ދެކުނު އޭޝިއާގެ ރެކޯޑް ހޯލްޑަރު ލަންކާގެ އަބޭކޫން ކޮމަންވެލްތު ސެމީ ފައިނަލަށް

ބާމިންހަމް (އޮގަސްޓް 3) - މިދިޔަ މަހު ދެކުނު އޭޝިއާގެ 100 މީޓަރު ދުވުމުގެ ރެކޯޑް މުގުރާލި ސްރީ ލަންކާގެ ސްޕްރިންޓަރު، ޔުޕުން އަބޭކޫން މިހާރު އިނގިރޭސިވިލާތުގެ ބާމިންހަމްގައި ކުރިއަށްދާ ކޮމަންވެލްތު ގޭމްސްގެ 100 މީޓަރު ދުވުމުގެ ސެމީ ފައިނަލަށް ދަތުރުކޮށްފި އެވެ.

ބާމިންހަމްގެ އަލެކްސަންޑަ ސްޓޭޑިއަމްގައި ކުރިއަށްދާ އެތުލެޓިކްސް އިވެންޓްތަކުގައި އިއްޔެ އަބޭކޫން ދުވެފައިވަނީ ހީޓް ހައެއްގަ އެވެ. އޭނާ ސެމީ ފައިނަލަށް ދަތުރުކުރީ އެ ހީޓް ކާމިޔާބު ކޮށްގެންނެވެ. އޭނާ ހީޓް އެއް ވަނަ ހޯދި ޓައިމިންއަކީ 10.6 ސިކުންތެވެ. އެންމެ ކައިރިން ވާދަކުރި ޓްރިންޑާޑް އެންޑް ޓޮބޭގޯގެ ކިއޯން ބެންޖަމިންގެ ޓައިމިން އަކީ 10.34 ސިކުންތެވެ.

އަބޭކޫން، 27، އަކީ މި ފަހަރުގެ ކޮމަންވެލްތު ގޭމްސްގެ ސެމީ ފައިނަލުން ފުރުސަތު ހޯދި ދެކުނު އޭޝިއާގެ ހަމައެކަނި ދުވުންތެރިޔާ އެވެ. ރާއްޖެ އާއި އިންޑިއާ އަދި ޕާކިސްތާންގެ ދުވުންތެރިން ވެސް ވަނީ މި އިވެންޓްގައި ދުވެފަ އެވެ.

ކޮމަންވެލްތު ގޭމްސްގެ ހީޓް ހައެއްގައި އަބޭކޫން (ކ.2) ދުވަނީ.--- ފޮޓޯ: ގެޓީއިމޭޖަސް

މި ފަހަރުގެ ކޮމަންވެލްތު ގޭމްސް އަށް އައިއިރު އަބޭކޫން ހުރީ ކެރިއަރުގެ އެންމެ ރަނގަޅު ފޯމުގަ އެވެ. އޭނާ ވަނީ މިދިޔަ މަހުގެ ކުރީކޮޅުގައި 10 ސިކުންތަށް ވުރެ އަވަހަށް 100 މީޓަރު ރޭސް ނިންމި ދެކުނު އޭޝިއާގެ ފުރަތަމަ ދުވުންތެރިޔާގެ ޝަރަފް ހޯދައިފަ އެވެ.

އިޓަލީގައި ޓްރެއިނިން ހަަދަމުން އަންނަ އަބެކޫން ވަނީ ސްވިޒަލެންޑްގައި މިދިޔަ މަހު ބޭއްވި މުބާރާތެއްގެ 100 މީޓަރު ރޭސް 9.96 ސިކުންތުން ނިންމައިފަ އެވެ. މިއާ އެކު، އޭނާ ވެފައިވަނީ މުުޅި ދުނިޔޭގައި ވެސް 10 ސިކުންތަށް ވުރެ އަވަހަށް އެ ރޭސް ނިންމި 137 ވަނަ އެތުލީޓަށެވެ.

ދިހަ ސިކުންތަށް ވުރެ އަވަހަށް (ސަބް10 ރެކޯޑް) އޮތް ދުވުންތެރިން ތިބީ މުޅި ދުނިޔޭގެ ނިސްބަތުން ބެލިޔަސް 32 ގައުމުގަ އެވެ. ލަންކާ އަކީ އެ ލިސްޓުގައި އޮތް ދެކުނު އޭޝިއާގެ ހަމައެކަނި ގައުމެވެ.

އިޓަލީގެ މަޝްހޫރު އޮލިމްޕިއަން، ކްލައުޑިއޯ ލިޗިއަޑެއްލޯ ކައިރިން ތަމްރީން ހަދާ އަބޭކޫން ވާދަކުރާނީ ކޮމަންވެލްތު ގޭމްސްގެ ތިން ވަނަ ސެމީ ފައިނަލުގަ އެވެ. މި ސެމީގައި އޭނާއާ ދެކޮޅަށް ނުކުންނަ ބާކީ އަށް ދުވުންތެރިންގެ ތެރޭގައި 10 ސިކުންތަށް ވުރެ އަވަހަށް 100 މީޓަރު ރޭސް ނިންމާފައިވާ އިތުރު ތިން ސްޕްރިންޓަރުން ހިމެނެ އެެވެ. އެއީ ނައިޖީރިއާގެ ރޭމަންޑް އެންކެވޯ، ގާނާގެ ބެންޖަމިން އަޒަމާޓީ އަދި އިންގްލެންޑްގެ ނެތަނީލް މިޗެލް-ބްލޭކް އެވެ.