ލަންޑަން (ޖޫން 30) - އެވަޓަންގެ މާލީ ހާލަތުގެ ފައިދާނަގައި, ޓޮޓެންހަމް ހޮޓްސްޕާސް އިން ބްރެޒިލްގެ ފޯވާޑް ރިޗާލިސަންގެ ސޮއި ހޯދުމަށް އެއްބަސްވުމަކަށް އަތުވެއްޖެ އެވެ.
މިއަދުގެ ނިޔަލަށް އެވަޓަން އިން އެ ކްލަބްގެ މާލީ ހަރަދުތައް ގަވާއިދުގެ ތެރެއަށް ފައްތަން ބަލާއިރު، 100 މިލިއަން ޑޮލަރާ ގާތްކުރާ އަދަދެއްގެ އާމްދަނީއެއް ހޯދަން ޖެހެ އެވެ. ކްލަބްގެ ހަރަދުތައް ބެލެންސްކުރަން ބޭނުންވާ ފައިސާ ހޯދަން އެވަޓަން އިން މަސައްކަތް ކުރަމުން އައި ދަނޑިވަޅުގެ ފައިދާ ނެގީ ޓޮޓެންހަމް އިންނެވެ. ޓޮޓެންހަމް އިން މި ވަނީ ކުރިން އެވަޓަން އިން އަގުބޮޑުކޮށް ވިއްކަން ކީ ކުުޅުންތެރިއެއް ކަމަށްވާ ރިޗާލިސަންގެ ޑީލް ނިންމުމާ ގާތަށް ޖެހިލައިފަ އެވެ. އެވަޓަން އިން ކުރިން ރިޗާލިސަން ވިއްކާލަން ކީ 100 މިލިއަން ޑޮލަރަށެވެ.
ރިޗާލިސަންގެ އިތުރުން އެވަޓަން އަށް ކުޅެމުން އަންނަ، ޒުވާމް މިޑްފީލްޑަރު، އެންތަނީ ގޯޑަން ގަންނަން ވެސް ޓޮޓެންހަމް އިން ބޭނުންވެ އެވެ. އެކަމަކު، އެވަޓަން އިން އެއްބަސްވެފައިވަނީ ހަމައެކަނި ރިޗާލިސަން ޓޮޓެންހަމަށް ވިއްކާލުމަށެވެ.
ޓޮޓެންހަމް އިން ފުރަތަމަ ރިޗާލިސަން ގަންނަން ދޭނީ 60 މިލިއަން ޑޮލަރެވެ. އަދި ރިޗާލިސަން، ޓޮޓެންހަމްގައި ދައްކާ ކުޅުމަށް ބަލާފައި އިތުރު 15 މިލިއަން ޑޮލަރު ދޭން ކޮންޓްރެކްޓްގައި ހިމަނާނެ އެވެ.
ބްރެޒިލް ގައުމީ ޓީމަށް ކުޅެމުން އަންނަ ރިޗާލިސަން ވެގެންދާނީ އެންޓޯނިއޯ ކޮންޓޭގެ ކޯޗުކަމުގައި ކުޅޭ ޓޮޓެންހަމް އިން މި ފަހަރުގެ ޓްރާންސްފާ މާކެޓްގައި ސޮއި ހޯދާ ހަތަރު ވަނަ ކުޅުންތެރިޔާ އަށެވެ. ޓޮޓެންހަމް އިން ވަނީ މީގެ ކުރިން ހިލޭ ޓްރާންސްފާއެއްގައި އިންޓަ މިލާނުން އިވާން ޕެރިސިޗްގެ ސޮއިހޯދުމުގެ އިތުރުން ސައުތެމްޓަންގެ ކީޕަރު ފްރޭޒާ ފޯސްޓާ އަދި ބްރައިޓަންގެ މިޑްފީލްޑަރު ޔްވެސް ބިސޫމާ ގަނެފަ އެވެ.
ޓޮޓެންހަމް އިން އަންނަނީ ބާސެލޯނާގެ ފްރާންސް ޑިފެންޑަރު، ކްލެމެންޓް ލޯންގްލޭ އެއް އަހަރުގެ ލޯން ޑީލެއްގެ ދަށުން ގެންނަން މަޝްވަރާ ކުރަމުންނެވެ.
ބްރެޒިލްގެ ފްލުމިނެންސޭ ދޫކޮށް، 2017 ވަނަ އަހަރު ރިޗާލިސަން އެންމެ ފުރަތަމަ ކުޅުނީ ޕްރިމިއާ ލީގުގެ ވަޓްފޯޑަށެވެ. ވަޓްފޯޑުން ރިޗާލިސަން ގަތީ 15 މިލިއަން ޑޮލަރަށެވެ. ވަޓްފޯޑް ދޫކޮށް ރިޗާލިސަން އެވަޓަން އަށް ބަދަލުވީ 2018 ވަނަ އަހަރު 60 މިލިއަން ޑޮލަރަށެވެ. ވަޓްފޯޑުން އެވަޓަން އަށް ރިޗާލިސަން ގެނައުމުގައި އެންމެ އިސް ރޯލެއް ކުޅުނީ އޭރު އެ ދެ ޓީމަށް ކޯޗުކޮށްދިން ޕޯޗުގަލްގެ މާކޯސް ސިލްވާ އެވެ.
