ލަންޑަން (އޮގަސްޓް 3) - ދެ ވަނަ ޑިވިޝަން ޗެމްޕިއަނުންގެ ގޮތުގައި މި ފަހަރު ޕްރިމިއާ ލީގަށް ޕްރޮމޯޓްވި ފުލަމް އިން އާސެނަލަށް ކުޅެމުން އައި ޖަރުމަނުގެ ގޯލްކީޕަރު ބާން ލެނޯގެ ސޮއި ހޯދައިފި އެވެ.
ލެނޯ، 30، އާސެނަލް ދޫކޮށް ފުލަމް އަށް ސޮއިކުރީ 10 މިލިއަން ޑޮލަރުގެ ޑީލެއްގެ ދަށުންނެވެ. ފުލަމްއާ އެކު ލެނޯ އެއްބަސްވީ ތިން އަހަރުގެ ކޮންޓްރެކްޓަކަށެވެ.
މިދިޔަ ސީޒަނުގައި އާސެނަލުން 30 މިލިއަން ޑޮލަރު ދީފައި، އިނގިރޭސި ގޯލްކީޕަރު އާރޮން ރަމްސްޑޭލް ގަތް ފަހުން ލެނޯ އަށް ވަނީ އާސެނަލްގައި މަގާމު ގެއްލިފަ އެވެ. މިދިޔަ ސީޒަނުގައި ލެނޯ ކުޅެފައިވަނީ އެންމެ ނުވަ މެޗުގަ އެވެ. ލެނޯ ދޫކޮށްލަން މި ފަހަރު އާސެނަލުން ފުރަތަމަ ނިންމީ ލޯން ޑީލެއްގަ އެވެ. އެކަމަކު، އެ ގޮތަށް ލެނޯ ބޭނުންނުވާތީ ދާއިމީ ކޮންޓްރެކްޓެއްގައި ވިއްކާލީ އެވެ.
ޖަރުމަނުގެ ބަޔާ ލެވަކޫސަން ދޫކޮށް 2018 ވަނަ އަހަރު ލެނޯ އާސެނަލަށް ބަދަލުވީ 24 މިލިއަން ޑޮަލަރުގެ ފީ އަކަށެެވެ. އާސެނަލަށް ކުޅެދިން 125 މެޗުން އޭނާ ވަނީ 37 ކްލީން ޝީޓް ފުރިހަމަކޮށްފަ އެވެ. އަނިޔާގެ މައްސަލަތަކުގެ ސަބަބުން އާސެނަލްގައި ލެނޯ އަށް އެއް ފޯމެއްގައި ރަނގަޅަށް ކުޅެވޭ ގޮތެއްނުވި އެވެ. އޭނާ އާސެނަލްގައި އެންމެ ރަނގަޅަށް ކުޅެމުންދިޔަ ދުވަސްވަރުގައި ޕޯޗުގަލްގެ ބެންފީކާ އިން ވަނީ ހުށަހެޅުމެއް ލިބިފަ އެވެ. އެކަމަކު، އެ ފަހަރު އޭނާ ނިންމީ އާސެނަލްގައި މަޑުކުރާށެވެ.
ކުރިން ހަލް ސިޓީ, އެވަޓަން އާއި ވަޓްފޯޑަށް ކޯޗުކޮށްދިން، ޕޯޗުގީސް ކޯޗު މާކޯސް ސިލްވާގެ އިރުޝާދުގެ ދަށުން މި ފަހަރުގެ ޕްރިމިއާ ލީގަށް ތައްޔާރުވާ ފުލަމް އިން ވަނީ ރަނގަޅު ޓްރާންސްފާތަކެއް ކޮށްފަ އެވެ. އެ ގޮތުން ސްޕޯޓިން ލިޒްބަންގެ މިޑްފީލްޑަރު ޕަލީނިއާ، މެންޗެސްޓާ ޔުނައިޓެޑްގެ މިޑްފީލްޑަރު އަންޑްރެއަސް ޕެރޭރާ، ވުލްފްސްބާގްގެ ކަނާތު ބެކް، ކެވިން އެމްބާބޫ އަދި ޝަހުތަރު ޑޮނެސްކަށް ކުޅެމުން އައި ވިންގް، މޮނޯ ސޮލޮމަން ވަނީ ފުލަމްއާ ގުޅިފަ އެވެ.
މިއީ ފަސް އަހަރު ތެރޭ ފުލަމް އިން ޕްރިމިއާ ލީގަށް ޕްރޮމޯޓްވެގެން ވާދަކުރާ ތިން ވަނަ ފަހަރެވެ. މި ފަހަރުގެ ޕްރިމިއާ ލީގުގެ ސީޒަނުގައި ފުލަމް ކުޅޭ ފުރަތަމަ މެޗުގައި ބައްދަލުކުރާނީ ލިވަޕޫލްއާ އެވެ.
