ދުނިޔޭގައި ބާއްވާ އެންމެ ބޮޑު ފުޓްބޯޅަ މުބާރާތް، ފީފާ ވޯލްޑް ކަޕުން އޭޝިއާގެ ގައުމުތަކަށް ދޭ ޖާގަ އިތުރުކުރަން ނިންމައިފި އެވެ.
މިހާތަނަށް ފީފާ ވޯލްޑް ކަޕަކުން އޭޝިއާ އަށް ލިބެނީ 4.5 ޖާގަ އެވެ. އެކަމަކު، ފީފާ އިން 2026 ވަނަ އަހަރު ކެނަޑާ، އެމެރިކާ އަދި މެކްސިކޯގައި ބާއްވާ ވޯލްޑް ކަޕުން ފެށިގެން އެ މުބާރާތުގައި 48 ގައުމަށް ވާދަކުރެވޭ ގޮތް ހެދުމާ އެކު، އޭޝިއާގެ ގައުމުތަކަށް ލިބޭ ޖާގަ ވަނީ 8.5 އަށް އިތުރުވެފަ އެވެ. މާނަ އަކީ އޭޝިއާގެ އަށް ގައުމަށް ވޯލްޑް ކަޕްގެ ސީދާ ޖާގަ ލިބޭއިރު، އެއް ޓީމަކަށް އިންޓަ ކޮންޓިނެންޝިއަލް ޕްލޭއޮފްގައި ކުޅެން ލިބޭނެ އެވެ.
އޭއެފްސީން ވަނީ މިހާރު ކުރިއަށްދާ ގޮތަށް ފީފާ ވޯލްޑް ކަޕާއި އޭޝިއަން ކަޕްގެ ކޮލިފައިން، ޖޮއިންޓް ކޮލިފިކޭޝަނެއް ގޮތަށް ކުރިއަށްގެންދަން ނިންމައިފަ އެވެ. މިހާރު ރޭވިފައިވާ ގޮތުން ވޯލްޑް ކަޕް ކޮލިފައިންގެ މެޗުތައް ބެހިގެންދާނީ ޖުމްލަ ހަތަރު ބުރަކަށެވެ.
އެ ގޮތުން ޕްރިލިމިނަރީ ފުރަތަމަ ބުރުގައި އޭއެފްސީގެ ރޭންކިން 26 އިން 47 ގައި ހިމެނޭ ގައުމުތަކުގެ މެދުގައި ހޯމް އެންޑް އަވޭ ފޯމެޓަށް ބުރެއް ކުޅޭނެ އެވެ. އެ މެޗުތަކުން މޮޅުވާ 11 ޓީމެއް ކޮލިފައިވާނީ ޕްރިލިމިނަރީ ކޮލިފައިން ދެ ވަނަ ބުރަށެވެ. މި ބުުރުގައި އޭއެފްސީގެ ރޭންކިން ގަދަ 25 އާއި ފުރަތަަަމަ ބުރުން އައި 11 ޓީމު އެއްކޮށް، ޖުމްލަ 36 ގައުމު ބަހާލާފައިވަނީ ނުވަ ގްރޫޕަކަށެވެ. އެއީ ކޮންމެ ގްރޫޕެއްގައި ހަތަރު ޓީމު ހިމެނޭ ގޮތަށެވެ. މި ގްރޫޕްތަކުން، ކޮންމެ ގްރޫޕެއްގެ ގަދަ ދެ ޓީމެއް ކޮލިފައިވާނީ އޭޝިއަން ކަޕް ކޮލިފައިން އަށެވެ. އެއީ ޖުމްލަ 18 ޓީމެވެ.
އޭޝިއަން ކަޕް ކޮލިފައިންގައި އެ 18 ޓީމު ބަހާލާނީ ތިން ގްރޫޕަކަށެވެ. އެއީ ކޮންމެ ގްރޫޕެއްގައި ހަ ޓީމު ހިމެނޭ ގޮތަށެވެ. އެ ތިން ގްރޫޕްގެ ޓީމުތަކުގެ މެދުގައި ހޯމް އެންޑް އަވޭ ފޯމެޓަށް ކުޅުމަށް ފަހު، ކޮންމެ ގްރޫޕެއްގެ ގަދަ ދެ ޓީމަކަށް ސީދާ ވޯލްޑް ކަޕް ޖާގަ ލިބޭނެ އެވެ.
އޭޝިއަން ކަޕް ކޮލިފައިން ގްރޫޕްތަކުން ތިން ވަނަ އާއި ހަތަރު ވަނަ ޓީމުތަކަށް އަދި ވޯލްޑް ކަޕްގެ ފުރުސަތު އޮންނާނެ އެވެ. އެ ގޮތުން ތިން ވަނަ އާއި ހަތަރު ވަނަ ޓީމުތައް (ޖުމްލަ ހަ ޓީމު)، ބަހާލާނީ ދެ ގްރޫޕަކަށެވެ. އެއީ ކޮންމެ ގްރޫޕެއްގައި ތިން ޓީމު ހިމެނޭ ގޮތަށެވެ. އޭގެއިން ކޮންމެ ގްރޫޕެއްގެ އެއް ވަނަ އަށް ވެސް ވޯލްޑް ކަޕްގެ ސީދާ ޖާގަ ލިބޭނެ އެވެ. މި ދެ ގްރޫޕްގެ ދެ ވަނައިގެ މެދުގައި މެޗެއް ކުޅުމަށް ފަހު އެ ތަނުން މޮޅުވާ ޓީމެއް ކުޅޭނީ އިންޓަކޮންޓިނެންޝިއަލް ޕްލޭއޮފްގަ އެވެ.
