ރޮތާހަމް، އިންގްލެންޑް (ޖުލައި 24) - އެންމެ ފަހުގެ ޗެމްޕިއަން ނެދަލެންޑްސް 1-0 އިން ބަލިކޮށް، ފްރާންސް އިން މި ފަހަރުގެ އަންހެން ޔޫރޯ ފުޓްބޯޅަ މުބާރާތުގެ ސެމީ ފައިނަލުގެ ފަހު ޖާގަ ހޯދައިފި އެވެ.
ނެދަލެންޑްސް އިން 2017 ވަނަ އަހަރު ބޭއްވި އަންހެން ޔޫރޯ ފައިނަލުގައި ވަނީ ޑެންމާކް ބަލިކޮށްފަ އެވެ. އެކަމަކު، މި ފަހަރު ކުއާޓާ ފައިނަލުގައި ފްރާންސާ ދެކޮޅަށް 120 މިނިޓް ކުޅެގެން ބަލިވެ، މި ވަނީ މުބާރާތުން ކަޓައިފަ އެވެ.
އަންނަ އަންގާރަ އާއި ބުދަ ދުވަހު ދެ ސެމީ މެޗު ކުޅޭނެ އެވެ. ފުރަތަމަ ސެމީ ފައިނަލުގައި ކުޅޭނީ ސްވިޑެން އާއި އިންގްލެންޑް އެވެ. ދެ ވަނަ ސެމީ ފައިނަލުގައި ފްރާންސް ވާދަކުރާނީ ޖަރުމަނާ އެވެ.
މިރޭ ފްރާންސުން ނެދަލެންޑްސް ކޮޅަށް ޖެހި ހަމައެކަނި ގޯލު ކާމިޔާބުކުރީ އިތުރު ވަގުތުގެ ފުރަތަމަ ހާފުގައި ލިބުނު ޕެނަލްޓީ އަކުންނެެވެ. މިއީ ނެދަލެންޑްސްގެ އޭރިއާތެރެއިން އެ ޓީމުގެ ޑޮމިނީކް ޖެންސަން ފްރާންސްގެ ކަޑިޑިއާޓޫ ޑިއާނީ އަށް ކުރި ފައުލަކަށެވެ. ފްރާންސްގެ އީވް ޕެރީސިޓް ޖެހި ޕެނަލްޓީ ހުއްޓުވަން ނެދަލެންޑްސްގެ ކީޕަރު، ޑަފްން ވެން ޑޯމްސެލާ އަށް މާ ބޮޑު ކަމެއް ނުކުރެވުނެވެ.
ފްރާންސުން ރޭ ގޯލު ޖަހަން ފޮނުވާލި 10 ހަމަލާއެއް ނެދަލެންޑްސްގެ ގޯލްކީޕަރު ޑޯމްސެލާ ވަނީ ހުއްޓުވައިފަ އެވެ. މިއީ މި ފަހަރުގެ ޔޫރޯގެ އެއް މެޗެއްގައި ކީޕަރަކު ކުރި އެންމެ ގިނަ ސޭވް އެވެ. ރޭ ފްރާންސާ ދެކޮޅަށް ޑޯމްސެލާ ކުޅުނީ ގައުމީ ޖޯޒީގައި ކުޅެލަން ލިބުނު ފަސް ވަނަ މެޗުގަ އެވެ.
ސެމީ އަށް ނުކުންނައިރު، އިންގްލެންޑުން ވަނީ ކުއާޓާގައި އިތުރު ވަގުތު ކުޅެގެން ސްޕެއިން ބަލިކޮށްފަ އެވެ. ސެމީގައި ސްވިޑެންއާ ކުޅޭއިރު އެ ޓީމު ވެސް ރެކޯޑް ރަނގަޅެވެ. ސްވިޑެން އިން ވަނީ ކުއާޓާގައި ބެލްޖިއަމް އަތުން 1-0 އިން މޮޅުވެފަ އެވެ. ކުރިން ފަހަރު ސެމީގައި ކުޅުނު އޮސްޓްރިއާ އަތުން ޖަރުމަނު ވަނީ 2-0 އިން މޮޅުވެފަ އެވެ.
އަންހެން ޔޫރޯގެ ފައިނަލް އޮތީ މި މަހު 31 ވަނަ ދުވަހު ވެމްބްލީ ސްޓޭޑިއަމްގަ އެވެ.
