މުޅި ރާއްޖޭގެ އެކި ކަންކޮޅުތަކުގައި 85 ޓާފް ދަނޑުގެ މަސައްކަތް ކުރެވެމުންދާތީ އެކަމާ ހިތްހަމަޖެހޭ ކަމަށް ޔޫތު މިނިސްޓަރު އަހުމަދު މަހުލޫފް ވިދާޅުވެއްޖެ އެވެ.
ކ.ގުރައިދޫގައި ސަރުކާރުން އެޅި ޓާފް ދަނޑު ހުޅުވުމަށް އިއްޔެ ބޭއްވި ރަސްމިޔާތުގައި ވާހަކަ ދައްކަވަމުން މަހުލޫފް ވިދާޅުވީ ގުރައިދޫ ދަނޑުގެ މަސައްކަތް ނިމިފައި ހުރީ ބޭނުންވި "ދުވެލީގައެއް ނޫން" ކަމަށެވެ. އަދި ބޭނުންވި ދުވަހަށް ވުރެ ލަހުން ދަނޑުގެ މަސައްކަތް ނިމުނީތީ، މިނިސްޓަރު ވަނީ އެ ކަމަށް މައާފަށް އެދިފަ އެވެ
"މި ދަނޑު ހުޅުވިގެންދާތީ އުފާކުރަން. މީގެ ކުރިން ގުރައިދޫން ރާއްޖޭގެ ފުޓްބޯޅައިގައި އެ ހޯދާފައިވާ، ކުރިއެރުން، ކާމިޔާބު، އެ ހިސާބަށް އަލުން ދިއުމަށްޓަކައި، މި ދަނޑުގެ ބޭނުންހިފާނެ ކަމަށް އުންމީދު ކުރަން. މިއަދު، އަޅުގަނޑު ތިބޭފުޅުންނަށް ދޭން ބޭނުންވާ އުފާވެރި ހަބަރަކީ އަޅުގަނޑު މިތަނަށް އައުމުގެ ކުރިން މި އައީ މި ދަނޑުގެ ރޮސްޓްރަމް އާއި ލައިޓް ވެސް އިއުލާނުކޮށްފައި،" މަހުލޫފް ވިދާޅުވި އެވެ.
އިއްޔެގެ ހާއްސަ މެޗަށް ފަހު ބައިވެރިވި ފަރާތްތައް ފޮޓޯ އަކަށް ހުއްޓިލައިގެން.--- ފޮޓޯ: ނައިބު ރައީސް
މަހުލޫފް ވިދާޅުވީ ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު ރާއްޖޭގެ 25 ވަރަކަށް ރަށުގައި ބޮޑު ދަނޑު ގާއިމްކުރަން ވައުދުވެ ވަޑައިގަތް ކަމަށެވެ. މިހާތަނަށް ކުރެވުނު މަސައްކަތްތައް ބަލާއިރު ވެސް ވަރަށް ގިނަ ދަނޑުތަކެއްގެ މަސައްކަތް ނިމިފައިވާ ކަމަށް މިނިސްޓަރު މަހުލޫފް ވިދާޅުވި އެވެ.
"މިއަދު އަޅުގަނޑު އައިސް ވާހަކަ ދައްކާއިރު މީގެ 40 އާ ގާތްކުރާ ދަނޑުގެ މަސައްކަތް ނިންމާލެވި، މިއަދު އަޅުގަނޑު އަޕްޑޭޓް ބަލާލިއިރު، ޖުމްލަ ކޮށް މުޅި ރާއްޖޭގައި މީގެ 85 ދަނޑުގެ މަސައްކަތް ކުރެވޭ ކަމީ އަޅުގަނޑަށް ލިބޭ ހިތްހަމަޖެހޭ ކަމެއް،" މަހުލޫފް ވިދާޅުވި އެވެ.
މީގެ ކުރިން ރައްޔިތުންގެ މަޖިލީހަށް މިނިސްޓަރު މަހުލޫފް ހާޒިރުކުރައްވައި، ރާއްޖޭގެ އެކި ކަންކޮޅުތަކުގައި އަޅާ ޓާފް ދަނޑުގެ މަސައްކަތް ލަސްވާ ސަބަބުތައް އޮޅުންފިލުވަން ރައްޔިތުންގެ މަޖިލީހުގެ އެކި ދާއިރާތަކުގެ މެމްބަރުން ސުވާލުކުރެއްވި އެވެ.
އެ ސުވާލުތަކަށް ޖަވާބު ދެއްވަމުން، މިނިސްޓަރު ވަނީ ދަނޑުތަކުގެ ސްޕީޑް ލަސްވަނީ ކޮންޓްރެކްޓަރުންގެ ސަބަބުން ކަމަށް ވިދާޅުވެފަ އެވެ.
ގުރައިދޫ ދަނޑުގެ މަސައްކަތް އެއްކޮށް ނިމުމުން ރާއްޖޭގެ ލީގުގެ މެޗުތައް ގުރައިދޫ ދަނޑުގައި ކުޅެން މަސައްކަތް ކުރާނެ ކަމަށް މަހުލޫފް ވިދާޅުވި އެވެ. އެ ކަމަށް އޮތް ފަސޭހަ އަކީ ގުރައިދޫ އަކީ މާލެ ކައިރީ އޮތް ރަށަކަށްވުން ކަމަށާއި މެޗުތައް ކުޅެވޭނެ ގޮތަކާ ބެހޭގޮތުން އެފްއޭއެމާ މަޝްވަރާކުރާނެ ކަމަށް މަހުލޫފް ވިދާޅުވި އެވެ.
އިއްޔެ ކުޅުނު ހާއްސަ މެޗުގެ ތެރެއިން ގައުމީ ޓީމުގެ ކުރީގެ ކެޕްޓަން، އައްސަދު ބޯޅަ ހިފައިގެން.--- ފޮޓޯ: ރައީސް އޮފީސް
ގުރައިދޫ ދަނޑު ހުޅުވަން އިއްޔެ ވަނީ ހާއްސަ މެޗެއް ވެސް ކުޅެފަ އެވެ. ގުރައިދޫގެ ޓީމަކާއި ނައިބު ރައީސް ފައިސަލް ނަސީމް ކުޅުއްވި ޓީމެއްގެ މެޗެއް ކުރިއަށްދިޔައިރު، ނައިބް ރައީސްގެ ޓީމުގައި ރާއްޖޭގެ ފުޓްބޯޅައިގެ ލެޖެންޑުން ހިމެނުނެވެ.
ނައިބު ރައީސް ފައިސަލް ވިދާޅުވީ ކުޅިވަރުގެ ތެރެއިން ކުރިއަށް ދެވޭނީ ގުޅުން ރަނގަޅުވެގެން އެކުވެރިކަން ދެމި އޮވެގެން ކަަމަށާއި އުންމީދަކީ ރާއްޖޭގެ ކުޅިވަރުގައި އެކަން ވީ އެންމެ ރަނގަޅަށް ކުރިއަށް ދިއުމަށް ކަމަށެވެ.
ގުރައިދޫގައި ޓާފް ދަނޑެއް އަޅައި، އެ ތަނުގައި މެޗެއް ކުޅެން ތައްޔާރުވާއިރު، މީގެ 25 ވަރަކަށް އަހަރު ކުރީގެ ހަނދާންތައް އާވެގެންދާ ކަމަށް ނައިބު ރައީސް ވިދާޅުވި އެވެ.
"އަޅުގަނޑުގެ ވެސް ސްކޫލް ހަޔާތުގައި ވަރަށް ކުޑައިރު، މި ގުރައިދޫ އަށް ވަރަށް ގިނަގިނައިން އާދެވި، މި ގުރައިދޫ އޭރުގެ ފުޓްބޯޅަ ދަނޑުގައި އަޅުގަނޑު 20 ނަމްބަރު ޖޯޒީ މިއަދު އިއްތިފާގުން މި ލިބުނީ. މި 20 ނަމްބަރު ޖަހައިގެން އަޅުގަނޑުގެ ސްކޫލް ދުވަސްވަރުގައި ކުޅުނީ، އެހެންވެ، އެ ހަނދާންތައް މިއަދު އާދޭ. މީގެ 25 ނޫނީ 30 އަކަށް އަހަރު ކުރީގެ ހަނދާންތައް އެއީ،" ނައިބު ރައީސް ވިދާޅުވި އެވެ.
ގުރައިދޫ ކައުންސިލްގެ ރައީސް ހުސެއިން ޔާމީން މުހައްމަދު ވަނީ ގުރައިދޫ ޓާފް ދަނޑު ހުޅުވަން ނައިބު ރައީސް ފައިސަލް ވަޑައިގެންނެވީތީ އެކަން ފާހަގަކުރައްވައި، އެ ކަމަށްޓަކައި ޝުކުރުއަދާކޮށްފަ އެވެ.
