ހުވަދު އަތޮޅުގެ ރަށްތަކަށް ހުޅުވާލައިން، ގދ. މަޑަވެލީގައި ކުރިއަށްދާ ތައްޔާރު ފުޓްސަލް 2022 ގައި މިހާތަނަށް ކުޅުނު މެޗުތަކުން މޮޅުވެ، ދެއްވަދޫ އެފްސީ އާއި ލެޖެންޑްސް މޮޅުވުމުގެ ރެކޯޑާ އެކު ގްރޫޕް ތާވަލުގެ ކުރީގައި މަގާމު ދަމަހައްޓައިފި އެވެ.
މި މުބާރާތުގެ ގުރޫޕް އޭގެ އެއް ވަނައިގައި ދެއްވަދޫ އޮތްއިރު، އެ ޓީމުން އެންމެ ބޮޑު ތަފާތެއް ދެއްކީ މުހައްމަދު އިންޝާއު އާއި ރާހިލް ރަޝީދެވެ. ދެއްވަދޫ އިން ކުޅުނު ތިން މެޗުން މޮޅުވިއިރު، އެ ޓީމުން ވަނީ ގދ. ޕޮލިސް 7-2 އިން ބަލިކޮށް، 9-4 އިން އެފްސީ އެޓޭކާސްގެ މައްޗަށް ކުރިހޯދުމުގެ އިތުރުން ސަންސެޓް ގަރާޖް އަތުން 5-2 އިން ކުރިހޯދައިފަ އެެވެ.
ކުލަބް މޯލްޑިވްސްގައި ގަދަ ފަސް ކުޅުންތެރިންގެ ތެރޭގަ ހިމެނުނު ނާއިފް ޝަފީގު (ސީއާރު3)ގެ އެހީތެރިކަމާ އެކު ލެޖެންޑްސް ވެސް ވަނީ ފުރަތަމަ ދެ މެޗުން މޮޅުވެފަ އެެވެ. ލެޖެންޑްސް އިން ފުރަތަަމަ މެޗުގައި ކަސްޕުކާސް ބަލިކުރިއިރު، ދެ ވަަނަ މެޗުން އެފްސީ ބީއެޗްގެ މައްޗަށް ކުރިހޯދައިފަ އެވެ.
ގްރޫޕް އޭގައި ޖުމްލަ ހަ ޓީމު ވާދަކުރާއިރު، އެއް ވަނައިގައި ދެއްވަދޫ އޮތީ ތިން މެޗުން ނުވަ ޕޮއިންޓާ އެކު އެވެ. ދެ ވަަނައިގައި އޮތް ހޯޑެއްދޫ އަށް ދެ މެޗުން ހަ ޕޮއިންޓް ލިބިފައިވާއިރު، ތިން ވަނައިގައި އޮތް ސަންސެޓް ގަރާޖަށް ވަނީ ތިން މެޗުން ތިން ޕޮއިންޓް ލިބިފަ އެވެ. ދެން މި ގްރޫޕްގައި އޮތް ޓަކި ޕާކް، ގދ. ޕޮލިސް އަދި އެޓޭކާސް އަށް އަދި ޕޮއިންޓެއް ނުލިބެ އެވެ.
ގްރޫޕް ބީ އަށް ބަލާއިރު، އެއް ވަނައިގައި ލެޖެންޑްސް އޮތީ ދެ މެޗުން ހަ ޕޮއިންޓާ އެކު އެވެ. މި ގްރޫޕްގެ ދެ ވަނައިގައި އޮތް ކަސްޕުކާސް އާއި ތިން ވަނައިގައި އޮތް ކޭއާރްސީ އަދި ހަތަރު ވަނައިގައި އޮތް އެފްސީ ބީއެޗް އަށް ވެސް ވަނީ ތިން ޕޮއިންޓް ލިބިފަ އެވެ. ކަސްޕުކާސް ދެ މެޗު ކުޅުނުއިރު، ބީއެޗް ވަނީ ތިން މެޗު ކުޅެފަ އެވެ. ކޭއާރްސީ ކުޅުނީ އެންމެ މެޗެކެެވެ. އެންމެ ފުލުގައި އޮތް ސެންޓްރަލް ޓައުން ދެ މެޗު ކުޅުނުއިރު، އަދި ޕޮއިންޓެއް ނުލިބެ އެވެ.
މި މަހު 21 ވަނަ ދުވަހުގެ ނިޔަލަށް މަޑަވެލީގައި ކުރިއަށްދާ މި މުބާރާތުގެ މެއިން ޕާޓްނަރަކީ ކޮކާކޯލާ އެވެ. އަދި އޮންލައިން މީޑިއާ ޕާޓްނަރަކީ އަދަދު އެވެ.
