މެޑްރިޑް (އޮގަސްޓް 15) - ސްޕެނިޝް ލީގުގެ އެންމެ ފަހުގެ ޗެމްޕިއަން، ރެއާލް މެޑްރިޑް އާ ސީޒަނުގެ ފުރަތަމަ މެޗުގައި ފަހަތުން އަރަައި އަލްމެރިއާ އަތުން 2-1 އިން މޮޅުވެއްޖެ އެވެ.
ރެއާލުން ރޭގެ މެޗު ފަށައިގެން ކުރިއަށް ޖެހިގެން ކުޅެމުން ދަނިކޮށް، ހަ ވަނަ މިނިޓްގައި އަލްމެރިއާ އިން ލީޑުނެގި އެވެ. ރެއާލް ޑިފެންސް ފަހަތަށް އަލްމެރިއާގެ އިނީގޯ އެގުއާރާސް ދިން ބޯޅައެއް ހިފައިގެން އޭރިއާތެރެއަށް ވަދެ، އަލްމެރިއާ އަށް ލީޑުނަގައިިދިނީ ލާޖީ ރަމަޒާނީ އެވެ.
ފުރަތަމަ ހާފު ނިމުނުއިރު، ރެއާލަށް ނަތީޖާ ހަމަނުކުރެވުނު އެންމެ ބޮޑު ސަބަބަކީ އަލްމެރިއާ ކީޕަރު ފެނާންޑޯ މާޓިނޭޒްގެ ހުށިޔާރުކަމެވެ. އޭނާ ވަނީ ރެއާލުން ފުރަތަމަ ހާފުގައި ފޮނުވާލި ހަމަލާތައް ހުއްޓުވައިފަ އެވެ. ދެ ވަނަ ހާފް ފެށިގެން އަލްމޭރިއާ އިން ލީޑުފުޅާކުރަން އެ ޓީމުގެ އުމަރު ސާދިގު ޖެހި ޝޮޓް ރެއާލް ކީޕަރު ތިބައު ކޯޓުއާ ވަނީ މަތަކޮށްފަ އެވެ.
ރެެއާލުން އެއްވަރުކުރީ 61 ވަނަ މިނިޓްގައި ލޫކަސް ވަޒްކޭޒް ޖެހި ގޯލުންނެވެ. ފުރަތަމަ ހާފުގައި ވަޒްކޭޒް ޖެހި ގޯލެއް އޮފްސައިޑްވީ ނަމަވެސް ދެ ވަނަ ހާފުގައި ވިނީޝިއުސް ޖޫނިއާ އާއި ކަރިމް ބެންޒެމާ ގުޅިގެން ކުރި އެޓޭކެއްގައި އޭރިއާތެރެއިން ވަޒްކޭޒަށް ލިބުނު ބޯޅަ އޭނާ ވަނީ ގޯލަށް ފޮނުވާލައިފަ އެވެ.
މެޗުގެ 75 ވަނަ މިނިޓްގައި ރެއާލް މޮޅުވި ގޯލު ޖެހީ ޑޭވިޑް އަލަބާ އެވެ. އޭރިއާބޭރުން ލިބުނު ހިލޭ ޖެހުމަކުން އަަލަބާ ފޮނުވާލި ބޯޅަ ގޯލަށް ވަންއިރު، އަލްމޭރިއާ ކީޕަރު މާޓީނޭޒަށް އެ ބޯޅަ ހުއްޓުވަން މާ ބޮޑު ކަމެއް ނުކުރެވުނެވެ.
ރެއާލްގެ ކޯޗު ކާލޯ އަންޗެލޮޓީ ބުނީ މެޗު ދިޔަ ގޮތަށް ބަލާއިރު، ފަހަތުން އަރައި މޮޅުވެވުނީތީ އުފާކުރާ ކަމަށާއި ރެއާލަށް ގޯލެއް ޖެހުނު ހިސާބުން ފެށިގެން މެޗުން މޮޅުވެވޭނެ ކަމުގެ އިތުބާރު ބޮޑުވި ކަމަށެވެ.
