ވޮލީބޯޅަ އެސޯސިއޭޝަން ކަޕްގައި ދިވެހި ސިފައިންގެ ކުލަބުން ދެ ސެޓު ހޯދާފައިވަނިކޮށް ފަހަތުން އަރައި ތިން ސެޓު ހޯދައި، 3-2 އިން ޕޮލިސް ކުލަބުން ލީގު ބުރުގެ ދެ ވަނަ މޮޅު ހޯދައިފި އެވެ.
އެސޯސިއޭޝަން ކަޕްގެ ފިރިހެން ޑިވިޝަންގައި ޕޮލިސް ކުލަބުން ވަނީ ކުޅުނު ފުރަތަމަ މެޗުވެސް 3-2 ގެ ނަތީޖާ އަކުން ގުޑީސް ސްޕޯޓްސް ކުލަބާ ވާދަކޮށް ކާމިޔާބުކޮށްފަ އެވެ. އަނެއް ކޮޅުން، ސިފައިންވަނީ ކުޅުނު ފުރަތަމަ މެޗުގައި ސްޕޯޓްސް ކުލަބު ސިޓީ އަތުން ސީދާ ތިން ސެޓުން ބަލިވެފަ އެވެ. ރޭ ސިޓީ އަތުން ބަލިވި މެޗަށް ފަހު، 24 ގަޑިއިރު ނުވަނިސް ސިފައިން މި ވަނީ ދެ ވަނަ މެޗެއް ކުޅެފަ އެވެ. އެކަމަކު، ސިފައިން ރަނގަޅު ރޫހެއްގައި ފެށި މި މެޗު ފަހުން މުޅިން އެއްކޮށް މަންޒަރު ބަދަލުވީ އެވެ.
މިއަދު ހަވީރު ކުޅުނު މެޗުގެ ފުރަތަމަ ސެޓު ސިފައިން ކާމިޔާބުކުރީ ފަސޭހަކަމާ އެކުގަ އެވެ. ޕޮލިހަށް މާ އެދެވޭ ކުޅުމެއް މި ސެޓުގައި ނުދެއްކުނުއިރު ސާވިސްތަކާއި ރިސީވް މި ފެނުނީ ދަށްކޮށެވެ. ސިފައިން ޓީމުގެ އެޓޭކަރު ޝޮން ޓީ ޖޯންގެ ބާރު ހަމަލާތަކާ އެކު އެ ޓީމުން މި ސެޓު 25-15 އިން ކާމިޔާބުކުރި އެވެ.
ދެ ވަނަ ސެޓު ޕޮލިހުން ފެށީ ލީޑުގައި އޮވެ އެވެ. އަނޫ ޖޭމްސް އާއި ބްލޮކަރު އަކިން އައްމާލްގެ ރަނގަޅު ހަމަލާތަކުން ޕޮލިހުން ރަނގަޅު ވާދައެއް ކުރި ނަމަވެސް ސެޓުގެ މެދުތެރެއިން ސިފައިން ލީޑު ނެގި އެވެ. އެ ލީޑު ފުޅާކޮށް 25-20 އިން ސިފައިން ސެޓު ކާމިޔާބުކޮށް މެޗުގެ ކޮންޓްރޯލް ނެގުމާ ގާތަށް ޖެހިލި އެވެ. ސިފައިންގެ އާދަމް ނަސީމް (އެޑަމް)ގެ ރަނގަޅު ޝޮޓްތަކެއް ފުރަތަމަ ދެ ސެޓުގައި ފެނިގެންދިޔަ އެވެ.
ސިފައިންގެ އެޑަމް މިއަދުގެ މެޗުގެ ތެރެއިން ޕޮއިންޓެއް ހޯދުމަށް ފަހު އުފާފާޅުކުރަނީ.--- ފޮޓޯ: އިމޭޖަސް،އެމްވީ/ ނައުޝަމް ވަހީދު
ތިން ވަނަ ސެޓުގެ ޕޮލިހުން ފެށި ލީޑުގައި އޮވެ އެވެ. ނަމަވެސް މިފަހަރު އެ ލީޑު ގެއްލުނަނުދީ ފަހު ވަގުތާ ހަމައަށް ހިފެހެއްޓި އެވެ. މި ފަހަރުގެ މުބާރާތުގައި ފެންނަ އެންމެ ހުނަރުވެރި ސެޓަރު، ޕޮލިހުގެ މުތުސާމީގެ ލީޑާޝިޕާ އެކު ޕޮލިހުން ލީޑު ގެއްލުވާ ނުލައި ކުޅުނުއިރު، އަނޫ ޖޭމްސްގެ ބާރު ހަމަަލާތަކުން ފަހު ވަގުތު ލީޑު ފުޅާކުރި އެވެ. ސިފައިންނަށް އަރާ ހަމަކުރަން ލިބުނު ފުރުސަތުތަކުގެ ބޭނުން ނުކުރެވި ޕޮލިހުން މި ސެޓު 22-25 އިން ކާމިޔާބުކޮށް އުއްމީދު ހޯދި އެވެ. މިއީ ސިފައިންގައި ޕްރެޝަރު ބޮޑުވާން ފެށި ހިސާބެވެ.
ހަތަރު ވަނަ ސެޓުވެސް ފެނުނީ ވަރަށް ވާދަވެރިކޮށެވެ. ފަހު ކޮޅާ ހަމައަށް ވާދަވެރިކޮށް ސިފައިން ޓީމަށް ސެޓު ގެއްލުނީ ބިދޭސީ ކުޅުންތެރިންނަށް ލިބުނު ފުރުސަތުތަކުގެ ބޭނުން ނުކުރެވިގެންނެވެ. އަކިން އާއި އަނޫ ޖޭމްސްގެ ހުނަރުން މިފަހަރުވެސް ޕޮލިހުން ތަފާތު ދެއްކި އެވެ. މި ސެޓު އެޓީމުން ހޯދީ 20-25 އިންނެވެ.
ފަހު ސެޓުގައި ޕޮލިސް ފެނުނީ އާދަޔާ ޚިލާފު ރޫހެއްގައި ކުޅުނު ތަނެވެ. ފެށިގޮތަށް ބޮޑު ލީޑެއް ނަގައި އެ ލީޑު ދެމެހެއްޓި އެވެ. ދިވެހި ކުޅުންތެރިންގެ ކުޅުންވެސް މި ސެޓުގައި ވަރަށް ބޮޑަށް ފާހަގަވި އެވެ. ފަހު ސެޓު އިތުބާރާއިއެކު ކުޅެ ޕޮލިހުން ހޯދީ 7-15 އިންނެވެ. ސިފައިން ވަނީ މި މެޗުގައި އެ ޓީމުގެ ތަޖުރިބާކާރު ކުޅުންތެރިޔާ، އަހުމަދު އަބްދުލް ކަރީމް (ލޯންގޭ)ގެ ބޭނުން ރަނގަޅަށް ފުރަތަމަ މެޗަށް ވުރެ ބޮޑަށް ހިފަން މަސައްކަތް ކޮށްފަ އެވެ.
މެޗަށް ފަހު ޕޮލިސް ކުލަބުގެ ކޯޗު ފަތުހުﷲ ވަހީދު (ފައްލޯ) ބުނީ ފެށުން ގޯސްވި ކަމުގައިވިޔަސް ހުރިހާ ކުޅުންތެރިން އާ ހިތްވަރަކާއިއެކު ކުޅެ ދެއްކި ކުޅުމަކީ ލިބޭ ބޮޑު ހިތްހަމަޖެހުމެއް ކަމަށެވެ. އަދި މި މެޗުގައި ފެނުނީ ޕޮލިހުގެ ކޮންމެ ކުޅުންތެރިއަކު ވެސް އެއް ކުޅުންތެރިއަކު އަނެއް ކުޅުންތެރިއަކަށް ކުރި އިތުބާރު ކަމަށާއި، މިއީ ކޯޗެއްގެ ގޮތުގައި އެންމެ ބޮޑަށް ލިބޭ ހިތްވަރުކަމަށް ފައްލޯ ފާހަގަކުރި އެވެ.
ދިވެހި ސިފައިން ކުލަބުގެ ކޯޗު ޖުނައިދު އަބްދުﷲ ބުނީ ވާދަވެރި ދެ ޓީމް ކުޅޭއިރު ތަފާތަކަށް ވާނީ އަބަދުވެސް ބިދޭސީ ކުޅުންތެރިން ކަމަށެވެ. ސިފައިން ޓީމްގެ ބިދޭސީ ކުޅުންތެރިންނަށް މިދިޔަ ދެ މެޗުގައިވެސް ނުކުޅެވުމަކީ ބަލިވުމުގެ މައިގަނޑު ސަބަބުކަން ޖުނައިދު ފާހަގަކުރި އެވެ.
ހިތްވަރު ލާން ޖެހޭ ދަނޑިވަޅުގައި ބިދޭސީ ތިން ކުޅުންތެރިންގެ ފަރާތުން ޓީމަށް ފައިދާވާ ކަހަލަ ކުޅުމެއް ނުފެންނަ ކަމަށް ޖުނައިދު ބުންޏެވެ.
މުބާރާތުގައި މިރޭ ކުޅޭ މެޗުގައި ވާދަކުރާނީ ކުލަބު ވެމްކޯ އާއި ސްޕޯޓްސް ކުލަބު ސިޓީ އެވެ. ދެ ޓީމު ވެސް ވަނީ ފުރަތަމަ މެޗުން މޮޅުވެފަ އެވެ. ދެ މެޗުން މޮޅުވެގެން ފެށި ހަމައެކަނި ޓީމަކީ ޕޮލިހެވެ. ސިޓީ އާއި ވެމްކޯގެ މެޗު ފަށާނީ މިރޭ 20:15 ގަ އެވެ.
