ސްޓޮކްހޯމް، ސްވިޑެން (ޖުލައި 13) - ސާދަ މަސް ތެރޭ ފުރަތަމަ ފަހަރަށް މަޝްހޫރު ޓެނިސް ކުޅުންތެރިޔާ ޑޮމިނިކް ތިއެމް ރަސްމީ މެޗަކުން (އޭޓީޕީ ޓުއާގެ މެޗަކުން) މޮޅުވެއްޖެ އެވެ.
އޮސްޓްރިއާގެ ތިއެމް، 28، އަތުގެ ކުޑަހުޅަށް ލިބުނު ސީރިއަސް އަނިޔާއެއްގެ ސަބަބުން ގިނަ ދުވަސްތަކެއް ވަންދެން ކުޅުމާ ދުުރުގައި ހުރެފައި، ކުލުމަށް އެނބުރި އައީ މިދިޔަ މާޗް މަހު އެވެ. އަލުން ފަށައިގެން، ތިއެމް ފުރަތަމަ ނުކުތް ރަސްމީ މުބާރާތްތަކުގެ ހަތް މެޗުން ވީ ބައްޔެވެ.
އެކަމަކު، ސްވިޑެންގެ ބޯސްޓާ އޯޕަން މުބާރާތުގައި ތިއެމް ވަނީ އެންމެ ފަހުން ކުޅުނު މެޗުން ފިންލެންޑްގެ އެމީލް ރޫސުވިއޯރީ އަތުން މޮޅުވެފަ އެވެ. މެޗުގެ ސެޓުތައް ދިޔައީ 3-6 6-1 7-6 (7-5) އިންނެވެ.
ތިއެމް ބުނީ އަހަރަކަށް ވުރެ ގިނަ ދުވަހަށް ފަހު މެޗަކުން މޮޅުވުމުން ވަރަށް ބޮޑު ހިތްހަމަޖެހުމެއް ލިބިފައިވާ ކަމަށެވެ.
"އެންމެ ފަހުން އަހަރެން (ރަސްމީ މެޗަކުން) މޮޅުވީ 2021 ވަަނަ އަހަރު ރޯމްގައި، އެ ފަހުން ވަރަށް ދުވަސް ހިނގައިފި، މޮޅެއް ލިބުނީމަ ތަފާތު އިހުސާސެއް ކުރެވެނީ،" 2020 ވަނަ އަހަރުގެ ޔޫއެސް އޯޕަންގެ ޗެމްޕިއަންކަން ހޯދި ތިއެމް ބުންޏެވެ. "އަނިޔާގެ ދަތުރުގައި އަހަންނަށް ދިރިއުޅުމުގައި ވެސް ގިނަ ކަންތައްތައް ދަސްވި، މިހާރު ޓެނިހުގައި ކުރިއަށްދާނެ ހިތްވަރު މި ލިބުނީ މޮޅަކުން،"
ތިއެމް ވަނީ 2018 އާއި 2019 ވަަނަ އަހަރު ފްރެންޗް އޯޕަން ފައިނަލުގައި ރަފައެލް ނަޑާލް އަތުން ބަލިވެފަ އެވެ. އަދި 2020 ވަނަ އަހަރުގެ އޮސްޓްރޭލިއަން އޯޕަންގެ ފައިނަލުގައި ނޮވަކް ޖޮކޮވިޗް އަތުން ވެސް ތިއެމް އަށް ލިބުނީ ނާކާމިޔާބީ އެވެ.
ކެރިއަރުގައި ރަނގަޅު ފޯމެއްގައި ހުއްޓައި ތިއެމް އަށް އަނިޔާވީ މީގެ އަހަރަކަށް ވުރެ ކުރިން ސްޕެއިންގެ މަޔޯކާގަ އެވެ. އަނިޔާގައި ހުންނަން ޖެހުނު މުއްދަތުގެ ސަަބަބުން ޓެނިހުގެ ރޭންކިންގައި މި ވަގުތު ތިއެމް އޮތީ 339 ވަނައިގަ އެވެ.
