މި މަހު ދެ ވަނަ ދުވަހު، ބޭއްވި ސައުތު އޭޝިއަން ފުޓްބޯލް ފެޑެރޭޝަން (ސާފް)ގެ އަހަރީ އާންމު ބައްދަލުވުމުގެ ތެރޭގައި ވަނީ ސަރަހައްދީ އެންމެ ބޮޑު ފުޓްބޯޅަ މުބާރާތް ސާފް ޗެމްޕިއަންޝިޕްގެ ފޯމެޓް ބަދަލުކުރަން ލިބިފައިވާ ޕްރޮޕޯސަލެއް އިއުލާނުކޮށްފަ އެވެ.
ސާފް ހިންގާ ކޮމިޓީން އިއުލާނުކުރި ފޯމެޓާ މެދު އެކި ފަރާތްތަކުގެ ވިސްނުން ހުރީ އެކި ގޮތަށެވެ.
މީގެ ކުރިން 13 ފަހަރު ސާފް ޗެމްޕިއަންޝިޕް ބޭއްވިއިރު، އެއް ފަހަރު ފިޔަވައި ހުރިހާ އަހަރަކު ބޭއްވީ ސެންޓްރަލައިޒްކޮށް އެއް ދަނޑެއްގަ އެވެ. ދެ ގައުމެއް މެދުވެރިވެގެން ސާފް ޗެމްޕިއަންޝިޕް ހޯސްޓްކުރީ 2008 ވަނަ އަހަރު ސްރީ ލަންކާ އާއި ރާއްޖޭންނެވެ. ސާފް ޗެމްޕިއަންޝިޕް ފޯމެޓް ބަދަލުކުރަން ލިބިފައިވާ ޕްރޮޕޯސަލާ އެއްގޮތަށް ކުރިއަށްދާން ގައުމުތަކުން ނިންމައިފިނަމަ ކޮންމެ ސާފް ޗެމްޕިއަންޝިޕެއްގެ މެޗުތައް، ސާފްގެ ހަތް ގައުމުގައި ވެސް ކުޅޭނެ އެވެ.
އެނގިފައިވާ ގޮތުގައި ކުރީގެ ވޯލްޑް ސްޕޯޓްސް ގްރޫޕް (ޑަބްލިއުއެސްޖީ)، މިހާރު ލަގާޑޭ ސްޕޯޓްސް އޭޝިއާ މެދުވެރިކޮށް ސާފަށް ލިބިފައިވާ ޕްރޮޕޯސަލްގައިވާ ގޮތުން އެއް މަހަށް ދިގު ދެމިގެންދާ ގޮތަށް ސާފް ޗެމްޕިއަންޝިޕް ބަދަލުވާނީ ހޯމް އެންޑް އަވޭ ފޯމެޓަށެވެ. ކޮންމެ ގައުމަކަށް އަމިއްލަ ގައުމުގައި މެޗު ކުޅެން ފުރުސަތު ލިބޭނެ ގޮތަށް މި ފޯމެޓުން ފުރުސަތު އޮންނާނެ އެވެ.
ކުރިޔާ ހިލާފަށް މެޗުތައް އެއް ދަނޑެއްގައި ކުޅެ، ނިންމާލުމުގެ ބަދަލުގައި ގިނަ ސަރަހައްދެއްގައި ކުޅޭ ގޮތަށް ވެސް ފުރުސަތު އޮންނާނެ އެވެ. މިއީ ދާދި ފަހުން ޔުއެފާ އިން ނޭޝަންސް ލީގާއި ޔޫރޯ ފުޓްބޯޅަ މުބާރާތް ތަފާތު ސިޓީތަކުގައި ބޭއްވި ކަަހަލަ ގޮތަކަށް ބަލައިގެން އައިސްފައިވާ ފޯމެޓެކެވެ.
ސާފުން އާ ފޯމެޓްގެ ކަންކަން މެމްބަރު ގައުމުތަކަށް ހުށަހަޅައި، މިހާރު އެކި ގައުމުތަކުގެ ލަފާހޯދަން ވަނީ ފޮނުވައިފަ އެވެ. މި މަހު 20 ގެ ނިޔަލަށް ކޮންމެ ގައުމަކުން އެ ގައުމުން އާ ފޯމެޓާ މެދު ދެކޭގޮތް ފޮނުވަން ޖެހޭނެ އެވެ.
މީޑިއާ ރިޕޯޓްތަކަށް ބަލާއިރު، ނޭޕާލާއި ބޫޓާން މި ޕްރޮޕޯސަލާ މެދު ހިތްހަމަނުޖެހޭ ސަަބަބަކީ، ގައުމުތަކުން މީގެ އުުފުލަން ޖެހޭ މާލީ ބުރަ ބޮޑުކަމުންނެވެ.
ސާފްގެ އަހަރީ ޖަލްސާގައި އެފްއޭއެމްގެ ފަރާތުން ބައިވެރިވީ ޖެނެރަލް ސެކްރެޓަރީ، ހުސެއިން ޖަވާޒް (ޖަވާ) އެވެ.
"އަދަދު" އިން ކުރި ސުވާލަކަށް ޖަވާ ވިދާޅުވީ އާ ފޯމެޓާ ގުޅޭ ކަންކަން މަޝްވަރާ ކުރަމުން އަންނަ ކަމަށެވެ. އަދި މި ވަގުތަށް ފެންނަ ފެނުމަށް ބަލާއިރު، މި ފޯމެޓްގެ ސަބަބުން ގައުމުތަކުން މާލީ ގޮތުން ކުރަންޖެހޭ ހަރަދުތައް ކުރިއަށް ވުރެ އެތައް ގުނައެއް އިތުރުވެގެންދާއިރު، މިއީ ދެމެހެއްޓެނިވި ގޮތެއްގައި ފައިދާކުރާނެ ފޯމެޓެއްތޯ ބަލަން ޖެހޭ ކަމަށް ޖަވާ ފާހަގަކުރެއްވި އެވެ.
"މީގެ މި އޮތީ ގާތްގަނޑަކަށް ނޭޝަންސް ލީގުގައި އޮންނަ ކަހަލަ ގޮތަކަށް، ޓްރެވަލް ކުރާއިރު ވެސް ހަރަދާއި ދެން ހުރި ގިނަ ކަންކަން މި ކުރަން ޖެހެނީ އެ ގައުމަކުން، މިއީ ސާފް ކަހަލަ ބައްރެއްގައި ފުޓްބޯޅައިގެ ކަންކަން މި ވަގުތު ހުރި ގޮތަށް ބަލާއިރު ގައުމުތަކަށް ކުރެވޭނެ ކަމެއްގެ ގޮތުގައި އަދި ނުބެލެވޭ، ދެން، މީގެ މަޝްވަރާތައް ކުރެވެމުން މި އަންނަނީ،" ޖަވާ ވިދާޅުވި އެވެ.
ބަންގްލަދޭޝް އާއި ނޭޕާލްގެ ބައެއް މީޑިއާތަކުން ވެސް ސާފް ޗެމްޕިއަންޝިޕްގެ ފޯމެޓް އެއްގޮތް ކުރަނީ 2018 ވަަނަ އަހަރު ޔުއެފާ އިން ފެށި ނޭޝަންސް ލީގާ އެވެ. ސާފްގެ އާ ފޯމެޓްގައިވާ ގޮތުން ގައުމުތަކަށް މި މުބާރާތް އެއް މަހުގެ ދިގު މިނަށް ބާއްވައިގެން ކުރު މުއްދަތެއްގެ ތެރޭގައި ބޭއްވޭއިރު، މާލީ ގޮތުން ސަޕޯޓެއް ދެވޭނެ ގޮތެއް ހިމަނާފައި ނެތެވެ. އެއީ މި ފޯމެޓާ މެދު މެޖޯރިޓީ ގައުމުތަކުގެ ކަންބޮޑުވުމެވެ.
ބަންގްލަދޭޝްގެ ޓީ ސްޕޯޓްސް އިން ކުރި ސުވާލަކަށް ޖަވާބު ދެއްވަމުން ސާފްގެ ޖެނެރަލް ސެކްރެޓަރީ އަންވަރުލް ހައްގު ހެލާލް ވިދާޅުވީ އާ ފޯމެޓްގައި ހުރި ކަންކަން ބަލައި، ފުރިހަމަ އަށް ދިރާސާ ކުރުމަށް ފަހު ގައުމުތަކުން ހުށަހަޅާ އިތުރު ކަންކަމަށް ވެސް ބަލާނެ ކަމަށެވެ.
"މިއީ ފައިނަލް ކުރެވިފައި އޮތް ކަމެއް ނޫން، މިއީ އަހަރެމެންނަށް އައިސްފައިވާ އޮތް ޕްރޮޕޯސަލް އެއް، އެހެންވީމަ މި އަށް މަޝްވަރާ ކުރުން އޮތީ، އިތުރު ފޯމެޓެއް އަންނަން އޮތިއްޔާ އެ އަށް ވެސް މަޝްވަރާ ކުރާނަން،" އަންވަރުލް ހައްގު ވިދާޅުވި އެވެ.
ސާފް ޗެމްޕިއަންޝިޕް ކަހަލަ ސަރަހައްދުގެ ފުޓްބޯޅަ ފޯރިގަދަވާ މުބާރާތަކަށް އާ ފޯމެޓެއް ގެންނައިރު، އޭތި މާކެޓް ކޮށްގެން ޑިވެލޮޕްކުރެވޭނެ ގޮތަކަށް ބައްޓަން ކުރަން ގިނަ ގައުމުތަކުން ތާއީދު ކުރާ ކަމަށް ބަންގްލަދޭޝްގެ މީޑިއާތަކުން ރިޕޯޓްކޮށްފައިވެ އެވެ.
ނޭޕާލްގެ މީޑިއާތަކުން ރިޕޯޓްކުރާގޮތުގައި ސަރަހައްދުގެ ނިސްބަތުން ބަލާއިރު، ސާފް ޗެމްޕިއަންޝިޕަކީ ވޯލްޑް ކަޕެއްގެ ގޮތުގައި ކުރު މުއްދަތެއްގައި ކުޅޭ މުބާރާތެއްގައި އޮތް އޮތުން އެހެން ފޯމެޓަކަށް ބަދަލުކުރަން ޖެހޭނީ ފުރިހަމަ ދިރާސާއެއް ކުރުމަށް ފަހު، އެންމެ ބިނާކުރަނިވި ގޮތަށެެވެ. އާ ފޯމެޓެއް ގެނެސްގެން، ގައުމުތަކަށް ނުއުފުލޭ ވަރުގެ ބުރައެއް ހަވާލުކުރުމަކީ ބުއްދިވެރި ގޮތެއް ނޫން ކަމަށް ނޭޕާލްގެ ފުޓްބޯޅަ ދިރާސާކުރާ ފަރާތްތަކުން ބުނެ އެވެ.
މިދިޔަ އަހަރުގެ އޮކްޓޫބަރު މަހު ސާފް ޗެމްޕިއަންޝިޕް ބޭއްވީ މާލޭގަ އެވެ. ސާފް ޗެމްޕިއަންޝިޕް ދެން އޮންނާނީ އަންނަ އަހަރު އެވެ.
