ޒިއުރިކް (ޖުލައި 1) - ގަތަރުގައި މި އަހަރު ފަހުކޮޅު ބާއްވާ ފީފާ ވޯލްޑް ކަޕްގައި ސެމީ އޮޓޮމެޓިކް އޮފްސައިޑް ޓެކްނޮލޮޖީ ބޭނުންކުރަން ނިންމާފައިވާ ކަމަށް ފީފާ އިން އިއުލާނުކޮށްފި އެވެ.
ސެމީ އޮޓޮމެޓިކް އޮފްސައިޑް ޓެކްނޮލޮޖީ އެންމެ ފުރަތަމަ ޓެސްޓްކުރީ މިދިޔަ އޮކްޓޫބަރު މަހު ކުރިއަށްދިޔަ އަރަބް ކަޕްގަ އެވެ. އޭގެ ފަހުން މި އަހަރު ކުރީކޮޅުގައި ބޭއްވި ފީފާ ކްލަބް ވޯލްޑް ކަޕްގައި ވެސް ވަނީ ސެމީ އޮޓޮމެޓިކް އޮފްސައިޑް ޓެކްނޮލޮޖީ ބޭނުންކޮށްފަ އެވެ.
ފީފާގެ ރައީސް ޖިއާނީ އިންފަންޓީނޯ ވިދާޅުވީ ސެމީ އޮޓޮމެޓިކް އޮފްސައިޑް ޓެކްނޮލޮޖީ އަކީ މިދިޔަ އަހަރުތަކުގައި ބޭނުންކުރަމުން އައި ވީޑިއޯ އެސިސްޓަންޓް ރެފްރީ (ވިއޭއާރް) އަށް އިތުރު ފުރިހަަމަ ކަމެއް ގެނެސްދީ، ފުޓްބޯޅަ، ޒަމާނީ މޮޑެލަށް ބަދަލުކޮށްލަން ކުރެވޭ މަސައްކަތުގެ އަނެއް ހަރުފަތް ކަމަށެވެ.
"މިއީ ގިނަ ކަންތައްތަކެއް ދިރާސާކުރެވިގެން މިދިޔަ ތިން އަހަރު ތެރޭ އެކި ޓެސްޓިން މަރުހަލާ ވެސް ފުރިހަމަ ކޮށްފައި އައިސްފައި އޮތް ޓެކްނޮލޮޖީއެއް. މި ޓެކްނޮލޮޖީގެ އެހީ ހޯދައިގެން މި ފަހަރުގެ ވޯލްޑް ކަޕް ކުރިއަށްދިއުމަކީ ގަތަރަށް މެޗު ބަލަންދާ ސަޕޯޓަރުންނާއި ޓީވީ ކައިރީގައި މެޗު ބަލަން ތިބޭ ސަޕޯޓަރުންނަށް ވެސް ވަރަށް ފުރިހަމަ ތަޖުރިބާ އަކަށްވާނެ،" އިންފަންޓީނޯ ވިދާޅުވި އެވެ.
ސެމީ އޮޓޮމެޓިކް އޮފްސައިޑް ޓެކްނޮލޮޖީ މަސައްކަތްކުރާ ގޮތަށް ބަލާއިރު، ބޯޅައިގައި އިންނަ ސެންސާ ޗިފް-ޑިވައިސް އެއް މެދުވެރިކޮށް، ކުޅުންތެރިއާ ބޯޅައިގައި ޖަހާ ސީދާ ވަގުތު ދެނެގަނެ، އެ ޑާޓާ ވަގުތުން ހިއްސާކުރާނީ ވީއޭއާރް ސިސްޓަމަަށެވެ. ވީއޭއާރް ސިސްޓަމަށް މައުލޫމާތު ލިބުނުހާ އަވަހަކަށް މެޗު ރެފްރީ އަށް ވީއޭއާރް ރޫމުން އެކަން އަންގާނެ އެވެ. މިއީ ގޯލް ލައިން ޓެކްނޮލޮޖީހާ ކާމިޔާބު ޕްރޮޖެކްޓަކަށް ވާނެ ބަދަލެއް ކަމަށް ފީފާ އިން ގަބޫލުކުރެ އެވެ.
"މިއީ ވަރަށް މޮޅު، ތަފާތެއް ގެނުވާނެ ބަދަލެއް، އަހަރެމެން މި ތިބީ ތައްޔާރަށް،" ފީފާގެ ރެފްރީންގެ ކަންތައްތަކާ ބެހޭ އެންމެ މަތީ ފަރާތް، ކުރީގެ ކުޅަދާނަ ރެފްރީ، ޕިއެރްލުއީޖީ ކޮލީނާ ބުންޏެވެ.
ކޮލީނާ ބުނީ މީޑިއާގެ ޒަރިއްޔާ އިން އޭނާ އަށް ފެންނަ އަނެއް ކަމަކީ މުސްތަގުބަލުގައި "ރޮބޮޓް ރެފްރީ" އިން ފުޓްބޯޅައިން ފެނިދާނެ ކަމަށް ބުނެވޭ ވާހަަކަތައް ކަމަށެވެ. އެކަމަކު، އެއީ އެއްވެސް ހަގީގަތެއް އެކުލެވޭ ކަމެއް ނޫން ކަމަށާއި ފީފާއިން ދިރާސާ ކުރަމުން އަންނަ ކަންތައްތަކުގެ ތެރޭގައި ރޮބޮޓް ރެފްރީން ބޭނުން ކުރުން ނުހިމެނޭ ކަމަށެވެ.
ގަތަރު ވޯލްޑް ކަޕްގައި ސެމީ އޮޓޮމެޓިކް އޮފްސައިޑް ޓެކްނޮލޮޖީ ބޭނުންކުރަން ތައްޔާރުވުމުގެ ގޮތުން މުބާރާތަށް ނެގި ރެފްރީން އެ ކަންކަމަށް އަހުލުވެރި ކުރުމުގެ ގޮތުން ސެމިނާތަކެއް ބާއްވާނެ އެވެ.
ވޯލްޑް ކަޕް ފަށާނީ މި އަހަރު ނޮވެމްބަރު މަހު 21 ވަނަ ދުވަހު ގަތަރުގެ ދޯހާގައި ނެދަލެންޑްސް އާއި ސެނެގާލް ބައްދަލުކުރާ މެޗުންނެވެ.
