ޓިއުރިން (ޖުލައި 10) - ފްރާންސްގެ ތަރި ޕައުލް ޕޮގްބާ އަލުން ޔުވެންޓަސްއާ ގުޅެނީ ކުރިން ލިބެމުން އައި މުސާރަ އަށް ވުރެ ކުޑަ ކޮންޓްރެކްޓެއްގައި ކަމަށް އިޓަލީގެ މީީޑިއާ ރިޕޯޓްތައް ބުނެފި އެވެ.
ޔުނައިޓެޑްގެ ޔޫތު ޓީމުގައި މޮޅު ކުޅުމެއް ދައްކައި، ޕޮގްބާ 2012 ވަނަ އަހަރު ސީނިއާ ޓީމަށް ޕްރޮމޯޓްވި ނަމަވެސް އެ އަހަރު ވަނީ ހިލޭ ޓްރާންސްފާއެއްގައި ޔުވެންޓަސް އަށް ބަދަލުވެފަ އެވެ. ޕޮގްބާ، 29، ޔުނައިޓެޑާ އަލުން ގުޅުނީ 2016 ވަނަ އަހަރު، އޭރު ދުނިޔޭގެ ރެކޯޑު ފީއެއް ކަމަށްވާ 118 މިލިއަން ޑޮލަރަށެވެ. މި ފަހަރު ވެސް ޕޮގްބާ ޔުވެންޓަސްއާ ގުޅޭނީ ހިލޭ ޓްރާންސްފާއެއްގަ އެވެ.
ޕޮގްބާ ވަނީ ޔުވެންޓަސް އަށް ސޮއިކުރަން މެޑިކަލް ޓެސްޓްތައް ފުރިހަމަކޮށްފަ އެވެ. ޔުވެންޓަސްއާ އެކު ތިން އަހަރުގެ ކޮންޓްރެކްޓެއްގައި ޕޮގްބާ ސޮއިކުރާނެ ކަމަށް އިޓަލީގެ ކޮރިއޭ ޑެލޯ ސްޕޯޓް އާއި ފުޓްބޯލް އިޓާލިއާ އިން ވަނީ ރިޕޯޓްކޮށްފަ އެވެ. އަދި އެ އެއްބަސްވުމުގައިވާ ގޮތުން ޕޮގްބާ އަށް ހަފްތާ އަކު ބޯނަހާ އެއްކޮށް ލިބޭނީ 192،555 ޑޮލަރެވެ. މީގެ ކުރިން ޕޮގްބާ ޔުނައިޓެޑްގައި ހުރީ ހަފްތާ އަކު 348،555 ޑޮލަރުގެ ޑީލެއްގަ އެވެ.
އިއްޔެ، ޔުވެންޓަސް ސަޕޯޓަރުން ޕޮގްބާ އަށް ހޫނު މަރުހަބާއެއް ކީއިރު، އެ ތަނުން ސަޕޯޓަރަކު ވަނީ ޔުނައިޓެޑްގެ ޖޯޒީއެއްގައި ޕޮގްބާގެ އޮޓޯގްރާފް ހޯދަން މަސައްކަތްކޮށްފަ އެވެ. އެކަމަކު، ޕޮގްބާ އެ ޖޯޒީގައި ސޮއިނުކުރެ އެވެ.
މިދިޔަ ސީޒަނުގެ ނިޔަލަށް ޕޮގްބާ ޔުނައިޓެޑާ އެކު ހަދާފައިވާ ކޮންޓްރެކްޓް ހަމަވިއިރު، އެ ޓީމުން ޕޮގްބާގެ ޑީލް އިތުރު ދެ އަހަރަށް އާ ކުރަން ހަފްތާ އަކު 368،000 ޑޮލަރުގެ މުސާރައެއް ހުށަހެޅި އެވެ. އެއީ ބޯނަހާ އެކު 430،355 ޑޮލަރު ލިބޭގޮތަށެވެ. އެކަމަކު، ޕޮގްބާ ވަނީ މިއީ ޔުނައިޓެޑްގައި އޭނާ މަޑުކުރަން ބަލާއިރު ކުޑަ މުސާރައެއް ކަމަށް ބުނެފަ އެވެ.
ޔުވެންޓަސްއާ އެކު ތިން އަހަރުގެ ކޮންޓްރެކްޓެއްގައި ޕޮގްބާ ސޮއިކުރާއިރު، އެ އެއްބަސްވުމުގެ ދަށުން އިތުރު އެއް އަހަރަށް މަޑުކުރެވޭ ގޮތަށް އިހުތިޔާރު އޮވެ އެވެ.
ޕޮގްބާ، ކްލަބް ކެރިއަރުގައި އެންމެ ގިނަ ކާމިޔާބު ހޯދީ ޔުވެންޓަސް ޖޯޒީގަ އެވެ. ޔުވެންޓަސްގައި ހުރެ ހަތަރު ފަހަރު އިޓާލިއަން ލީގާއި ދެ ފަހަރު އިޓާލިއަން ކަޕާއި ސުޕަ ކަޕް ކާމިޔާބުކުރި އެވެ. ޔުނައިޓެޑްގައި ޕޮގްބާ ވަނީ އިނގިރޭސި ލީގު ކަޕާއި ޔޫރޮޕާ ލީގު ކާމިޔާބުކޮށްފަ އެވެ.
