީޑުނަގައިދިނީ މި ފަހަރު ޕީއެސްޖީ ދޫކޮށް ޔުވެންޓަސްއާ ގުޅުނު އެންހެލް ޑި މާރިއާ އެވެ. އަލެކްސް ސަންޑްރޯ ނަަގައިދިން ހުރަހަކުން ޑި މާރިއާ ޖެހި ވޮލީ ގޯލަށް ވަނީ ފެނުގައި ޖެހިފައި ސަސުއޯލޯ ކީޕަރު އަންދްރެއާ ކޮންސީލީ އަތްމަތިން ގޮހެވެ.
ފުރަތަމަ ހާފު ނިމުމުގެ ކުރިން ޔުވެންޓަސްގެ ދެ ވަނަ ގޯލު ޖެހީ ޕެނަލްޓީ އަކުން ވްލަހޯވިޗް އެވެ. މިއީ އޭރިއާތެރެއިން ސަސުއޯލޯގެ ޖިއަން މާކޯ ފެރާރީ، ވްލަހޯވިޗަށް ކުރި ފައުލަކަށް ދިން ޕެނަލްޓީ އެކެވެ. މި ޕެނަލްޓީން ގޯލު ޖެހުމުގެ ކުރިން ވްލަހޯވިޗް ފޮނުވާލި ދެ ޝޮޓެއް ދިޔައީ ގޯލާ ސީދާނުވެ އެވެ.
ދެ ވަނަ ހާފްގެ ކުޅުން ފެށިގެން ފަސް މިނިޓް ތެރޭ ވްލަހޯވިޗް ވަނީ ޔުވެންޓަސްގެ ތިން ވަނަ ގޯލު ޖަހައިފަ އެވެ. އޭނާ މި ގޯލު ޖެހީ އޭރިއާތެރެއިން ޑި މާރިއާ ހުސްކޮށްލާފައި ދިން ބޯޅައަކުންނެވެ. މި ގޯލު ޖެހުމުގެ ދެ މިނިޓް ކުރިން، ކައުންޓަ އެޓޭކެއްގައި ޑި މާރިއާ ޖެހި ޝޮޓެއް ދިޔައީ ދަނޑިކައިރިން ބޭރުންނެވެ.
ޖެނުއަރީ މަހު ފިއޮރެންޓީނާ ދޫކޮށް ޔުވެންޓަސް އަށް ބަދަލުވުމަށް ފަހު ވްލަހޯވިޗް އަންނަނީ މޮޅު ކުޅުމެއް ދައްކަމުންނެވެ. ޔުވެންޓަސް އިން ރޭގެ މެޗުގައި ވަނީ ދާދި ފަހުން އެ ޓީމާ ގުޅުނު ސާބިއާގެ ވިންްގް، ފިލިޕް ކޮސްޓިޗް އަށް ފުރުސަތު ދީފަ އެވެ. އެކަމަކު، އަނިޔާގެ ސަބަބުން ޕައުލް ޕޮގްބާ އާއި ކީޕަރު، ވޮޒްޝިއޭ ޝެޒްނީ ހުރީ ކުޅުމާ ދުރުގަ އެވެ.
އިޓާލިއަން ލީގުގައި .ރޭ ނަޕޯލީ ވަނީ 5-2 އިން ވެރޯނާ ބަލިކޮށްފަ އެވެ. ނަޕޯލީގެ ނައިޖީރިއާ ފޯވާޑް ވިކްޓަ އޮސީމެއިން އާ ނަސްލީ ގޮތުން ވެރޯނާގެ ސަޕޯޓަރުން ދިމާކޮށްލި މި މެޗުގައި އޭނާ ގޯލު ޖެހި އެެވެ. ދެން އެ ޓީމުގެ ގޯލުތައް ޖެހީ މަޓެއޯ ޕޮލިޓާނޯ، ކްވިޗާ ވަަރަޓްޝްކޭލިއާ، ޕިއޮޓްރް ޒިއެލިންސްކީ އަދި ސްޓަނިސްލާވް ލޮބޯޓްކާ އެެވެ. ވެރޯނާގެ ލަނޑުތައް ޖެހީ ކެވިން ލަޒާނިއާ އާއި ތޯމަސް ހެންރީ އެވެ.
