ދިވެހި ޕްރިމިއާ ލީގު ކޮލިފިކޭޝަނުގެ، އެމްޓީސީސީ ނޯތު ލީގުގެ ދެ ވަނަ ޑިވިޝަނުގައި އިއްޔެ، ށ. އަތޮޅު ބުރުގައި ނަރުދޫގެ ރަމްޒު ސްޕޯޓްސް އަތުން އެސޯސިއޭޝަން ފޯ ފޯކައިދޫ ޔޫތު ޑިވެލޮޕްމެންޓުން 6-1 އިން މޮޅުވެއްޖެ އެވެ.
ނޯތު ލީގުގެ ގުރޫޕް ބީ ގައި އޮތީ ށ. އަތޮޅުގެ ތިން ރަށެެވެ. އެއީ ނަރުދު އާއި ފޯކައިދޫގެ އިތުރުން ފުނަދޫގެ ޔުނިޓީ ސްޕޯޓްސް ކްލަބެވެ. މި އަތޮޅުގެ ރައުންޑްގެ މެޗުތައް ފޯކައިދޫގައި ކުޅޭއިރު، ކޮންމެ ޓީމެއް ކޮންމެ ޓީމަކާ ދެ ފަހަރު ކުޅޭނެ އެވެ. އެންމެ ރަނގަޅު ނަތީޖާއެއް ނެރެ، ލީގު ބުރު ނިމޭއިރު ކުރީގައި އޮންނަ ދެ ޓީމެއް ނޯތު ލީގުގެ ފުރަތަމަ ޑިވިޝަނަށް ހޮވޭނެ އެވެ.
ފޯކައިދޫ ޓާފް ދަނޑުގައި އިއްޔެ ހަވީރު ކުޅުނު މެޗުގައި އެ ޓީމުން ވަނީ ހަތަރު ވަނަ މިނިޓުގައި ލީޑުނަގައިފަ އެވެ. ފޯކައިދޫ ލީޑުނެގީ އިބްރާހިމް މުޝީރުގެ ލަނޑުންނެވެ. ފޯކައިދޫން ވަނީ 12 ވަނަ މިނިޓުގައި ލީޑުފުޅާކޮށްފަ އެވެ. މިއީ ނަރުދޫގެ ކީޕަރު ހުސެއިން ނަޔާޒް އަތުން ބައިކޮޅަށް ވަން ގޯލެކެވެ.
ދެ ވަނަ ހާފް ފެށިގެން ފަސް މިނިޓް ތެރޭ ނަރުދޫގެ އަލީ ރަމްޒީ ގޯލެއް ޖަހައިދީ އެ ޓީމަށް އުންމީދެއް ހޯދައިދިނެވެ. އެކަމަކު، ވަރުގަދަ ރޫހެއްގައި އޮތް ފޯކައިދޫން ތަފާތު ދެއްކި އެެވެ. ފޯކައިދޫން މި ހާފްގައި ހަތަރު ގޯލު ޖެހި އެެވެ.
ފޯކައިދޫގެ ތިން ވަނަ ލަނޑު ޖެހީ 57 ވަނަ މިނިޓުގައި ހަސަން ނަޝީދު އެވެ. މެޗުގެ 73 ވަނަ މިނިޓުގައި ފޯކައިދޫގެ ހަތަރު ވަނަ ލަނޑު ޖަހައިދިނީ ކުރިން ފުރަތަމަ ޑިވިޝަނުގައި ކްލަބް ގްރީން ސްޓްރީޓްސް އަށް މޮޅު ކުޅުމެއް ދައްކައިދިން މުހައްމަދު ރިސްވާން (ފުކޭ) އެވެ. ފޯކައިދޫގެ ފަހު ދެ ގޯލު ޖެހީ ނަޝީދު އާއި މުޝީރު އެވެ.
ނޯތު ލީގުގެ ދެ ވަނަ ޑިވިޝަނުގައި މިހާތަނަށް މެޗުތައް ނިމިފައިވަނީ ގުރޫޕް އޭ ގެ އެވެ. ހއ އާއި ހދ.ގެ ރަަށްތަކަށް ހާއްސަކޮށްފައި އެ ގްރޫޕްގެ އޮތްއިރު، ނޯތު ލީގުގެ ފުރަތަމަ ޑިވިޝަނުން ފުރުސަތު ހޯދީ ހއ. ދިއްދޫ ބްލެކްޒީނޯ ސްޕޯޓްސް ކްލަބާއި ހދ. ކުޅުދުއްފުށީ ޒިގްޒެގް ފޯ ޔޫތު ލިންކޭޖް އެވެ.
އެފްއޭއެމުން 2023/2024 ވަނަ އަހަރު ދިވެހި ޕްރިމިއާ ލީގު ފުޅާކުރާއިރު، ރާއްޖެ ބެހިގެންދާނީ ހަަތަރު ޒޯން ލީގަކަށެވެ. ޒޯން އެކެއް ނުވަތަ ނޯތު ޒޯން ލީގުގައި ހިމެނެނީ ހއ، ހދ، ށ، ނ، ރ އެވެ. ނޯތު ޒޯންގެ ގްރޫޕް ބީ އަކީ ށ އަތޮޅުގެ ބުރެވެ.
ނޯތު ލީގުގެ ގްރޫޕް ސީ ނ. އަތޮޅުގެ މެޗުތައް، އޮގަސްޓް އެކެެއްގައި ފަށާއިރު، ގްރޫޕް ޑީ، ރ އަތޮޅު ފަށަން ނިންމާފައި އޮތީ އޮގަސްޓް 24 ގަ އެވެ. ކޮންމެ ގްރޫޕަކުން ދެ ޓީމެއް، ޑިވިޝަން އެކަކަށް ޕްރޮމޯޓްވާނެ އެވެ. ޑިވިޝަން އެކެެއްގެ ޗެމްޕިއަން، 2023/2024 ވަނަ އަހަރުގެ ދިވެހި ޕްރިމިއާ ލީގަށް ޕްރޮމޯޓްވާނެ އެވެ.
