ހުވަދު އަތޮޅުގެ ރަށްތަކަށް ހުޅުވާލައިން، ގދ. މަޑަވެލީގައި ކުރިއަށްގެންދާ ފޯރިގަދަ މުބާރާތް ކަމަށްވާ، ތައްޔާރު ފުޓްސަލް 2022 ގެ ފައިނަލުން ދެއްވަދޫ އެފްސީ އާއި ލެޖެންޑްސް ފުރުސަތު ހޯދައިފި އެވެ.
ދެއްވަދޫ އާއި ލެޖެންޑްސް ފައިނަލުން ފުރުސަތު ހޯދީ މެޗަކުން ބަލިނުވެ އެވެ.
މަޑަވެލީ ކިއުވަން އެރިނާގައި ކުޅުނު ފުރަތަމަ ސެމީފައިނަލްގައި ބައްދަލުކުރީ ހޯޑެއްދޫ ސްޕޯޓްސް އާއި ދެއްވަދޫ އެފްސީ އެވެ. އިބްރާހިމް ސިނާހު އާއި މުހައްމަދު އިންޝާއު އަހުމަދުގެ އިތުރުން ރާހިލް ރަޝީދުގެ މޮޅު ކުޅުމާއި އެކު 5-7 އިން މެޗު ކާމިޔާބުކުރީ ދެއްވަދޫ އިންނެވެ.
މި މެޗުގައި ދެއްވަދޫގެ އިންޝާއު ހަތަރު ގޯލު ޖެހިއިރު، މެޗުގެ މޮޅު ކުޅުންތެރިއަކީ ވެސް އޭނާ އެވެ. އަނެއް ގޯލުތައް ޖެހީ ރާހިލް ރަޝީދު (ރާއްކޮ) އެވެ. ހޯޑެއްދޫގެ ފަސް ގޯލުގެ ތެރެއިން އަލީ ޝިފާއު (ރޮނާ) ތިން ގޯލު ޖަހައި ހެޓްރިކެއް ހެދިއިރު، އަނެއް ދެ ގޯލް ޖެހީ ޒައްމަތު ވަހީދު އާއި ސާއިން އަސްލަމް އެވެ.
ލެޖެންޑްސް އާއި ޕޮލިސް ބައްދަލުކުރި ދެ ވަނަ ސެމީ ފައިނަލް މެޗުގެ ތެރެއިން.--- ފޮޓޯ: ތައްޔާރު ފުޓްސަލް
ސެމީ ފައިނަލްގެ ދެ ވަނަ މެޗުގައި ލެޖެންޑްސް އާއި ގދ. ޕޮލިސް މެޗުވެސް ދިޔައީ ވަރަށް ފޯރިގަދަ ކޮށެވެ. މި މެޗު ލެޖެންޑްސް އިން ކާމިޔާބުކުރީ 3-1 ގޯލުންނެވެ.
ދެ ވަނަ ހާފްގައި ގޯލުތައް ފެނިގެންދިޔަ މި މެޗުގައި ލެޖެންޑްސް އިން ލީޑުނެގީ އަރިމަތިން ޝިފާޒް އާދިލް (ތުއްތު) ޖެހި ގޯލަކުންނެވެ. އެ ޓީމުން ފަސް ބެލުމެއް ނެތި އިތުރު ދެ ގޯލު ޖެހި އެެވެ. މި ގޯލްތައް ޖަހައިދިނީ ނާއިފް ޝަފީގް (ސީއާރް3) އާއި ހަމްދޫން އަހުމަދު އެވެ.
ލަނޑު ޖަހާނެ ފުރުސަތުތަކެއް ހޯދި ޕޮލިހުގެ ގޯލް ޖެހީ ނަދީމް މުހައްމަދު އެވެ.
ތައްޔާރު ފުޓްސަލް 2022ގެ ފައިނަލުގައި ލެޖެންޑްސް އާއި ދެއްވަދޫ ބައްދަލުކުރާ މެޗު ކުޅޭނީ މިރޭ 8:30 ގައި މަޑަވެލީ ކިއުވަން އެރީނާގަ އެވެ. މި މުބާރާތް އަންނަ އަހަރު ވެސް ބާއްވަން ޓީމްތަކަށް ބައިވެރިވުމުގެ ފުރުސަތު ފެބްރުއަރީ މަހު ހުޅުވާލުމަށް ތައްޔާރު ފުޓްސަލް އިން ވަނީ ނިންމައިފަ އެވެ. މި އަހަރުގެ މުބާރާތުގެ މެއިން ސްޕޮންސަރަކީ ކޮކާކޯލާ ކޮމްޕެނީ އެވެ. މީޑިއާ ޕާޓްނަރަކީ އަދަދު ނޫހެވެ.
