ލަސް ވޭގަސް, ޔުނައިޓެޑް ސްޓޭޓްސް (ޖުލައި 26) - ޔުވެންޓަސްއާ ދާދި ފަހުން ގުޅުނު ފްރާންސް މިޑްފީލްޑަރު ޕައުލް ޕޮގްބާގެ ކަކުލަށް ލިބުނު ސީރިއަސް އަނިޔާއަކާ ގުޅިގެން، ކުޅުމާ ދުރުގައި ދުވަސްތަކެއް ހޭދަކުރަންޖެހިދާނެ ކަމަށް ބެލެވިއްޖެ އެވެ.
މެންޗެސްޓާ ޔުނައިޓަޑްގައި ހަ އަހަރު ހޭދަކުރުމަށް ފަހު، މި ފަހަރުގެ ޓްރާންސްފާ މާކެޓްގައި ހިލޭ ޓްރާންސްފާއެއްގައި ޔުވެންޓަސްއާ ގުޅުނު ޕޮގްބާގެ ކަނާތު ކަކުލަށް ވަނީ އަނިޔާވެފަ އެވެ.
ޔުވެންޓަސް އިން ބުނީ ފުރަތަމަ ހެދި ޓެސްޓްތަކުން ޕޮގްބާގެ ކަނާތު ކަކުލުގެ މެނިސްކަސް އިރައިގެން ގޮސްފައިވާ ކަމަށް ބެލެވޭ ކަމަށެވެ. އެހެންކަމުން، އެމެރިކާގައި މިހާރު ޕްރީ ސީޒަން ޓުއާއެއްގައި ތިބި ޔުވެންޓަސް އިން އަންގާރަ ދުވަހު ބާސެލޯނާއާ ދެކޮޅަށް ކުޅޭ މެޗުގައި ޕޮގްބާ ނުފެންނާނެ އެވެ.
ބާސެލޯނާ މެޗަށް ޓީމާއެކު ދަތުރުނުކޮށް، ޕޮގްބާ ސްޕެޝަލިސްޓް ޑޮކްޓަރަކަށް ދައްކައި، އިތުރު ޓެސްޓްތައް ހަދާނެ ކަމަށް ޔުވެންޓަސް އިން ބުނެ އެވެ.
މި ވަރުގެ އަނިޔާއަކާ ގުޅިގެން ސާޖަރީއެއް ހަދަންޖެހޭނެ ކަމަށް ބެލެވެ އެވެ. ސާޖަރީއެއް ހަދައިފި ނަމަ، ޕޮގްބާ އަށް ސީޒަންގެ ކުރީކޮޅު އޮންނަ މެޗުތަކެއް ގެއްލޭނެ އެވެ.
އަނިޔާގެ އެކި މައްސަލަތަކާ ގުޅިގެން، ޕޮގްބާ އަށް މިދިޔަ ސީޒަންގައި ވެސް ގިނަ މެޗުތަކެއް ގެއްލުނެވެ. އަދި އެނާ ފިޓުކޮށް ހުރިއިރު ވެސް، ޔުނައިޓަޑްގައި މިދިޔަ ސީޒަންގައި ތިބި ދެ ކޯޗުން ކަމަށްވާ އޮލޭ ގަނާ ސޮލްސަޔާ އާއި ރަލްފް ރަންގްނިކްގެ ޓީމުން އޭނާ އަށް ބައެއް ފަހަރު ޖާގަ ނުލިބެ އެވެ. -- އޭއެފްޕީ
