ލަންޑަން (ޖޫން 28) - ނިއުކާސަލް ޔުނައިޓެޑްގެ ތިން ވަނަ ކިޓާއި ސައުދީ އަރަބިއްޔާގެ ގައުމީ ޓީމުގެ ޖޯޒީއާ އެއްގޮތް ކަންތައްތަކެއް ހުރި ކަމަށް ބުނެ ގިނަ ބަޔެއް ހިތްހަމަނުޖެހުން ފާޅުކޮށްފި އެވެ.
ދެ ފަހަރެއްގެ މަތިން މަސައްކަތް ކުރައްވައި، ސައުދީގެ ވަލީ އަހުދު މުހައްމަދު ބިން ސަލްމާންގެ ހިއްސާއާ އެކު ނިއުކާސަލް ގަތުމުގެ ޑީލް، ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން ފުރިހަމަކުރީ މިދިޔަ އަހަރުގެ އޮކްޓޫބަރު މަހުގެ ތެރޭގަ އެވެ. އެ ޑީލް ނިމުމާ އެކު އިންސާނީ ހައްގުތަކަށް ވަކާލާތު ކުރާ ބައިނަލްއަގުވާމީ ޖަމިއްޔާ، އެމްނެސްޓީ އިންޓަނޭޝަނަލް އިން ބުނީ މިއީ ނިއުކާސަލުން އިންސާނީ ހައްގުތަކާ ދެކޮޅަށް ހިންގާ ކަންކަން ފޮރުވަން ކުޅިވަރުގެ ތެރެއިން ކުރާ ކަމެއް ކަމަށް ބުނެފަ އެވެ.
ނިއުކާސަލްގެ ވެރިން ދިޔައީ ތަކުރާރުކޮށް އެމްނެސްޓީ އިންޓަނޭޝަނަލް އާއި ފުޓްބޯޅަ ތަޖުރިބާކާރުންގެ ތުހުމަތުތަކަށް ރައްދުދެމުންނެވެ. އިނގިރޭސި ޕްރިމިއާ ލީގުން ވެސް ވަނީ ނިއުކާސަލަށް ސައުދީ ސަރުކާރުގެ ނުފޫޒު ނުވަންނާނެ ކަމަށް ބުނެފަ އެވެ.
މިދިޔަ މެއި މަހު ނިއުކާސަލްގެ ޖޯޒީއެއްގެ ފޮޓޯ ލީކްވިއިރު، ސައުދީގެ ރަސްމީ ކުލަތަކުން ހުރުމުން ގިނަ ބަޔަކު ފާޑުކިޔެވެ. އޭރު އެ ކަމަށް އެއްވެސް ރަސްމީ އިދާރާ އަކުން މާ ބޮޑު ސަމާލުކަމެއް ދީފައިނުވެ އެވެ. އެކަމަކު، އިއްޔެ ނިއުކާސަލް އިން ރަސްމީކޮށް އަންނަ ސީޒަނުގައި އެ ޓީމުން ބޭނުންކުރާނެ ތިން ވަނަ ކިޓް ދައްކާލިއިރު، އެ ޖޯޒީ އާއި ސައުދީގެ ގައުމީ ޓީމުގެ ޖޯޒީގެ ކުލަތަކާ އެއްގޮތް ކަންތައްތަކެއް ހުރިކަން ގިނަ ބަޔަކު އަންނަނީ ފާހަގަކުރަމުންނެވެ.
މިދިޔަ އަހަރުގެ އޮލިމްޕިކްގައި ސައުދީގެ ޒުވާން ޓީމު މެޗެއްގެ ކުރިން ފޮޓޯ އަކަށް ހުއްޓިލައިގެން.-- ފޮޓޯ: އޭއެފްޕީ
ސައުދީ އާއި ނިއުކާސަލާ ގުޅުވައިގެން ދައްކާ ވާހަކަތަކަށް ނިއުކާސަލްގެ ކޯޗު އެޑީ ހޯވް ބުނީ މީހުން ދައްކާ ވާހަަކަތައް ނުހުއްޓުވޭނެ ކަމަށާއި ޔަގީންކަމާ އެކު ބުނަން އެނގޭ އެއްޗަކީ ފުޓްބޯޅައާ ނުގުޅޭ ކަމެއް ނިއުކާސަލް ތެރެއިން ކުރިއަށް ނުދާކަން ކަމަށެވެ.
ނިއުކާސަލްގެ ތިން ވަނަ ކިޓްގައި ސައުދީއާ ގުޅޭ ގިނަ ކަންތައްތަކެއް ހުރުމުން ފުޓްބޯޅަ ތަޖުރިބާކާރުންނާއި ސަޕޯޓަރުން އަންނަނީ އެކަން ފާހަގަކޮށް، ފާޑުކިޔަމުންނެވެ.
ޕީއައިއެފް އިން މެޖޯރިޓީ ހިއްސާާާއާ އެކު ނިއުކާސަލް ގަތީ ޖުމްލަ 408 މިލިއަން ޑޮލަރު ދީފަ އެެވެ. ނިއުކާސަލްގެ 80 ޕަސެންޓް ހިއްސާ އޮތް ޕީއައިއެފްގެ މިލްކިއްޔާތުގައި 434 ބިލިއަން ޑޮލަރު އެބަހުއްޓެވެ. މިއީ ފުޓްބޯޅަ ކްލަބެއް ހިންގާ ބައެއްގެ މެޖޯރިޓީ ހިއްސާދާރަކަށް ބެއްޔަސް އެންމެ ބޮޑު މިލްކިއްޔާތެވެ. ދެން އެ ޓީމާ އެންމެ ކައިރި ކުރަނީ މެންޗެސްޓާ ސިޓީ ހިންގަމުން އަންނަ ސިޓީ ފުޓްބޯލް ގްރޫޕްގެ ވެރިޔާ ޔޫއޭއީގެ މަހުޖަނު ޝެއިހް މަންސޫރެވެ. އޭނާގެ މިލްކިއްޔާތުގައި 32 ބިލިއަން ޑޮލަރު އެބަހުއްޓެވެ.
