ރޯމް، އިޓަލީ (ޖުލައި 25) - ޔުވެންޓަސް އަށް ކްރިސްޓިއާނޯ ރޮނާލްޑޯ، 2018 ވަނަ އަހަރު ސޮއިކުރިއިރު، އެ ޓީމުގެ ޖޯޒީ 24 ގަޑިއިރު ތެރޭ އިޓަލީގައި ވިކިގެން ގާއިމްވި ރެކޯޑް ދާދި ފަހުން ރޯމާ އަށް ސޮއިކުރި ޕައޮލޯ ޑިބާލާ މުގުރާލައިފި އެވެ.
ރަސްމީ އެއްވެސް އިދާރާ އަކުން މިހާތަނަށް ޑިބާލާ، 28، ގެ ޖޯޒީ ވިކުނު އަދަދެއް ހާމަކޮށްފައިނުވި ނަމަވެސް އިޓަލީގެ ކުޅިވަރު ހަބަރު ފަތުރާ އިތުބާރު ހުރި މަސްދަރުތަކުން ކަށަަވަރުކުރާ ގޮތުގައި ޑިބާލާ ވަނީ އެ ރެކޯޑް މުގުރާލައިފަ އެވެ.
ރެއާލް މެޑްރިޑް ދޫކޮށް، 2018 ވަނަ އަހަރު ޔުވެންޓަސް އަށް ރޮނާލްޑޯ ބަދަލުވީ 100 މިލިއަން ޑޮލަރުގެ ޓްރާންސްފާ ފީ އަކަށެވެ. ރިޕޯޓްތައް ބުނާގޮތުން ޔުވެންޓަސް ކުޅުންތެރިއެއްގެ ގޮތުގައި ރޮނާލްޑޯ ތައާރަފްކުރުމާ އެކު ފުރަތަމަ 24 ގަޑިއިރު ތެރޭގައި އިޓަލީގައި އެކަނި ރޮނާލްޑޯގެ ޔުވެންޓަސްގެ ޖޯޒީގެ 520،000 ޖޯޒީ ވިކިފައިވެ އެވެ. އަދި ޑިބާލާ، ރޯމާ އަށް ސޮއިކުރިތާ ފުރަތަމަ 24 ގަޑިއިރު ތެރޭ، އޭނާގެ 535،000 އަށް ވުރެ ގިނަ ޖޯޒީ އިޓަލީގައި ވަނީ ވިކިފަ އެވެ.
ހިލޭ ޓްރާންސްފާއެއްގައި ރޯމާ އަށް ބަދަލުވެ، އެ ކްލަބާ އެކު ތިން އަހަރުގެ ކޮންޓްރެކްޓެއްގައި ސޮއިކުރި ޑިބާލާ އަށް ރޯމާ އިން ފުރަތަމަ ހުށަހެޅީ އެ ކްލަބްގެ ލެޖެންޑް ފްރެންޗެސްކޯ ޓޮޓީ ބޭނުންކުރި 10 ނަމްބަރު ޖޯޒީ އެވެ. އެކަމަކު، ޑިބާލާ ނިންމީ ގައުމީ ޓީމުގައި އޭނާ ބޭނުންކުރާ 21 ނަމްބަރަށް ކުޅުމަށެވެ.
ޓޮޓީގެ ނަމްބަރު ނުނަގާ ގޮތަށް ޑިބާލާ މި ވަގުތު ނިންމީ ހާއްސަ ސަބަބެއް އޮތުމުންނެވެ. ޑިބާލާ ބުނީ އެއްވެސް ކުޅުންތެރިއަކަށް ރޯމާ އަށް އައިސް ފުރަތަމަ ދުވަހު ޓޮޓީގެ ނަމްބަރު ނެގޭނެ ކަމަށް އޭނާ ގަބޫލުނުކުރާ ކަމަށެވެ. އެއީ އެ 10 ނަމްބަރު ޖޯޒީ އަކީ ވަރަށް ގިނަ ބަޔެއްގެ އިހުތިރާމު ލިބި އިތުބާރު ވެސް ހޯދާފައިވާ ނަމްބަރަކަށް ވާތީ، އެ ނަމްބަރު ޖަހައިގެން ކުޅެވޭނީ ރޯމާ އަށް ގިނަ ކަންތައްތަކެއް ކޮށްދިނުމަށް ފަހު ކަމަށް ޑިބާލާ ދެކޭތީ އެވެ.
ޑިބާލާ، ރޯމާ އަށް ބަދަލުވުމުގެ އެންމެ ބޮޑު ސަބަބަކީ އެ ޓީމުގެ ކޯޗު ހޯސޭ މޮރީނިއޯ އެވެ.
