މިއުނިކް (ޖޫން 28) - ބަޔާން މިއުނިކަށް ކުޅެމުންދާ ޕޮލެންޑްގެ ފޯވަޑް ރޮބަޓް ލެވަންޑޯސްކީ، ސްޕެއިނުގެ ބާސެލޯނާ އަށް ވިއްކާލާނީ އެންމެ ކުޑަމިނުން 65 މިލިއަން ޑޮލަރަށް ކަމަށް މީޑިއާ ރިޕޯޓްތަކުން ބުނެފި އެވެ.
ބަޔާނާއެކު ލެވަންޑޯސްކީ ހަދާފައިވާ ކޮންޓުރެކްޓް އަންނަ ސީޒަންގެ ނިޔަލަށް ހަމަވާނެ އެވެ އެ ކްލަބުގެ ކޮންޓުރެކްޓް އާކުރަން ލެވަންޑޯސްކީ ،33، ބޭނުމެއް ނުވެ އެވެ. އެކަން ތަކުރާރުކޮށް ލެވަންޑޯސްކީ ވަނީ މީޑިއާގައި ހާމަކޮށްފަ އެވެ.
ދާދި ފަހުން ބާސެލޯނާ އިން ވަނީ ލެވަންޑޯސްކީ ހޯދަން ބަޔާނަށް 40 މިލިއަން ޔޫރޯ (44 މިލިއަން ޑޮލަރު)ގެ އަގެއް ހުށަހަޅައިފަ އެވެ. އެކަމަކު ބަޔާނުން އެ އަގު ގަބޫލެއް ނުކުރި އެވެ.
ބަޔާން ދޫކޮށްލައި، އާ "ޗެލެންޖެއް" ނެގުމަށް ބޭނުންވާ ކަމަށް ލެވަންޑޯސްކީ ވަނީ ބުނެފަ އެވެ. އަދި ކޮންޓުރެކްޓް ހަމަވަންދެން މަޑުނުކުރެ، ކުރިއަށް އޮތް ސީޒަންގައި ވެސް އެހެން ކްލަބަކަށް ބަދަލުވާން އޭނާ ބޭނުންވާ ކަމަށް ރިޕޯޓްތަކުން ބުނެ އެވެ. ލެވަންޑޯސްކީ ބޭނުންވަނީ ބާސެލޯނާ އަށް ބަދަލުވާށެވެ. އެ ކްލަބުން އޮތީ ލެވަންޑޯސްކީ އަށް ތިން އަހަރުގެ ކޮންޓްރެކްޓެއް ދޭން ތައްޔާރަށެވެ.
އެކަމަކު، ބަޔާންގެ ޗީފް އެގްޒެކްޓިވް، އަދި ކުރީގެ މަޝްހޫރު ގޯލްކީޕަރު، އޮލިވާ ހާން ކުރިން ބުނީ ކުރިއަށް އޮތް ސީޒަންގައި ލެވަންޑޯސްކީ ފެންނާނީ ބަޔާން އިން ކަމަށެވެ.
"ސީޒަނެއްގައި 30 - 40 ލަނޑު ޖަހާ ކުޅުންތެރިއެއް ދޫކޮށްލުމަކީ މޮޔަ ކަމެއް. އޭނާގެ ކޮންޓުރެކްޓް 2023 ގެ ޖޫންގެ ނިޔަލަށް އެބައޮތް. ކޮންޓުރެކްޓް ފުރިހަމަވަންދެން އޭނާ ފެންނާނީ ބަޔާން އިން،" ހާން ބުންޏެވެ.
ބަޔާނުގެ ރައީސް ހާބަޓް ހައިނާ އާއި ސްޕޯޓިން ޑިރެކްޓަރު ހަސަން ސަލިހަމްދްޒިޗް ވެސް ވަނީ ލެވަންޑޯސްކީ މި ފަހަރުގެ ޓްރާންސްފާ މާކެޓްގައި ޓީމު ދޫކޮށްނުދާނެ ކަމަށް ބުނެފަ އެވެ
ފީފާއިން ހޮވި ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމު މިދިޔަ ދެ އަހަރު ހޯދި ލެވަންޑޯސްކީގެ ސޮއި ހޯދުމުގެ ރޭހަށް ޗެލްސީން ޝައުގުވެރިވާ ކަމަށް އިނގިރޭސި މީޑިއާތަކުން އަންނަނީ ރިޕޯޓް ކުރަމުންނެވެ. ލެވަންޑޯސްކީ އަށް ފްރާންސްގެ ޗެމްޕިއަން ޕީއެސްޖީގެ ހުށަހެޅުމެއް ލިބުނު ނަމަވެސް އޭނާ ވަނީ އެ ޓީމަށް ބަދަލުވުމުގެ ވިސްނުމެއް ނެތް ކަމަށް ބުނެފަ އެވެ.
