ސައިޓާމާ، ޖަޕާން (ޖުލައި 25) - ޕީއެސްޖީގައި މަޑުކުރަން ބޭނުންވާ ކަމަށާއި އެ ކްލަބުގައި އެހެން މީހަކަށް ސާބިތުކޮށްދޭންޖެހޭ ކަމެއް ނެތް ކަމަށް ބްރެޒިލްގެ ތަރި ނޭމާ ބުނެފި އެވެ.
ނޭމާ ބުނީ ޕީއެސްޖީގައި އޭނާ އަށް ކުރިމަގާ މެދު މިހާތަނަށް ކްލަބުގެ މެނޭޖްމަންޓުން އޭނާއާ އެއްވެސް މަޝްވަރާއެއް ނުކުރާ ކަމަށެވެ. އެހެން ނަމަވެސް، އޭނާގެ ވިސްނުން ހުރީ ޕީއެސްޖީއާ އެކު ކުރިއަށްދާން ކަމަށް ނޭމާ ބުނެފައިވެ އެވެ.
"އަހަރެން ބޭނުންވަނީ ޕީއެސްޖީގައި މަޑުކުރަން. އަދި މިހާތަނަށް ކްލަބުން ކޮންޓުރެކްޓްއާ ގުޅޭ އެއްވެސް ވާހަކައެއް ނުދައްކާ. އެެހެންވީމަ ކްލަބުގެ ވިސްނުމެއް ނޭނގޭ،" ނޭމާ ،30، ބުންޏެވެ. "އެހެން މީހަކަށް އަހަރެން ސާބިތުކޮށްދޭންޖެހޭ އެއްވެސް ކަމެއް ނެތް. ހިތްހަމަޖެހިގެން ކުޅެވޭތޮ އަހަރެން ބަލާނީ."
މިދިޔަ ސީޒަނަށް ފަހު، ޕީއެސްޖީން ވަނީ އެ ޓީމުގެ ކޯޗުކަމުން މައުރީސިއޯ ޕޮޗެޓީނޯ ވަކިކޮށް، ނީސްގެ ކޯޗަކަށް ހުރި ކްރިސްޓޮފް ގަލްޓިއޭ އެ ޓީމުގެ ކޯޗަކަށް ހަމަޖައްސައިފަ އެވެ.
ނޭމާ ބުނީ ގަލްޓިއޭއާ މެދު އެއްޗެއް ބުނަން "އަދި މާ އަވަސް" ކަމަށެވެ.
ނޭމާއާ ގުޅޭގޮތުން ގަލްޓިއޭ ބުނީ ޕްރީ ސީޒަންގައި އޭނާ ވަރަށް ރަނގަޅަށް މަސައްކަތް ކުރަމުންދާ ކަމަށާއި ނޭމާ ފެންނަނީ "ވަރަށް ފިޓުކޮށް، ވަރަށް ހިތްހަމަޖެހިފައި" ކަމަށެވެ.
"ޓްރާންސްފާ ބާޒާރު ނިމޭއިރު، ހާލަތު ބަދަލުވާނެ ގޮތެއް އަހަންނަަށް ނޭނގޭ ބުނާކަށް. އެކަމަކު ނޭމާއާ މެދު ފެތުރޭ އަޑުތަކަށް އޭނާ ސަމާލުކަން ދޭހެން ހިޔެއް ނުވޭ. ވަރަށް ރަނގަޅަށް ޕްރީ ސީޒަންގައި އޭނާ ދަނީ މަސައްކަތްކުރަމުން،" ގަލްޓިއޭ ބުންޏެވެ.
މީގެ ފަސް އަހަރު ކުރިން 2017 ވަނަ އަހަރު، ދުނިޔޭގެ ރެކޯޑް ފީއެއް ކަމަށްވާ 234 މިލިއަން ޑޮލަރަށް ބާސެލޯނާ ދޫކޮށް ޕީއެސްޖީ އަށް ސޮއިކުރި ނޭމާ މި ވަގުތު އެ ކްލަބާ އެކު ކޮންޓްރެކްޓްގައި ހުރީ 2025 ވަނަ އަހަރުގެ ޖޫން މަހުގެ ނިޔަލަށެވެ. ޕީއެސްޖީ އަށް ކުޅެދިން 144 މެޗުން ނޭމާ ވަނީ އެ ޓީމަށް 100 ގޯލު ޖަހައި، 60 ގޯލު ޖަހަން ފުރުސަތު ތަނަވަސްކޮށްދީފަ އެވެ. މީގެ ތެރެއިން މިދިޔަ ސީޒަނު ލީގުގައި ޖެހުނީ 13 ގޯލެވެ.
