ރާއްޖޭގެ އެންމެ ގިނަ މެރަތަން ދުވުމުގެ ރެކޯޑް ހޯލްޑަރު ނަސްރުﷲ އަހުމަދު (ނަސްރު)، އޭނާގެ 82 ވަނަ މެރަތަން ދުވަން އޮސްޓްރޭލިއާ އަށް މިއަދު ފުރައިފި އެވެ.
މިއީ ނަސްރުގެ ދުވުމުގެ ކެރިއަރުގައި ގޯލްޑް ކޯސްޓްގައި ބާއްވާ މެރަތަން ދުވުމުގެ އިވެންޓެއްގައި ބައިވެރިވާ ހަ ވަނަ ފަހަރެވެ. ގޯލްޑް ކޯސްޓް މެރަތަން އޮތީ އަންނަ ހޮނިހިރު ދުވަހު އެވެ.
މެރަތަން ރަނާސްގެ ކޯޗުކަން ވެސް ކުރަމުން އަންނަ ކުޅަދާނަ ދުވުންތެރިޔާ، ނަސްރު ވަނީ މިިދިޔަ މާޗް މަހު ތުރުކީގައި މެރަތަން އެއް ދުވެފަ އެވެ. އޭގެ ފަހުން އޭޕްރީލް މަހު ބެންގަލޫރުގައި ބޭއްވި މެރަތަންގައި ދުވެ، ފޯމު ދެމެހެއްޓި އެވެ. އެންމެ ފަހުން ދުވީ މި މަހު ތައިލެންޑްގެ ފުކެޓްގައި ކުރިއަށްދިޔަ މެރަތަންގަ އެވެ.
ކޮވިޑާ ހެދި އައި ހުއްޓުމަށް ފަހު އަލުން ފަށައިގެން ނަސްރު އަންނަނީ ގަވާއިދުން ދުވުމުގެ އިވެންޓްތަކުގައި ބައިވެރިވެ، އޭނާގެ ޓާގްޓްތަކައިގެން ކުރިއަށް ދިއުމަށް މަސައްކަތް ކުރަމުންނެވެ. މެރަތަން ދުވުމުގެ އިތުރުން ނަސްރު އަކީ މެރަތަން އަށް ޝައުގުވެރިވާ ފަރާތްތަކަށް ޓްރެއިނިން ދިނުމުގައި ވެސް ކުޅަދާނަ ކޯޗެކެވެ.
ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ، އަލީ އަޝްފާގު (ދަގަނޑޭ) ވެސް، އަނިޔާއިން ރިކަވާވެގެން ފިޓްވުމުގެ ބޭނުމުގަޔާއި މެރަތަން ދުވުމުގެ ޝައުގުވެރިކަމާއި ފިޓްނަސް ހިފެހެއްޓުމުގެ ގޮތުން އަންނަނީ މެރަތަން ރަނާސްއާ އެކު ޓްރެއިނިން ހަދަމުންނެވެ.
ނަސްރު (ވ) އާއި ދަގަނޑޭ ކުޅިވަރު އެކުވެނި ސިންތެޓިކް ޓްރެކުގައި ދުވަނީ.--- ފޮޓޯ: މުހައްމަދު ޝާބިން/ އަދަދު
ސިފައިންގޭގެ ސްޓާފް ސާޖަންޓް، ނަސްރު ދުވުމުގެ ތެރެއަށް ވަނީ 2000 ގެ ކުރީކޮޅުގަ އެވެ. ދުވުމުގެ ތެެރެއަށް ރަސްމީކޮށް ނުކުންނަން ނަސްރަށް ހިތްވަރު ލިބުނީ ސިފައިންގެ ޔުނިޓްތަކުގެ މެދުގައި އޮތް އެތުލެޓިކްސް މުބާރާތެއްގެ ތެރެއިން ކުރެވުނު ތަޖުރިބާ އަކުންނެވެ.
ނަސްރު، މި ވަގުތު އަމާޒުހިފައިގެން ހުރީ މެރަތަން ދުވެގެން ސަރަަހައްދުގެ ނޫނީ ދުނިޔޭގެ ރެކޯޑަކާ ހަމައަށް ވާސިލްވުމެވެ. އެ ދަތުރުގައި އޭނާ އަމާޒަކީ އަމިއްލަ ކުރިއެރުންތަކުގެ އަލީގައި ކުރިއަށް ދިއުން އެކަންޏެއް ނޫނެވެ. އާ ދުވުންތެރިން އުފައްދައި، ގިނަ ދުވުންތެރިންނަށް ކޯޗުކޮށްދީގެން އިންޓަނޭޝަނަލް އިވެންޓްތަކަށް ގެންގޮސް ރާއްޖެ އަށް ރީތި ނަން ހޯދައިދޭން މަސައްކަތްތައް ކުރުމެވެ.
މި މަސައްކަތުގައި މިހާތަނަށް ވެސް އޭނާ ވަނީ ކާމިޔާބީތަކެއް ހޯދައިފަ އެވެ. އެ ގޮތުން އެންމެ ފަހުން މި މަހު ފުކެޓްގައި ދުވި މެރަތަންގައި ނަސްރުގެ ކޯޗުކަމުގައި ވާދަކުރި އައިޝަތު ރާނިޔާ އަށް ވަނީ ފަސް ކިލޯމީޓަރާއި ހާފް މެރަތަންގެ އުމުރުފުރާ ބައިން އެއް ވަނަ ލިބިފަ އެވެ. ރާނިޔާގެ ޕޭސްމާކަރަކަށް ދުވުނީ ނަސްރު އެވެ. ރާއްޖޭގެ ގައުމީ ޓީމުގައި ވެސް ހިމެނޭ ދިގު ދުވުންތެރިޔާ، މުހައްމަދު ރަޝީދު (މޯޑު)ގެ ކޯޗަކީ ވެސް ނަސްރު އެވެ.
