މެޑްރިޑް (ޖުލައި 6) - މިދިޔަ އަހަރުގެ އެންމެ މޮޅު އަންހެން ފުޓްބޯޅަ ކުޅުންތެރިޔާ އަށް ދޭ ބެލޮންޑިއޯ އެވޯޑްސް ހޯދި ސްޕެއިނުގެ ތަރި، އަލެކްސިއާ ޕުޓޭޔާސް އަށް އަނިޔާގެ ސަބަބުން މާދަމާ ފަށާ ޔޫރޯ ފުޓްބޯޅަ މުބާރާތުގެ ފުރުސަތު ގެއްލިއްޖެ އެވެ.
ސްޕެއިނުގެ ފުޓްބޯޅަ ފެޑެރޭޝަނުން ބުނީ މިދިޔަ އަންގާރަ ދުވަހު ފަރިތަކުރުންތަކުގެ ތެރެއިން ސްޕެއިނުގެ ކެޕްޓަން، އަލެކްސިއާ، 28، ގެ ކަކުލަށް ލިބުނު އަނިޔާގެ ސަަބަބުން އިތުރު ޓެސްޓްތައް ހެދުމުން އެނގުނީ އެންޓީރިއާ ކްރޫސިއެޓް ލިގަމެންޓް (އޭސީއެލް) ކަނޑައިގެން ގޮސްފައިވާ ކަމަށެވެ. އެހެންވެ، ޔޫރޯގައި މި ފަަހަރު އަލެކްސިއާ ނުފެންނާނެ ކަމަށް ސްޕެއިނުގެ ފުޓްބޯޅަ ފެޑެރޭޝަނުން ވަނީ ބުނެފަ އެވެ.
އަލެކްސިއާ އަށް އަނިޔާވިއިރު، ޔޫރޯގައި ސްޕެއިން ކުޅެން އޮތް ފުރަތަމަ މެޗުގައި ހުކުރު ދުވަހު ބައްދަލުކުރާނީ ފިންލެންޑާ އެވެ.
ފީފާ އިން ހޮވި އެންމެ މޮޅު އަންހެން ކުޅުންތެރިޔާ އަށް ދޭ ބެސްޓް އެވޯޑްސް 2021 ވަނަ އަހަރު ހޯދި އަލެކްސިއާ ވަނީ ސްޕެއިން ގައުމީ ޓީމަށް 100 މެޗު ކުޅެދީ 27 ގޯލު ޖަހައިފަ އެވެ.
ބާސެލޯނާގެ މެޗެއްގެ ތެރެއިން އަލެކްސިއާ: އޭނާ އަކީ ބާސެލޯނާގެ އަންހެން ޓީމުގެ ތަރިއެއް.
ފަހަކަށް އައިސް އަލެކްސިއާ ބާސެލޯނާގައި ދައްކަމުން އައި ކުޅުމަށް ބަލާއިރު، ހުރީ ވަރަށް ރަނގަޅު ފޯމެއްގަ އެވެ.
މިދިޔަ ސީޒަނުގެ ޗެމްޕިއަންސް ލީގުގައި އަލެކްސިއާ ވަނީ 11 ގޯލު ޖަހައިފަ އެވެ. އަދި ސްޕެނިޝް ލީގު ބާސެލޯނާ އިން ޖެހިޖެހިގެން ތިން ފަހަރު ހޯދިއިރު، އަލެކްސިއާ ވަނީ 18 ގޯލު ޖަހައިފަ އެވެ. އެހެންވެ، މި ފަހަރުގެ ޔޫރޯ އަށް ސްޕެއިނުން ކާމިޔާބެއް ހޯދަން ބަރޯސާވި އެއް ކުޅުންތެރިއަކީ އަލެކްސިއާ އެެވެ. އެކަމަކު، އަލެކްސިއާ އަށް ލިބުނު މި އަނިޔާގެ ސަބަބުން ސްޕެއިން ޓީމަށް މި ވަނީ މައްސަލަތަކެއް ކުރިމަތިވެފަ އެވެ.
އަލެކްސިއާ އަކީ ކަކުލަށް އަނިޔާވެގެން މި ފަަހަރުގެ ޔޫރޯގެ ކުރިން ސްޕެއިނަށް ގެއްލުނު ދެ ވަނަ ކުޅުންތެރިޔާ އެވެ. ސްޕެއިންގެ ތަޖުރިބާކާރު ފޯވާޑް، ޖެނިފާ ހާމޯސޯ ވެސް ވަނީ ކަކުލަށް ލިބުނު އަނިޔާއަކާ ހެދި ޓީމާ ވަކިވެފަ އެވެ.
ފިންލެންޑާއި ސްޕެއިންގެ އިތުރުން އަންހެން ޔޫރޯގެ ގްރޫޕް ބީގައި އޮތީ ޖަރުމަނާއި ޑެންމާކް އެވެ. މުބާރާތުގެ ފުރަތަމަ މެޗުގައި މާދަމާރޭ، މުބާރާތް ހޯސްޓްކުރާ ޓީމު ކަމަށްވާ، އިންގްލެންޑުން ނުކުންނާނީއޮސްޓްރިއާއާ ދެކޮޅަށެވެ.
