ކްރިކެޓް ބޯޑް އޮފް މޯލްޑިވްސް (ސީބީއެމް) އިން އަހަރީ އާންމު ޖަލްސާ ބާއްވައި، ބަޖެޓް ފާސްކުރުމުގެ އިތުރުން ޑިވެލޮޕްމަންޓްގެ މުހިންމު މަސައްކަތްތަކެއް ކުރަން އަމާޒުހިފައިފި އެވެ.
އިއްޔެ ބޭއްވި ކްރިކެޓް ބޯޑް އޮފް މޯލްޑިވްސްގެ އަހަރީ އާންމު ޖަލްސާގައި މި އަހަރަށް ފާސްކޮށްފައިވާ ބަޖެޓްގައި ލިބޭނެ ކަމަށް ލަފާކޮށްފައިވަނީ 5،704،264 ރުފިޔާ އެވެ. ހަރަދުވާނެ ކަމަށް އަންދާޒާ ކޮށްފައިވަނީ 5،896،456 ރުފިޔާ އެވެ. އެހެންކަމުން، މިއީ 192،192 ރުފިޔާ ޑެފިސިޓް ބަޖެޓެކެވެ.
ކްރިކެޓް ބޯޑްގެ ރައީސް މުހައްމަދު ފައިސަލް ވަނީ އަހަރީ އާންމު ޖަލްސާގައި މިދިޔަ އަހަރުގެ އަހަރީ ރިޕޯޓް ހުށަހެޅުމުގެ އިތުރުން ހާސިލްކުރެވުނު މުހިންމު ލަނޑުދަނޑިތަކުގެ މައުލޫމާތު ޖަލްސާގެ ހާޒިރީންނާ ހިއްސާކޮށްފަ އެވެ. އަދި މި އަހަރުގެ ބަޖެޓްގައި ހިމަނައިގެން ކުރަން ހަމަޖެހިފައިވާ މަސައްކަތްތަކާ ބެހޭ މައުލޫމާތު ވެސް ވަނީ ހިއްސާކޮށްފަ އެވެ.
އެ ގޮތުން ޑިވެލޮޕްމަންޓްގެ މަސައްކަތުގައި އާ ކަންތައްތަކެއް ކުރާގޮތަށް ވަނީ ހަމަޖެހިފަ އެވެ. ޑިވެލޮޕްމަންޓްގެ ކަންކަމުގައި އިސްކަން ދޭނެ އެންމެ ބޮޑު ކަމަކީ ޔޫތު ޑިވެލޮޕްމަންޓް ޕްރޮގްރާމް (ވައިޑީޕީ) އަށެެވެ. މީގެ ކުރިން ވެސް ކްރިކެޓުން ހިންގި ޔޫތު ޑިވެލޮޕްމަންޓް ޕްރޮގްރާމްތައް ކާމިޔާބެވެ. ޔޫތު ޑިވެލޮޕްމަންޓް ޕްރޮގްރާމުން ރަނގަޅު ކުޅުންތެރިންތަކެއް އުފެދި، އެ ކުޅުންތެރިން ކުރިއެރުންތައް ހޯދައި ގައުމީ ޓީމާ ހަމައަށް ވެސް ވަނީ ގޮސްފަ އެވެ.
މި ފަަހަރު ކްރިކެޓް ބޯޑްގެ ވިސްނުމަކީ އަންހެން ކްރިކެޓް ކުރިއެރުވުމަށް އިސް މަސައްކަތެއް ކުރުމެވެ. އެ ގޮތުން އަންނަ އޮގަސްޓް މަހުގެ ފުރަތަމަ ދުވަހުން ފެށިގެން ބިދޭސީ ތިން ކޯޗުންގެ ބެލުމުގެ ދަށުން ޔޫތު ޑިވެލޮޕްމަންޓްގެ މަސައްކަތްތައް ފެށޭއިރު، އަންހެން ކްރިކެޓަށް ވެސް ކޯޗެއް ހިމެނޭނެ އެވެ.
އެ ތިން ކޯޗުންގެ ތެރޭގައި ހިމެނޭ އަންހެން ބިދޭސީ ކޯޗުގެ މަސައްކަތަކީ ގައުމީ އަންހެން ކްރިކެޓް ޓީމަށް ކޯޗުކޮށްދިނުމާއި ސްކޫލްތަކުން ކްރިކެޓަށް ޝައުގުވެރިވާ އަންހެން ކުދިންނަށް ޓްރެއިނިން ދީ ކޯޗުކޮށްދިނުން ކަމަށް ކްރިކެޓް ބޯޑުން މައުލޫމާތު ދެ އެވެ.
