ރާއްޖޭގައި ބާއްވާ އެންމެ ޒަމާންވީ ފޯރިގަދަ، ފުޓްސަލް މުބާރާތް ކަމަށްވާ ކްލަބް މޯލްޑިވްސް ކަޕްގެ މީޑިއާ ޕާޓްނަރަކަށް "އަދަދު" ނޫސް ހަމަޖައްސައިފި އެވެ.
އަންނަ ސެޕްޓެމްބަރު މަހު ކްލަބް މޯލްޑިވްސް ކަޕް ފަށަން ނިންމާފައިވާއިރު، "އަދަދު" އާ އެކު ކްލަބް މޯލްޑިވްސް އިިން އެއްބަސްވުމެއްގައި ސޮއިކޮށްފައިވަނީ މުބާރާތް އެންމެ އެކަށީގެންވާ ރަނގަޅު ފެންވަރެއްގައި ޕްރޮމޯޓް ކުރުމުގެ ބޭނުމުގަ އެވެ.
ކްލަބް މޯލްޑިވްސްގެ ފަރާތުން ސޮއިކުރީ ވައިސް ޗެއާމަން އިބްރާހިމް އަޝްރަފް އެވެ. އަދި "އަދަދު" ނޫހުގެ ފަަރާތުން ސޮއިކުރެއްވީ އެސޯސިއޭޓް އެޑިޓަރު/ ސްޕޯޓްސް، އައްޒާމް އަލިފުޅު އެވެ.
ކްލަބް މޯލްޑިވްސް ކަޕްގެ ތައްޔާރީއާ ގުޅޭ ހުރިހާ މައުލޫމާތަކާއި މުބާރާތް ފެށިގެން ނިޔަލަށް ހުރިހާ މެޗެއްގެ މައުލޫމާތު "އަދަދު" އިން ގެނެސްދޭނެ އެވެ.
ސަރުކާރު ހިއްސާވާ ކުންފުނިތަކާއި އަމިއްލަ ކުންފުނިތަކަށް ހުޅުވާލައިގެން ކްލަބް މޯލްޑިވްސް އިން 2006 ވަނަ އަހަރުން ފެށިގެން ގަވާއިދުން ބާއްވަމުން އައި ކްލަބް މޯލްޑިވްސް ކަޕަކީ އަހަރެއްގެ ތެރޭގައި އެންމެ ގިނަ ބަޔަކު އިންތިޒާރުކުރާ މުބާރާތެވެ.
ކޮވިޑް-19ގެ ސަބަބުން އެކި ކަންކަމަށް އައި މެދުކެނޑުމާ ހެދި 2020 ވަނަ އަހަރު ކްލަބް މޯލްޑިވްސް ކަޕް ނުބޭއްވުނެވެ. އެކަމަކު، މިދިޔަ އަހަރު އަލުން މުބާރާތް ބޭއްވި އެވެ. އެއީ މިދިޔަ ނޮވެމްބަރާއި ޑިސެމްބަރު މަހުގަ އެވެ.
ސެޕްޓެމްބަރު މަހު ތިން ވަނަ ދުވަހު މި އަހަރުގެ ކްލަބް މޯލްޑިވްސް ކަޕްގެ އިތުރުން ކްލަބް މޯލްޑިވްސް އިން އަންހެން ފުޓްބޯޅަ އަށް ހާއްސަކޮށް ބާއްވަމުން އަންނަ 18/30 ފުޓްސަލް ފިއެސްޓާ ފަށަން ތާވަލުކޮށްފަ އެވެ. އެންމެ ފަހުން ބޭއްވި ކްލަބް މޯލްޑިވްސް ކަޕްގެ ޗެމްޕިއަންކަން ހޯދީ ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ ރޯޑް ރެކްރިއޭޝަން ކްލަބް (އާރްއާރްސީ) އެވެ. އެއީ ފައިނަލުގައި ފިއުލް ސަޕްލައި މޯލްޑިވްސް (އެފްއެސްއެމް)، 4-0 އިން ބަލިކުރުމަށް ފަހު އެވެ. މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ވަނީ 7-4 ކްލަބް ވެމްކޯ ބަލިކޮށް، 18/30 ފުޓްސަލް ފިއެސްޓާގެ ޗެމްޕިއަންކަން، ޖެހިޖެހިގެން ތިން ފަހަރު ހޯދައިފަ އެވެ.
ކްލަބް މޯލްޑިވްސް އިން 18/30 ފުޓްސަލް ފިއެސްޓާ، 2010 ވަނަ އަހަރު ބާއްވަން ފެށިއިރު މިހާތަނަށް، އިމިގްރޭޝަނާއި އެމްއެންޑީއެފް އިން ވަނީ ޖެހިޖެހިގެން ދެ އަހަރު ޗެމްޕިއަންކަން ހޯދައިފަ އެވެ. އެކަމަކު، ޖެހިޖެހިގެން ތިން ފަހަރު މުބާރާތުގެ ތަށި އުފުލާލުމުގެ ޝަރަފް ލިބުނީ ހަމައެކަނި އެމްޕީއެލް އަށެވެ.
މިދިޔަ އަހަރު ރާއްޖޭގައި ބޭއްވި ސާފް ޗެމްޕިއަންޝިޕް ފުޓްބޯޅަ މުބާރާތުގެ ވެސް ޕާޓްނަރެއްގެ ގޮތުގައި މަސައްކަތް ކުރި "އަދަދު" ނޫހަކީ އަންނަ ހުކުރު ދުވަހު މާލޭގައި ފަށާ އިންޓަނޭޝަނަލް ބޮޑީބޯޑިން ކޯޕަރޭޝަން (އައިބީސީ)ގެ ބޮޑީބޯޑިން ވޯލްޑް ޓުއާގެ އެއް ލެގު ކަމަށްވާ "ވިޒިޓް މޯލްޑިވްސް ޕްރޯ 2022" ގެ މީޑިއާ ޕާޓްނަރެކެވެ.
"އަދަދު" ނޫހަކީ މޯލްޑިވްސް ބޮޑީބޯޑިން އެސޯސިއޭޝަން އޮފް މޯލްޑިވްސް (އެމްބީބީއޭ)ގެ އިތުރުން، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)، ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)، މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) އަދި ކްރިކެޓް ބޯޑް އޮފް މޯލްޑިވްސް (ސީބީއެމް)ގެ ވެސް ޕާޓްނަރެކެވެ.
