ލިވަޕޫލް (އޮގަސްޓް 9) - ލިވަޕޫލަށް ކުޅެމުން އަންނަ ސްޕެއިނުގެ މިޑްފީލްޑަރު، ތިއާގޯ އަލްކަންޓާރާ އަށް ލިބުނު އަނިޔާގެ ސަބަބުން މަހަކަށް ވުރެ ގިނަ ދުވަސް ކުޅުމާ ދުރުގައި ހުންނަން ޖެހިއްޖެ އެވެ.
ތިއާގޯ، 31، ފަލަމަސްގަނޑަށް އަނިޔާވީ މިދިިޔަ ހޮނިހިރު ދުވަހު އިނގިރޭސި ޕްރިމިއާ ލީގުގައި ލިވަޕޫލުން 2-2 އިން ފުލަމްއާ އެއްވަރުވި މެޗުގަ އެވެ. އެ މެޗުގެ 51 ވަނަ މިނިޓްގައި ތިއާގޯ އަށް އަނިޔާވެގެން ބަދަލުކުރި އެވެ. އަނިޔާގެ ތަފްސީލް ދެނެގަންނަން ހެދި ޓެސްޓްތަކުން އެނގުނީ ފަލަމަސްގަނޑަށް ސީރިއަސް އަނިޔާއެއް ލިބިފައިވާ ކަމެވެ.
މިޑިއާ ރިޕޯޓްތައް ބުނާގޮތުން ތިއާގޯ އަށް އެންމެ އަވަހަށް ވެސް ކުޅުމަށް އެނބުރި އާދެވޭނީ 4-6 ހަފްތާ ތެރޭގަ އެވެ. މާނަ އަކީ އޭނާ އަށް ޔަގީނުން ވެސް އެއް މަސް ގެއްލޭނެ ކަމެވެ. ތިއާގޯ ހަ ހަފްތާ އަށް ކުޅުމާ ދުރުގައި ހުންނަން ޖެހިއްޖެނަމަ ގާތްގަނޑަކަށް ލިވަޕޫލުން ދެން ކުޅޭ ނުވަ މެޗުގައި އޭނާ ނުފެންނާނެ އެވެ. އޭގެ ތެރޭގައި ޗެމްޕިއަންސް ލީގުގެ ގްރޫޕް ސްޓޭޖުގެ މެޗުތައް ވެސް ހިމެނޭނެ އެވެ.
މިދިޔަ ސީޒަނުގައި ވެސް އަނިޔާގެ ސަބަބުން ތިއާގޯ އަށް ލިވަޕޫލްގެ ގިނަ މެޗުތަކެއްގައި ނުކުޅެވި ދިޔަ އެވެ. އެކަމަކު، އޭނާ ފިޓްކޮށް ހުރެ، ކުޅުނު ގިނަ މެޗުތަކުގައި ތަފާތު ދައްކައި، ގިނަ ބަޔެއްގެ ސަމާލުކަން ލިބުނެވެ.
ތިއާގޯ އަށް އަނިޔާވުމަކީ ލިވަޕޫލްގެ ކޯޗު، ޔާގެން ކްލޮޕަށް ދިމާވެފައިވާ ބޮލުގެ ރިހުން ބޮޑުވާނެ ސަބަބެކެވެ. ލިވަޕޫލްގެ މެދުތެރެއަށް ކުޅޭ އަލެކްސް އޮކްސްލޭޑް ޗަމްބަލެއިން އާއި ކާޓިން ޖޯންސް، އެނބުރި ދަނޑަށް އާދެވޭނެ ސީދާ މުއްދަތެއް ނޭނގޭ ގޮތަށް މި ވަގުތު އަނިޔާގައި ހުރިއިރު، ނަބީ ކެއިޓާގެ ފިޓްނަސް ވެސް އެއްކޮށް ރަނގަޅެއް ނޫނެވެ.
ލިވަޕޫލްގެ މިޑްފީލްޑަރުންނަށް ދިމާވެފައިވާ އަނިޔާގެ މައްސަލަތަކުގެ ސަބަބުން އެ ކްލަބަށް އޮތް އެންމެ ރަނގަޅު ހައްލަކީ ޓްރާންސްފާ ބާޒާރަށް ވަދެ، އާ މިޑްފީލްޑަރެއް ހޯދުން ކަމަށްވާނަަމަ އެކަން އެ ގޮތަށް ކުރާނެ ކަމުގެ އިޝާރާތެއް ކްލޮޕް ވަނީ ފުލަމް މެޗަށް ފަހު އޮތް ނޫސްވެރިންގެ ބައްދަލުވުމުގައި ދީފަ އެވެ.
