ސީދާ ތިން ސެޓުން އޮއްފު އެފްސީ ބަލިކޮށް، ވީއޭއެމް އެސޯސިއޭޝަން ކަޕްގެ އެންމެ ފަހުގެ ޗެމްޕިއަން ދިވެހި ސިފައިންގެ ކްލަބުން މި ފަހަރުގެ މުބާރާތުގައި ޖެހިޖެހިގެން ދެ ވަނަ މޮޅު ހޯދައިފި އެވެ.
އެންމެ ފަހުގެ ޗެމްޕިއަން ސިފައިން މި ފަހަރުގެ މުބާރާތުގައި ކުޅުނު ފުރަަތަމަ ދެ މެޗުން ވަނީ ސްޕޯޓްސް ކްލަބް ސިޓީ އާއި ޕޮލިސް ކްލަބް އަތުން ބަލިވެފައި، އެކަމަކު، ދެން ޖެހިގެން އައި ދެ މެޗުން މި ވަނީ ސީދާ ތިން ސެޓުން ވެމްކޯ އާއި އޮއްފު އެފްސީ ބަލިކޮށްފަ އެވެ. މިއަދުގެ މެޗުން އޮއްފުގެ މައްޗަށް ސިފައިން ކުރިހޯދިއިރު، ސެޓުތައް ގެންދިޔައީ، 25-13، 25-16 އަދި 25-21 އިންނެވެ.
ޒުވާނުންގެ މަރުކަޒު އެތެރެ ކޯޓުގައި މިއަދު ހަވީރުގެ މެޗަށް ނުކުތްއިރު، ސިފައިން އޮތީ އިއްޔެ ވެމްކޯ އަތުން ހޯދި މޮޅާ އެކު ރަނގަޅު ރޫހެއްގަ އެވެ. އެ ޓީމުން ރަނގަޅަށް ފެށި މި މެޗުގައި ބިދޭސީ ކުޅުންތެރިންނާއި، އެ ޓީމުގެ ދިވެހި ދެ ތަރިން ކަމަށްވާ، އާދަމް ނަސީމް (އެޑަމް) އާއި ސެޓަރު، ހުސެއިން ޝާހިދު (ޝާޑު) ވަނީ މޮޅު ކުޅުމެއް ދައްކައިފަ އެވެ. ސިފައިންގެ ޓީމުގެ، ޝޯން ޓީ ޖޯންގެ ރަނގަޅު ހަމަލާތަކެއް މި މެޗުގައި ވެސް ފެނިގެންދިޔަ އެވެ.
މެޗުގެ މޮޅު ކުޅުންތެރިއަކަށް ހޮވުނު ސިފައިންގެ ޓީމުގެ އެޑަމް.-- ފޮޓޯ: މުހައްމަދު ޝާބިން/ އަދަދު
އޮއްފު އެފްސީ އަށް މިއަދުގެ މެޗުގައި ދިމާވި އެންމެ ބޮޑު މައްސަލަ އަކީ އެ ޓީމުގެ އެންމެ މުހިންމު ބިދޭސީ ކުޅުންތެރިޔާ އަމިތު ގޫލިއާ އަށް ލިބުނު އަނިޔާގެ ސަބަބުން ބަދަލުކުރަން ޖެހުމެވެ. އޮއްފުން މުޅި މެޗަށް ބަލާއިރު، އެންމެ ރަނގަޅަށް ކުޅުނީ ތިން ވަނަ ސެޓުގަ އެވެ.
ބަދަލުތަކެއް ގެނެސްގެން އޮއްފު އަށް ކުޅެން ޖެހުނު މި މެޗުގައި އެ ޓީމުން ތިން ވަނަ ސެޓުގައި ސިފައިންގެ ޓީމަށް ޗެލެންޖެއް ދިން ނަމަވެސް ފަހުކޮޅުގައި އަމިއްލަ އަށް ހެދުނު ގޯސްތަކެއްގެ ސަބަބުން ސެޓު ނިންމުމާ ހަމައަށް ހިތްވަރެއް ނުދެއްކުނީ އެވެ.
ސިފައިން ވަނީ މި މެޗުގެ ތިން ވަނަ ސެޓުގައި، އެ ޓީމުގައި ހިމެނޭ ތަޖުރިބާކާރު ކުޅުންތެރިޔާ، އަހުމަދު އަބްދުލް ކަރީމް (ލޯންގޭ)ގެ ބޭނުން ހިފައިފަ އެވެ. މެޗުގެ މޮޅު ކުޅުންތެރިއަކަށް ހޮވުނީ ސިފައިންގެ ޓީމުގެ އެޑަމް އެވެ.
މި މެޗަށް ފަހު ޕޮއިންޓް ތާވަލުގެ ކުރީގައި އޮތީ ހަތް ޕޮއިންޓާ އެކު ސިފައިންނާއި ޕޮލިހެވެ. ދެން، އޮތި ހަ ޕޮއިންޓް ހޯދާފައިވާ ކްލަބް ވެމްކޯ އާއި ސިޓީ އެވެ. އޮއްފު އަށް ތިން ޕޮއިންޓް ލިބިފައިވާއިރު، ގުޑީސް އަށް ވަނީ ޕޮއިންޓެއް ލިބިފަ އެވެ.
މިރޭ ކުޅޭ މެޗުގައި ބައްދަލުކުރާނީ ގުޑީސް އާއި ވެމްކޯ އެވެ.
