ސައުތެމްޓަން (ޖުލައި 8) - ޖޯޝް ބަޓްލާގެ ކެޕްޓަންކަމުގައި އިންގްލެންޑުން ކުޅުނު ފުރަތަމަ ޓީ20 މެޗުގައި 50 ލަނޑުން އިންޑިއާ އަތުން ބަލިވިއިރު، މި މެޗުގައި އިންޑިއާގެ އޯލްރައުންޑަރު ހާޑިކް ޕާންޑްޔާ، ހާފް ސެންޗަރީ (50 ލަނޑު) ހެދުމުގެ އިތުރުން ހަތަރު ވިކެޓް ނަގައި ތަފާތު ދައްކައިފި އެވެ.
ބަޓްލާ އަށް އިންގްލެންޑް ޓީމުގެ ކެޕްޓަންކަން ދިނީ ދާދި ފަހުން އޮއިން މޯގަން ބައިނަލްއަގުވާމީ ކްރިކެޓުން ރިޓަޔާކުރުމުންނެވެ.
ޓޮސް ދިމާވުމުން އިންޑިއާ އިން ނިންމީ ކުޅެން އެރުމަށެވެ. އެ ގޮތުން އެ ޓީމުން ވަނީ 20 އޯވަރުގެ ތެރޭ އަށް ކުޅުންތެރިން ނުބައިވެގެން 198 ލަނޑު ހަދައިފަ އެވެ. އެންމެ ރަނގަޅު ކުޅުމެއް ދެއްކީ، 51 ލަނޑު ހެދި ހާޑިކާއި 39 ލަނޑު ހެދި ސޫރްޔަކުމާރް ޔާދަވްް އަދި 37 ލަނޑު ހެދި ދީޕަކް ހޫޑާ އެވެ. ބެޓިންގައި ހާޑިކް ތަފާތަކަށްވީ އިންގްލެންޑްގެ އުކުންތެރިންގެ ކޮންމެ ސްޓައިލެއްގެ ބޯޅަ އަކަށް ވެސް އޭނާ ތައްޔާރުވި މިންވަރު ރަނގަޅުވުމެވެ.
ކޮވިޑް-19 އިން ރަނގަޅު ވުމަށް ފަހު އެނބުރި އައި، ރޯހިތު ޝަރްމާ ވަނީ 14 ބޯޅައިން 24 ލަނޑު ހެދިތަނާ ނުބައިވެފަ އެވެ.
ޖަވާބުގައި އިންގްލެންޑުން ކުޅެން އެރިއިރު، ހާޑިކް ތަފާތު ދެއްކީ އޭނާ އަށް އުކަން ލިބުނު ހަތަރު އޯވަރުގައި، 33 ބޯޅައިން ހަތަރު ކުުޅުންތެރިން ނުބައިކޮށްލައިގެންނެވެ. ހާޑިކް ނެގީ، އިންގްލެންޑްގެ ޖޭސަން ރޯއި، ޑޭވިޑް މަލަން، ލިއަމް ލިވިންގްސްޓަން އަދި ސޭމް ކުރަންގެ އެވެ.
އިންޑިއާގެ ސްޕިން ބޯލަރު، ޔުޒްވެންދުރަ ޗާހާލް ވަނީ އިއްޔެގެ މެޗުގައި ދެ ވިކެޓް ނަގައިފަ އެވެ. އޭގެ ތެރޭގައި އިންގްލެންޑަށް މި މެޗުގައި އެންމެ ގިނަ ލަނޑު ހަދައިދިން މޮއީން އަލީގެ ވިކެޓް ވެސް ހިމެނެ އެވެ. މޮއީން ވަނީ 20 ބޯޅައިން 36 ލަނޑު ހަދައިފަ އެވެ.
އިންގްލެންޑްގެ ކެޕްޓަން ބަޓްލާ ނުބައިވީ، ލަނޑެއް ނުހެދި އެވެ. ބަޓްލާގެ ވިކެޓް ނެގީ، އިންޑިއާގެ ކުޅަދާނަ .އުކުންތެރިޔާ، ބުވްނޭޝްވަަރު ކުމާރް އެވެ. އިންގްލެންޑުން 19.3 އޯވަރުގެ ތެރޭ ހުރިހާ ކުޅުންތެރިން ނުބައިވެގެން ހެދުނީ 148 ލަނޑެވެ.
ދާދި ފަހުން، ނިމުނު ފޯރިގަދަ އިންޑިއަން ޕްރިމިއާ ލީގު (އައިޕީއެލް)ގައި މުޅިން އަލަށް ވާދަކޮށް ޗެމްޕިއަންކަން، ހޯދި ގުޖުރާތު ޓައިޓަންސް ޓީމުގެ ތަރިއަކީ ހާޑިކް އެވެ. އޭނާ މި ވަނީ އޭނާ މި ވަގުތު ހުރި ރަނގަޅު ފޯމު ދަމަހައްޓައިފަ އެެވެ. ހާޑިކްގެ އަމާޒަކީ އިންގްލެންޑްގެ ތިން މެޗު ސީރީސްގައި ވެސް މޮޅަށް ކުޅެ އިންޑިއާ އަށް ކާމިޔާބު ހޯދައިދިނުމެވެ.
