ތައިލެންޑްގައި މިހާރު ކުރިއަށްދާ އޯލް ތައިލެންޑް ޓޭބަލް ޓެނިސް ޗެމްޕިއަންޝިޕްގެ 19 އަހަރުން ދަށުގެ ޑަބަލްސް ބައިން ރާއްޖޭގެ ތަރި، ފާތިމަތު ދީމާ އަލީ ހިމެނުނު ޕެއާ ޗެމްޕިއަންކަން ހާސިލްކުރިއިރު، މުބާރާތުގައި މިހާތަނަށް ވެސް ދީމާ ރަނގަޅު ކާމިޔާބީތަކެއް ހޯދައިފި އެވެ.
ދިމާއާ އެއް ޕެއާއެއްގައި ހިމެނިގެން 19 އަހަރުން ދަށުގެ ޗެމްޕިއަންކަން ހޯދީ ތައިލެންޑްގެ ކުޅުންތެރިޔާ ފަންގް އެވެ. ފަންގާއި ދީމާ މީގެ ކުރިން ވެސް އެކުގައި ރަނގަޅު ކާމިޔާބީތަކެއް ހޯދާފައިވެ އެވެ. ތައިލެންޑްގެ އެންމެ މަތީ ފަންތީގެ ކްލަބްތަކާއި ކުޅުންތެރިން ވާދަކުރާ މުބާރާތުގެ 15 އަހަރުން ދަށުގެ ސިންގަލްސް ބައިގެ ސެމީ ފައިނަލަށް ވެސް ދީމާ ވަނީ ދަތުރު ކޮށްފަ އެވެ.
ސަރުކާރާއި ޓޭބަލް ޓެނިސް އެސޯސިއޭޝަނުން ގުޅިގެން ހޯދައިދިން ފުރުސަތެއްގައި ތައިލެންޑްގައި މިހާރު ޓްރެއިނިން ހަދަމުން އަންނަ ދީމާ ވަނީ މިދިޔަ މެއި މަހު ރާއްޖޭގައި ބޭއްވި ދެކުނު އޭޝިއާ ޖޫނިއާ/ކެޑޭޓް ޗެމްޕިއަންޝިޕްގައި މޮޅު ކުޅުމެއް ދައްކައި، ކެޑޭޓް ކެޓަގަރީން ރިހި މެޑަލް ހޯދައިފަ އެވެ.
މި މަހު ފަހުކޮޅު އިނގިރޭސިވިލާތުގެ ބާމިންހަމްގައި ބާއްވާ ކޮމަންވެލްތު ގޭމްސް އަށް ތައްޔާރުވާން ތައިލެންޑް މުބާރާތުގެ ބޭނުން ދީމާ އަށް ހިފޭނެ އެވެ. ތައިލެންޑް މުބާރާތުގެ 15 އަހަރުން ދަށުގެ އަންހެން ސިންގަލްސްގެ ސެމީ ފައިނަލުގައި ދީމާ ބަލިވީ ތައިލެންޑްގެ އެއް ވަނަ ރޭންކް ކުޅުންތެރިޔާ އަތުންނެވެ. އެ މެޗުގައި ދީމާ ވަނީ ރަނގަޅު ފައިޓެއް ދީފަ އެވެ.
ތައިލެންޑް މުބާރާތުގެ 17 އަހަރުން ދަށުގެ ކެޓަގަރީގެ އަންހެން ސިންގަލްސް ކުއާޓާ ފައިނަލުގައި މިއަދު ދީމާގެ މެޗު އޮންނާނެ އެެވެ. މާދަމާ ދީމާ އަށް އޮތް މެޗަކީ 15 އަހަރުން ދަށުގެ އަންހެން ޑަބަލްސް ބައިގެ ކުއާޓާ ފައިނަލް އެވެ.
ކޮމަންވެލްތު ގޭމްސް އަށް ތައްޔާރުވާން ދީމާ، ތައިލެންޑްގައި ޓްރެއިނިން ހަދަމުން އަންނައިރު، ގައުމީ އަންހެން ޓީޓީ ޓީމުން ކްރޮއޭޝިއާގައި ވެސް ޓްރެއިނިން ކޭމްޕެއް ފުރިހަމަކުރި އެެވެ. އެ ޓްރެއިނިން ކޭމްޕްގައި ބައިވެރިވީ އައިޝަތު ރަފާ ނާޒިމް، މިޝްކާ މުހައްމަދު އިބްރާހިމް އަދި މަލާކް ބިންތި މުއިއްޒު އެވެ. މީގެ އިތުރުން ތަޖުރިބާކާރު ކުޅުންތެރިޔާ ޖުމާނާ ނިމާލް އޮފިޝަލެއްގެ ގޮތުގައި މި ދަތުރުގައި ބައިވެރިވެ އެވެ.
ގައުމީ ފެންވަރުގައި ކުޅެން ފެށިތާ ތިން އަހަރުގެ ތެރޭގައި ދީމާ ވަނީ ރާއްޖެ އަށް 2019 ވަނަ އަހަރު ރީޔޫނިއަންގައި ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ) އިން ތިން ރަން މެޑަލް ގެނެސްދީފަ އެވެ. މިއީ ރާއްޖޭގެ ޓީޓީގައި ލިޔެވިގެންދިޔަ އާ ސޮފުހާ އެކެވެ. އޭގެ އިތުރުން ދީމާ ވަނީ ބައިނަލްއަގުވާމީ ލެވަލްގައި ކުރިއެރުން ހޯދައި ގިނަ މުބާރާތްތަކުގައި ވާދަކޮށް ކާމިޔާބު ވެސް ހޯދައިފަ އެވެ. އެގޮތުން ސައުތު އޭޝިއާ ހޯޕްސް މުބާރާތުން ރަން މެޑަލް ހޯދައި އަދި އޭޝިއާ ހޯޕްސް މުބާރާތުން ރިހި މެޑަލް ހޯދައި، ވޯލްޑް ހޯޕްސް މުބާރާތަށް ކޮލިފައިވެފަ އެވެ.
ދީމާ އަށް ވަނީ 2024 ވަނަ އަހަރު ޕެރިހުގައި ބާއްވާ އޮލިމްޕިކްސްގެ ސްކޮލަޝިޕެއް ވެސް ލިބިފަ އެވެ. އައިއޯސީން ދީމާއަށް ސްކޮލަޝިޕް ދިނީ ފާއިތުވި އަހަރުތަކުގައި އޭނާ ހޯދާފައިވާ ކާމިޔާބީތަކާއި ކުރިއެރުމަށް ބަލައިފަ އެވެ. އަދި ސްކޮލަޝީޕާ އެކު 2024 ގެ އޮގަސްޓް މަހުގެ ނިޔަލަށް އައިއޯސީ އެޕްރޫވްޑް ތަމްރީން ސެންޓަރުތަކުގެ ތެރެއިން ދީމާ ތަމްރީން ހަދަން ބޭނުންވާ ސެންޓަރެއްގައި އޭނާގެ ތަމްރީންތައް ކުރިއަށް ގެންދިޔުމުގެ ފުރުސަތު އައިއޯސީން ފަހިކޮށްދޭނެ އެވެ.
